બોલીવુડ / 'બોબ બિસ્વાસ' વખતે 100 કિલો હતું અભિષેક બચ્ચનનું વજન, જોઈને કેવું હતું પત્ની-દીકરીનું રિએક્શન?

  • 26-Nov-2021 10:10 AM

અભિષેક બચ્ચન આજકાલ પોતાની આગામી ફિલ્મ 'બોબ બિશ્વાસ'ને લઈને ચર્ચામાં છે. ફિલ્મનું ટ્રેલર જોયા બાદ ફેન્સ આતુરતાથી તેની રિલીઝ થવાની રાહ જોઈ રહ્યા છે. આ ફિલ્મ દ્વારા અભિષેક બચ્ચન સસ્પેન્સથી ભરેલું પાત્ર ભજવવાનો છે. આ રોલ એવા વ્યક્તિનો છે જે ખાસ્સા સમય સુધી કોમામાં રહ્યો હતો અને હવે નોર્મલ જિંદગી જીવવાની કોશિશ કરી રહ્યો છે. કોમામાંથી બહાર આવ્યા બાદ તે લોકોને વિશ્વાસ અપાવવાના પ્રયત્નમાં છે કે તેને પાછલી જિંદગી વિશે કશું જ યાદ નથી પણ હકીકત કંઈક અલગ જ છે.

અભિષેક બચ્ચન બોલિવુડના એવા એક્ટર્સ પૈકીનો એક છે જેણે કરિયરમાં ઓછી પરંતુ ઉમદા ફિલ્મો પસંદ કરી છે. ફિલ્મ હિટ હોય કે ફ્લોપ અભિષેકે હંમેશા પોતાના પાત્ર સાથે પ્રયોગો કર્યા છે. બોબ બિશ્વાસ પણ તેણે ભજવેલા આવા જ પાત્રોમાંથી એક છે. ફિલ્મમાં પોતાના રોલ સાથે ન્યાય કરવા માટે અભિષેકે મહેનત પણ ખૂબ કરી છે.

કલાકારો પોતાના પાત્ર માટે શારીરિક ટ્રાન્સફોર્મેશન કરવાથી ચૂકતાં નથી ત્યારે અભિષેકે 'બોબ બિશ્વાસ' માટે વજન વધાર્યું હતું. એક ઈન્ટરવ્યૂમાં અભિષેકે જણાવ્યું કે, શૂટિંગ દરમિયાન તેનું વજન 100-105 કિલો થઈ ગયું હતું. વધતા વજનના કારણે તેની ચાલવાની ઢબ પણ બદલાઈ ગઈ હતી.

ઈન્ટરવ્યૂ દરમિયાન અભિષેકને પૂછવામાં આવ્યું કે, પાત્ર માટે તેણે વજન વધાર્યું હતું ત્યારે તેના નવા લૂકને જોઈને પત્ની ઐશ્વર્યા રાય અને દીકરી આરાધ્યાની શું પ્રતિક્રિયા હતી? જવાબમાં એક્ટરે કહ્યું, "વધેલા વજનના કારણે મારા દેખાવમાં આવેલા બદલાવથી ઐશ્વર્યા અને આરાધ્યાને કોઈ ફરક નહોતો પડ્યો અને કોઈ વાંધો પણ નહોતો. તેમને ખબર છે કે આ મારા પ્રોફેશનનો ભાગ છે અને એક્ટર છું ત્યારે ઘરમાં લોકો આ પ્રકારના ફેરફારોથી ટેવાયેલા છે. તેમને આ બધી બાબતોની આદત છે."

સુજોય ઘોષના નિર્દેશનમાં બનેલી ફિલ્મ 'બોબ બિશ્વાસ' 3 ડિસેમ્બરે ઓટીટી પ્લેટફોર્મ પર રિલીઝ થવાની છે. અભિષેક બચ્ચન ઉપરાંત ચિત્રાંગદા સિંહ પણ ફિલ્મમાં લીડ રોલમાં છે.

Share This :

Related Articles

Leave a Comment