સ્પોર્ટ્સ / રાહુલની ગેરહાજરીમાં ખૂલી ગયું આ ખેલાડીનું નસીબ, ન્યૂઝીલેન્ડ સામે કરશે ટેસ્ટ ડેબ્યુ.

  • 25-Nov-2021 08:41 AM

ઓપનર લોકેશ રાહુલ ઈજાના કારણે ન્યૂઝીલેન્ડ સામેની ટેસ્ટ સીરિઝમાં રમવાનો નથી જેના કારણે શ્રેયસ ઐય્યરનું નસીબ ખૂલી ગયું છે. ગુરૂવારથી શરૂ થઈ રહેલી પ્રથમ ટેસ્ટ ક્રિકેટ મેચ અગાઉ કાર્યકારી સુકાની અજિંક્ય રહાણેએ જણાવ્યું હતું કે, શ્રેયસ ઐય્યર ટેસ્ટ કારકિર્દીનો પ્રારંભ કરશે. જોકે, તેણે તે ન હતું જણાવ્યું કે ટીમમાં ત્રીજો સ્પિનર કોણ હશે.

સ્પિન ડિપાર્ટમેન્ટમાં ભારત પાસે અક્ષર પટેલ છે પરંતુ તેણે ટ્રેનિંગ કરી ન હતી. જ્યારે જયંત યાદવ નેટ પ્રેક્ટિસમાં સારા ફોર્મમાં જોવા મળ્યો હતો. રહાણેએ જણાવ્યું હતું કે, શ્રેયસ ઐય્યર પોતાનું ટેસ્ટ ડેબ્યુ કરશે. રહાણેએ કહ્યું હતું કે લોકેશ રાહુલનું ઈજાગ્રસ્ત થવું ભારતીય ટીમ માટે મોટો ફટકો છે પરંતુ તેણે ઓપનર મયંક અગ્રવાલ અને શુભમન ગિલ પર વિશ્વાસ વ્યક્ત કર્યો હતો.

લોકેશ રાહુલે ઈંગ્લેન્ડમાં પ્રભાવશાળી પ્રદર્શન કર્યું હતું અને તે સારા ફોર્મમાં છે. ચોક્કસથી અમને તેની ખોટ સાલશે પરંતુ અમારી પાસે એવા ખેલાડીઓ છે જે જવાબદારી લઈ શકે છે અને ભૂતકાળમાં તેમણે સારું પ્રદર્શન કર્યું છે. તેથી મને ઓપનિંગ સ્લોટ માટે કોઈ ચિંતા નથી, તેમ રહાણેએ કહ્યું હતું.

જોકે, ત્રીજા સ્પિનર અંગે રહાણેએ સચોટ જવાબ આપ્યો ન હતો. તેણે કહ્યું હતું કે, હું તે અંગે કોઈ ખુલાસો કરી શકું નહીં. હું ટીમના કોમ્બિનેશનને લઈને ખાતરીપૂર્વક કહી શકું નહીં, પરંતુ ભારતમાં તમે જાણો છો તેમ મોટા ભાગની વિકેટ સ્પિનર્સને મદદરૂપ હોય છે. આપણે આશા રાખી શકીએ છીએ કે બોલ ધીમો અને નીચો રહેશે. મને ખાતરી નથી કે વિકેટ કેવી હશે.

છેલ્લા ઘણા સમયથી રહાણે કંગાળ ફોર્મમાં રમી રહ્યો છે. આ વર્ષે 11 ટેસ્ટમાં તેની એવરેજ 19ની રહી છે. પોતાના ફોર્મ અંગે તેણે જણાવ્યું હતું કે, હું મારા ફોર્મને લઈને ચિંતિત નથી. મારી જવાબદારી ટીમમાં વધારેમાં વધારે યોગદાન આપવાની છે. યોગદાનનો મતલબ નથી કે તમે પ્રત્યેક મેચમાં સદી ફટકારો. 30, 40 કે 50 રન પ્રતિ ઈનિંગ્સ પણ મહત્વનું યોગદાન છે.

Share This :

Related Articles

Leave a Comment