ગુજરાત / અમદાવાદમાં વીજળીના કડાકા સાથે તૂટી પડ્યો વરસાદ, અનેક વિસ્તારોમાં પાણી ભરાયા.

  • 27-Sep-2021 02:12 PM

અમદવાદમાં વીજળીના કડાકા-ભડાકા સાથે ધોધમાર વરસાદ વરસી રહ્યો છે. શહેરના એસજી હાઈવે પર ભારે વરસાદ થતાં ઘણાં ઠેકાણે પાણી ભરાઈ ગયા છે. શહેરના પૂર્વ તથા પશ્ચિમના અલગ-અલગ વિસ્તારોમાં વરસાદ નોંધાયો છે.

શહેરના પ્રહલાદનગર, શિવરંજની, ગોતા, શાસ્ત્રીનગર, રાણીપ સહિતના વિસ્તારોમાં ભારે વરસાદી ઝાપટું થયા બાદ રસ્તાઓ પર પાણી ભરાઈ ગયા છે. શાસ્ત્રીનગરમાં રસ્તા પર પડેલા ખાડામાં બીઆરટીએસ બસ ફસાઈ જવાની પણ ઘટના બની છે. શહેરના આશ્રમ રોડ સહિતના વિસ્તારોમાં પણ સવારથી કાળા ડિબાંગ વાદળો ઘેરાયા હતા જે બાદ ભારે ધોધમાર વરસાદ થયો હતો. આ વિસ્તારોમાં વરસાદ બાદ રસ્તાઓ તથા નીચાણવાળા વિસ્તારોમાં પાણી ભરાઈ ગયા છે.

શહેરના જોધપુર વિસ્તારમાં વરસાદી પાણીના નિકાલ માટે જે વ્યવસ્થા એક વર્ષ જેટલા સમય પહેલા કરવામાં આવી છે ત્યાં પણ વરસાદ બાદ પાણી ભરાઈ જવાની ઘટના બની છે. રસ્તાઓ પર પાણી ભરાઈ જવાથી ટ્રાફિક જામની અને રસ્તાઓને નુકસાન થવાની સમસ્યા ઉભી થઈ છે. ચાલુ અઠવાડિયા દરમિયાન અમદાવાદ વરસાદ માહોલ રહેવાની હવામાન વિભાગ દ્વારા આગાહી કરવામાં આવી છે.

અમદાવાદના વિરમગામ સહિત આસપાસના વિસ્તારો અને ગાંધીનગર તથા તેની આસપાસના વિસ્તારોમાં વીજળીના કડાકા સાથે વરસાદ નોંધાયો છે.

રાજ્યના અન્ય ભાગોની વાત કરીએ તો મહેસાણા, સાબરકાંઠા, બનાસકાંઠામાં પણ વરસાદ નોંધાયો છે. ભારે વરસાદ થતા નીચાણવાળા વિસ્તારોમાં પાણી ભરાઈ જવાની સમસ્યા સર્જાઈ છે.

હવામાન વિભાગની આગાહી
ગુલાબ વાવાઝોડાના કારણે રાજ્યમાં ફરી એકવાર અતિભારે વરસાદી માહોલ જામવાની સંભાવના વ્યક્ત કરવામાં આવી રહી છે. રાજ્યના હવામાન વિભાગ દ્રારા આવતીકાલે સુરત, ડાંગ, નવસારી, વલસાડ, દમણ, દાદરા નગર હવેલી, અમરેલી, ભાવનગર, ગીર સોમનાથ, બોટાદ અને દીવમાં તોફાની વરસાદની આગાહી છે.

આ સિવાય આણંદ, વડોદરા, પંચમહાલ, દાહોદ, મહિસાગર, છોટાઉદેપુર, નર્મદા, ભરુચ, તાપી, રાજકોટ, પોરબંદર, જૂનાગઢ, દેવભૂમિ દ્વારકા અને કચ્છમાં ભારે વરસાદ થવાની આગાહી છે.

Share This :

Related Articles

Leave a Comment