રાજકારણ / વડાપ્રધાન નરેન્દ્ર મોદીનો ત્રણ દિવસનો ગુજરાત પ્રવાસ, આ કાર્યક્રમોમાં ભાગ લેશે.

  • 18-Apr-2022 09:54 AM

આજથી વડાપ્રધાન નરેન્દ્ર મોદી ગુજરાતના ત્રણ દિવસના મહેમાન બની રહ્યા છે. પોતાના પ્રવાસ દરમિયાન વડાપ્રધાન મોદી ગાંધીનગર, બનાસકાંઠા અને જામનગમાં આયોજિત કાર્યક્રમમાં ભાગ લેવાના છે. આ કાર્યક્રમ દરમિયાન તેઓ વાલીઓ, શિક્ષકો અને વિદ્યાર્થીઓ સાથે સંવાદ કરવાના છે. પોતાના પ્રવાસ પહેલા વડાપ્રધાન મોદીએ ટ્વીટ કરીને તેમના કાર્યક્રમ અંગે વિગતો આપી છે. મોદી સોમવારે સાંજે નવી દિલ્હીથી 5.30 વાગ્યે અમદાવાદ એરપોર્ટ પર આવી પહોંચશે. અહીંથી પીએમ ગાંધીનગર રવાના થશે અને તે પછી બે દિવસ બનાસકાંઠા અને જામનગરના પ્રવાસ પર જવાના છે.

આજે સાંજે વડાપ્રધાન મોદી અમદાવાદ એરપોર્ટ પર આવી પહોંચશે જ્યાં રાજ્યપાલ આચાર્ય દેવવ્રત, મુખ્યમંત્રી ભૂપેન્દ્ર પટેલ, મંત્રીમંડળના સભ્યો તેમના સ્વાગત માટે ઉપસ્થિત રહેશે. અહીંથી વડાપ્રધા મોદી સીધા ગાંધીનગર માટે રવાના થશે. જ્યાં શિક્ષણ વિભાગના કમાન્ડ એન્ડ કંટ્રોલ સેન્ટરમાં પહોંચીશે. જ્યાં તેમની સાથે મુખ્યમંત્રી સહિત રાજ્યના શિક્ષણમંત્રી જીતુ વાઘાણી પણ ઉપસ્થિતિ રહેશે. આ કંટ્રોલ સેન્ટરમાં શિક્ષણ વિભાગની તમામ કામગીરી, શિક્ષકો અને વિદ્યાર્થીઓની હાજરીથી માંડીને તમામ પ્રવૃત્તિઓની રિયલ ટાઈમ એન્ટ્રી થતી રહેશે. અહીંથી વડાપ્રધાન મોદી શિક્ષકો, વાલીઓ અને વિદ્યાર્થીઓ સહિત અધિકારીઓ સાથે સંવાદ કરવાના છે.

ગુજરાતના શૈક્ષણિક કાર્યો સાથે આશરે 2.4 લાખ શિક્ષકો, 10,000 જેટલો સુપરવીઝન સ્ટાફ અને 2.5 લાખ કરતા વધારે કર્મચારીઓ જોડાયેલા છે. આ તમામનું મોનિટરિંગ અને વિદ્યાર્થીઓના લર્નિંગ આઉટકમ પર સતત ધ્યાન રાખવા અને તેમાં સુધારણા કરવા માટે 2019માં શિક્ષણ વિભાગે દેશમાં પ્રથમ ટેક્નોલોજી આધારિત વ્યવસ્થા ઉભી કરી હતી.

આજના કાર્યક્રમ પછી 19મી એપ્રિલે વડાપ્રધાન મોદી જામનગર જશે અને અહીં વલ્ડ હેલ્થ ઓર્ગેનાઈઝશન (WHO) ગ્લોબલ સેન્ટર ફોર ટ્રેડિશનલ મેડિસિન્સનું ખાતમુહૂર્ત કરશે. આ કાર્યક્રમ દરમિયાન મોરેશિયસના વડાપ્રધાન, વલ્ડ હેલ્થ ઓર્ગેનાઈઝશનના ડિરેક્ટર જનરલ, આયુષ મંત્રી સહિતના આગેવાનો ઉપસ્થિત રહેશે તેમ માનવામાં આવી રહ્યું છે.. આ ભારત સહિત ગુજરાત માટે મહત્વની બાબત બની રહેશે.

પોતાના પ્રવાસના અંતિમ દિવસે એટલે કે 20મી એપ્રિલના રોજ વાડપ્રધાન સવારે 10.30 વાગ્યે ગાંધીનગરમાં મહાત્મા મંદિરમાં ત્રિ દિવસીય આયુષ સમિટને ખુલ્લો મૂકશે. અહીંથી તેઓ 3.30 વાગ્યે દાહોદ જશે અને અહીં પાણી પુરવઠા, દાહોદ સ્માર્ટ સિટી, પીએમ આવાસ યોજના, જેટકોના સબ સ્ટેશન, પંચાયતના ભવનો અને આંગણવાડી સહિતની પરિયોજનાઓનું તેમના હસ્તે ઉદ્ઘાટન કરવામાં આવશે.

બ્રિટનના વડાપ્રધાન પણ આવી રહ્યા છે ગુજરાત

નોંધનીય છે કે, વડાપ્રધાનનો કાર્યક્રમ પૂર્ણ થયા બાદ બ્રિટનના વડાપ્રધાન બોરિસ જોનસન ગુરુવારે ગુજરાતમાં આવી પહોંચવાના છે. પોતાના બે દિવસના પ્રવાસની શરુઆત ગુજરાતથી કરવાના છે જેમાં તેઓ વડોદરાથી હાલોલ પછી અમદાવાદમાં ગાંધીઆશ્રમ અને ગાંધીનગરના અક્ષરધામ મંદિરની મુલાકાત લઈ શકે છે અને તે પછી તેઓ દિલ્હી રવાના થશે અને અહીં વડાપ્રધાન મોદી સાથે રશિયા-યુક્રેન સહિતના વૈશ્વિક અને ભારત-બ્રિટના સંબંધો અંગે ચર્ચા વિચારણા થશે.

Share This :

Related Articles

Leave a Comment