બિઝનેસ / Tarsons Products: લિસ્ટિંગ બાદ 20%ની અપર સર્કિટ, જાણો શું કહે છે નિષ્ણાતો?

  • 27-Nov-2021 08:52 AM

શુક્રવારે શેરબજારમાં 1687 પોઈન્ટનો કડાકો બોલ્યો હતો. જોકે, આ મોટા કડકા વચ્ચે ટારસન્સ પ્રોડક્ટ્સનું લિસ્ટિંગ થયું હતું. પરંતુ તેના રોકાણકારો માટે રાહતની વાત એ રહી કે માર્કેટમાં અફરાતફરી હોવા છતાં ટારસન્સ પ્રોડક્ટ્સનું લિસ્ટિંગ હકારાત્મક રહ્યું હતું. લિસ્ટિંગ ગેઈન બાદ તેમાં 20 ટકાની અપર સર્કિટ લાગી હતી. જોકે, નિષ્ણાતોનું કહેવું છે કે બજારમાં કડાકો હોવાના કારણે તેનો લિસ્ટિંગ ગેઈન અપેક્ષા પ્રમાણેનો રહ્યો નથી.

જોકે, તેના શેરમાં જોવા મળેલી રેલીથી ખ્યાલ આવે છે કે લોકોમાં આના શેર્સની ભારે ડિમાન્ડ જોવા મળી રહી છે. આ કંપનીનો આઈપીઓ 15થી 17 દરમિયાન સબસ્ક્રિપ્શન માટે ઓપન હતો અને ત્યારે જ તે 77.49 ગણો ભરાયો હતો.

મોટા ભાગના નિષ્ણાતો ટારસન્સના શેર્સને લાંબા ગાળા માટે હોલ્ડ કરવાનું કહી રહ્યા છે. કેપિટલવાયા ગ્લોબલ રીસર્ચના સિનિયર એનાલિસ્ટ લિખિતા ચેપાએ જણાવ્યું હતું કે, લાઈફ સાયન્સ સેક્ટરમાં તે ભારતની અગ્રણી સપ્લાયર કંપની છે. કંપનીની ક્વોલિટિ પ્રોડક્ટ્સ તથા તેની બ્રાન્ડ ઘણી મજબૂત છે. તેનું વેલ્યુએશન પણ ઘણું યોગ્ય છે.

તેની ઈસ્યુ પ્રાઈઝ 662 રૂપિયા પ્રતિ શેર હતી અને તે બીએસઈ પર 5.7 ટકાના ગેઈન સાથે 700 રૂપિયા પર લિસ્ટ થયો હતો. જોકે, નિષ્ણાતોએ 25-30 ટકા ઉપર લિસ્ટ થશે તેવી અપેક્ષા રાખી હતી. જ્યારે ગ્રે માર્કેટમાં પણ તેનું પ્રીમિયમ 25 ટકા બોલાઈ રહ્યું હતું. પરંતુ માર્કેટમાં કડકા વચ્ચે બાદમાં તેમાં ધીમે ધીમે વધારો થયો હતો. અંતે ઈસ્યુ પ્રાઈઝથી 20 ટકાના ઉછાળા સાથે તે 818.40 રૂપિયા પર બંધ રહ્યો હતો.


મેહતા ઈક્વિટીઝના રિસર્ચર પ્રશાંત તાપસેએ જણાવ્યું હતું કે જે રોકાણકારોને શેર એલોટ થયા છે તેમણે હોલ્ડ કરી રાખવા જોઈએ. તેમણે કહ્યું હતું કે લાંબા ગાળા માટે આ શેર ઘણો મજબૂત છે અને જેમાં ગ્રોથની વધારે તકો રહેલી હોય છે તેવા શેરને માર્કેટ હંમેશા સારું વળતર આપે છે. તેમણે કહ્યું હતું કે, અમારું માનવું છે કે ટારસન્સ પ્રોડક્ટ્સ પાસે લેબવેર પ્રોડક્ટ્સની વિવિધ શ્રેણી છે. આ ઉપરાંત આ સેક્ટરમાં તે અગ્રણી કંપની છે.

હેમ સિક્યુરિટીઝના સિનિયર રિસર્ચ એનાલિસ્ટ આસ્થા જૈને થોડો નફો બૂક કરવાની સલાહ આપી હતી અને બાકીના શેરને હોલ્ડ કરવાનું જણાવ્યું છે. તેમણે પણ કંપનીમાં ગ્રોથની ઘણી તકો રહેલી છે તેવું જણાવતા કહ્યું હતું કે, તેમની પાસે ઓટોમેટેડ મેન્યુફેક્ચરિંગ સુવિધાઓ છે જ્યારે મજબૂત સેલ્સ અને ડિસ્ટ્રિબ્યુશન નેટવર્ક હોવા ઉપરાંત અનુભવી મનેજમેન્ટ ટીમ છે.

Share This :

Related Articles

Leave a Comment