રાજકારણ / લાલ કિલ્લાથી PM નરેન્દ્ર મોદીનું સંબોધન, 'ભારતે ક્યારેય કોઈ દેશ માટે ખતરો ઊભો નથી કર્યો'.

  • 22-Apr-2022 09:15 AM

ગુરુ તેગ બહાદુરના 400મા પ્રકાશ પર્વ નિમિત્તે દેશના વડાપ્રધાન નરેન્દ્ર મોદીએ લાલ કિલ્લાથી દેશના નામે સંબોધન કર્યું. પીએમ મોદીએ પોતાના સંબોધનમાં કહ્યું કે દેશ નિષ્ઠા સાથે ગુરુઓના આદર્શો પર આગળ વધી રહ્યો છે. આજે આખો દેશ એકસાથે આ પર્વ નિમિત્તે એક સંકલ્પ લઈને આગળ વધી રહ્યો છે. આપણા ગુરુઓએ જ્ઞાન અને આધ્યાત્મિકતા સાથે જ સમાજ અને સંસ્કૃતિની જવાબદારી ઉપાડી છે. ભારત ભૂમિ એક પરંપરા છે. ભારત ભૂમિ એક મહાન આત્મા છે. PM મોદી સ્વતંત્ર ભારતના એકમાત્ર એવા વડાપ્રધાન છે કે જેમણે સૂર્યાસ્ત બાદ લાલ કિલ્લા પરથી સંબોધન કર્યું છે. આ પ્રસંગે અનેક કાર્યક્રમની તૈયારી કરવામાં આવી છે.


પીએમ મોદીએ ઉલ્લેખ કર્યો કે આ પહેલા વર્ષ 2019માં અમને ગુરુનાનક દેવના 550મા પ્રકાશ પર્વ અને 2017માં ગુરુ ગોવિંદ સિંહના 350મા પ્રકાશ પર્વની ઉજવણી કરવાની તક મળી હતી. હું તેને આપણા ગુરુઓની વિશેષ કૃપા માનું છું. ભારતની ભૂમિ માત્ર એક દેશ નહીં પણ આપણી મહાન વિરાસત છે, મહાન પરંપરા છે. જે માટે આપણા ઋષિઓ, ગુરુઓએ સેંકડો-હજારો વર્ષો તપસ્યા કરી છે. તે સમયે ભારતને પોતાની ઓળખ બચાવવા માટે એક મોટી આશા ગુરુ તેગ બહાદુરજીના રૂપે દેખાઈ હતી. આ નિમિત્તે વડાપ્રધાન દ્વારા શીખ સમાજને મહત્વનો સંદેશ પણ આપવામાં આવ્યો. તેમણે એવું પણ કહ્યું કે આઝાદીના અમૃત મહોત્સવમાં આજે દેશનો પણ આ સંકલ્પ છે, આપણે આપણી ઓળખ પર ગર્વ કરવાનો છે. આપણે લૉકલ પર ગર્વ કરવાનો છે. આત્મનિર્ભર ભારતનું નિર્માણ કરવાનું છે.


સંસ્કૃતિની રક્ષા માટે ગુરુ તેગબહાદુરે બલિદાન આપ્યું હતું. ઔરંગઝેબ પણ આપણી આસ્થાને આપણાથી અલગ કરી શક્યો નહીં. ઘણી મોટી-મોટી સત્તા ખતમ થઈ ગઈ પરંતુ, ભારત આજે પણ અમર ઊભું છે. ભારત દેશ આગળ વધી રહ્યો છે. આજે ફરી એકવખત દુનિયા ભારત દેશ તરફ જોઈ રહી છે. હું અમારી સરકારનું સૌભાગ્ય માનું છું કે ગુરુઓની સેવા કરવાની આટલી તક મળી રહી છે. આપણા ગુરુઓએ માનવતાના રસ્તે આગળ વધવાની સલાહ આપી હતી. ભારતે ક્યારેય કોઈ સમાજ અથવા દેશ માટે ખતરો ઊભો નથી કર્યો. આપણે આત્મનિર્ભર ભારતની વાત કરીએ છીએ ત્યારે આખા વિશ્વની પ્રગતિનું લક્ષ્ય સામે રાખીએ છીએ.

Share This :

Related Articles

Leave a Comment