બોલીવુડ / મૂવી રિવ્યૂ : સત્યમેવ જયતે 2

  • 26-Nov-2021 10:39 AM

એક્ટર- જૉન અબ્રાહમ, દિવ્યા ખોસલા કુમાર, અનૂપ સોની, ગૌતમી કપૂર, ઝાકિર હુસૈન
ડિરેક્ટર- મિલાપ ઝવેરી
શ્રેણી- હિન્દી, એક્શન, ડ્રામા
સમયગાળો- 2 કલાક 22 મિનિટ
રેટિંગ- 3/5

વાર્તા

સત્યા આઝાદ(જૉન અબ્રાહમ) ગૃહ મંત્રી છે. તે રાજ્યને ભ્રષ્ટાચારથી મુક્ત કરવા માંગે છે. એન્ટી-કરપ્શન બિલ લાવવા માંગે છે. પરંતુ સંસદમાં અન્ય પાર્ટીના સભ્યો તેમનો સાથ નથી આપતા. બિલને સંસદમાં બહુમતી નથી મળતી જેના કારણે તેઓ ઘણાં નિરાશ છે. સત્યા આઝાદને દુખ એ વાતનું પણ છે કે તેમના પત્ની વિદ્યા(દિવ્યા ખોસલા કુમાર) જે વિપક્ષમાં છે તે પણ તેમનો સાથ નથી આપતી. આ દરમિયાન શહેરમાં અમુક હત્યાઓ થાય છે. એસીપી જય આઝાદ(જોન અબ્રાહમ)ને બોલાવવામાં આવે છે. આરોપીઓને પકડવાનું કામ તેમને સોંપવામાં આવે છે. હવે તમે વિચારી રહ્યા હશો કે આ સ્ટોરી બે ભાઈઓની હશે, બે ભાઈઓ વચ્ચેની લડાઈની છે, તો ઉભા રહો. આ સ્ટોરી એટલી પણ સરળ નથી.

વર્ષ 2018માં રીલિઝ થયેલી ફિલ્મ સત્યમેવ જયતેની સ્ટોરી ભ્રષ્ટાચાર અને સત્તાની ભૂખ પર આધારિત હતી. માટે સત્યમેવ જયતે 2 માટે પણ એવી થીમ રાખવી જરુરી હતી. રાઈટર-ડિરેક્ટર મિલાપ ઝવેરી અને તેમની ટીમે આ થીમને બચાવી રાખવા અને જાળવી રાખવા માટે કોઈ કસર નથી છોડી. સત્યમેવ જયતે 2ને 80ના દશકની માસ ફિલ્મની જેમ બનાવવામાં આવી છે. જ્યારે પડદા પર તમે જુઓ છો કે જોન અબ્રાહમનું પાત્ર નિર્દોષ લોકોની હત્યાના ગુનેગારોને સજા આપનાર પ્રામાણિક વ્યક્તિ બની ગયું છે તો તમને આશ્ચર્ય નહીં થાય. તમને જાણીને નવાઈ નહીં લાગે કે ગુનેગારોને મૃત્યુની સજા આપનાર વ્યક્તિ સત્યા જ છે. જયને તો માત્ર પ્રામાણિકતાથી તપાસ કરવા અને ન્યાય અપાવવા માટે લાવવામાં આવ્યો છે.

મિલાપ ઝવેરીએ કોઈ પણ પ્રકારના સંકોચ વિના વ્યક્ત કર્યું છે કે તેમની ફિલ્મ 80ના દશકની ફિલ્મો માટે એક ટ્રિબ્યૂટ છે. ફિલ્મના ડાયલોગ અને સ્ક્રીનપ્લેમાં તે જણાઈ આવે છે. ઉદાહરણ તરીકે, સત્યા એસીપીને ફોન કરીને કહે છે કે, તે ગુનેગારોને સજા આપશે, પછી ભલે ગમે તે થઈ જાય. જયની એન્ટ્રી વાળો સીન, દાદાસાહબ આઝાદ(જોન અબ્રાહમ)નો ખેડૂતના રુપમાં સીન, વગેરે સીન જૂની ફિલ્મોની યાદ અપાવે છે. ફિલ્મમાં ક્લાઈમેક્સ પહેલા એક એવો પણ સીન છે જેમાં બન્ને ભાઈ અંદરઅંદર લડાઈ કરે છે. ટુંકમાં કહીએ તો ફિલ્મમાં થીમ અનુસાર મસાલો ઉમેરવામાં કોઈ કસર છોડવામાં નથી આવી.

મિલાપ ઝવેરીએ ફિલ્મમાં એકસાથે અનેક મુદ્દાઓને જોડવાનો પ્રયત્ન કર્યો છે. તેમાં ભ્રષ્ટાચારની વાત છે. ખેડૂતોની આત્મહત્યાનો મુદ્દો છે. મહિલાઓ વિરુદ્ધ થતા ગુનાનો મુદ્દો છે. નિર્ભયા કાંડની પણ ચર્ચા છે. લોકપાલ બિલ છે. ધાર્મિક સહિષ્ણુતા, ધાર્મિક સદ્દભાવનાની ચર્ચા છે. આટલુ જ નહીં, આજના મીડિયા અને સોશિયલ મીડિયાની ભૂમિકા પર પણ પ્રકાશ પાડવામાં આવ્યો છે.

અભિનય

પડદા પર જોન અબ્રાહમનું આ મસાલા ઓલ્ડ-સ્કૂલ ફિલ્મોમાં કમ્ફર્ટ દેખાઈ આવે છે, પછી તે જુડવા ભાઈઓનું પાત્ર હોય કે તેમના પિતાનું. ટ્રિપલ રોલ હોવા છતાં જોન અબ્રાહમે તેને સહજતા અને નિશ્ચિંતતાથી ન્યાય આપ્યો છે. તે પડદા પર સત્યા તરીકે થોડો સંયમ દર્શાવે છે, તો જય તરી કે અથવા વિધાનસભામાં લોકપાલ બિલની લડાઈ કરતા એક ખેડૂત નેતા બનતા પણ અચકાતો નથી. દિવ્યા ખોસલા કુમાર પણ સારી લાગે છે. આ પુરુષ પ્રધાન ફિલ્મમાં તેનો રોલ ઘણો મહત્વનો છે. વિદ્યાનું પાત્ર એવું છે જે સત્યનો સાથ આપે છે. તે અસહમત હોય ત્યારે ચુપ રહેવાનું પસંદ કરે છે, પરંતુ અમુક મુદ્દાઓ પર પતિ સત્યા અને મંત્રી પિતા (હર્ષ છાયા)નો વિરોધ કરતા અચકાતી નથી. ગૌતમી કપૂરે ફિલ્મમાં દાદાસાહેબના પત્ની અને સત્યા-જયના માતાનો રોલ કર્યો છે અને તે ઠીક છે. આ સિવાય હર્ષ છાયા, અનૂપ સોની, ઝાકિર હુસૈન, દયાશંકર પાંડે અને સાહિલ વૈદે પોતાના ભાગના રોલને સારી રીતે ભજવ્યો છે.

ફિલ્મના ગીતો સારા છે. પછી તે વેડિંગ સોન્ગ તેનુ લહેંગા હોય તે, કરવા ચૌથનું ગીત મેરી ઝીંદગી તુ. આ સિવાય નોરા ફતેહીનું ધમાકેદાર આઈટમ નંબર કુસુ કુસુ પણ છે. આ એક હાર્ડકોર એક્શન ફિલ્મ છે. જોન અબ્રાહમ એક્શન હીરો તરીકે નિરાશ નથી કરતો. એક્શનના શોખીનોને આ ફિલ્મ ખૂબ પસંદ આવશે. અમુક સીન વાસ્તવિકતાથી દૂર લાગે છે. જેમ કે એક હેલિકોપ્ટરને રોકવા માટે ત્રણ જોન અબ્રાહમ એકસાથે જોવા મળે છે ત્યારે એવો અનુભવ થાય છે કે આ કંઈક વધારે પડતું છે.

Share This :

Related Articles

Leave a Comment