ઇન્ડિયા / ચેન્નઈઃ વરસાદના ડરથી ફ્લાયઓવર પર કાર પાર્ક કરી રહ્યા છે લોકો.

  • 25-Nov-2021 10:10 AM

ભારે વરસાદના કારણે લોકોના વાહનો પાણીમાં ડૂબી ગયા હતા, તેથી તેઓ બ્રિજ પર જ વાહનો પાર્ક કરી રહ્યા છે

ચેન્નઈમાં ભારે વરસાદના કારણે લોકોની મુશ્કેલીઓ વધી ગઈ છે. ટી નગર વિસ્તાર એક સપ્તાહથી વધુ સમયથી સતત પાણીમાં ડૂબી ગયો હતો, જેના કારણે સ્થાનિકોએ તેમના વાહનો નજીકમાં આવેલા જી એન ચેટ્ટી રોડ ફ્લાયઓવર પર પાર્ક કર્યા હતા. સ્થાનિકોનું કહેવું છે કે જો એક કલાક માટે પણ વરસાદ આવશે તો તેઓ તેમના વાહનો ફ્લાયઓવર પર પાર્ક કરશે કેમ કે તેઓ કોઈ જોખમ લેવા ઈચ્છતા નથી.

પોલીસે જણાવ્યું હતું કે તેમાંથી કેટલાક આગલી રાત્રે હવામાનની આગાહીની તપાસ કર્યા પછી તરત જ તેમના વાહનો પાર્ક કરે છે. જેના કારણે માર્ગ પરનો વાહનવ્યવહાર પણ ધીમો પડી ગયો છે.

રહીશો વેલાચેરી ફ્લાયઓવરનો ઉપયોગ પણ તેમની કાર્સ અને ટુ-વ્હીલર્સના પાર્કિંગ માટે કરી રહ્યા છે. તેઓ વરસાદથી પોતાના વાહનોને બચાવવા માટે ફ્લાયઓવર પર પાર્કિંગ કરી રહ્યા છે. ટી નગરના રહેવાસી શ્રીધરે જણાવ્યું હતું કે, આ વખતે અમારા સમગ્ર વિસ્તારમાં પાણી ભરાઈ ગયા હતા. અમારા વાહનો પાણીમાં ડૂબી ગયા હતા. મારી બહેનની કાર હવે રિપેર પણ થઈ શકે તેમ નથી. અમારે હવે વાહનો રિપેર કરાવવા માટે ઘણો ખર્ચ કરવો પડશે.

અન્ય એક રહેવાસીએ જણાવ્યું હતું કે, આ વખતે પાણીનું સ્તર ડરાવે તેવું હતું. અમે કોઈ પણ જાતનું જોખમ ઉઠાવવા ઈચ્છતા નથી તેથી અમે અમારી કાર્સ અહીં પાર્ક કરીએ છીએ. રવિવાર સવાર સુધી બ્રિજ પર પાર્ક કરેલા વાહનોની લાંબી લાઈનો લાગી હતી.

સદાશિવમ સ્ટ્રીટના રહેવાસી બાલાસુબ્રમણ્યમે જણાવ્યું હતું કે, અમે વરસાદ અને અમારી કાર અંગે વિચારીને આખી રાત જાગતા રહી શકીએ નહીં. પાણીનો ઝડપથી નીકાલ થઈ જશે તેવી આશા અમે છોડી દીધી છે. તેથી અહીં કાર પાર્ક કરવી સૌથી ઉત્તમ વિકલ્પ છે.

પોલીસે જણાવ્યું હતું કે, સ્થાનિકો વરસાદના ડરના કારણે તેમના વાહનો બ્રિજ પર પાર્ક કરી રહ્યા છે. જ્યાં સુધી વરસાદ બંધ નહીં થાય ત્યાં સુધી આ યથવાત રહેશે. જ્યાં સુધી ટ્રાફિકમાં કોઈ અડચણ નહીં થાય ત્યાં સુધી અમે તેમને પાર્ક કરતા રોકીશું નહીં. પરંતુ તેમાં કેટલાક લોકો પાર્કિંગ કરવા અંગે ઝઘડા કરે છે, તેમ એક પોલીસ અધિકારીએ જણાવ્યું હતું.

Share This :

Related Articles

Leave a Comment