સ્પોર્ટ્સ / IPL: રાશિદ-તેવાટિયાએ ગુજરાતને અપાવ્યો દિલધડક વિજય, હૈદરાબાદને હરાવ્યું.

  • 28-Apr-2022 08:57 AM

આઈપીએલ ટી20 ક્રિકેટ ટુર્નામેન્ટની 15મી સિઝનમાં બુધવારે ગુજરાત ટાઈટન્સ અને સનરાઈઝર્સ હૈદરાબાદ વચ્ચે રમાયેલો મુકાબલો અંતિમ બોલ સુધી દિલધડક રહ્યો હતો. જોકે, આ મેચમાં ગુજરાત ટાઈટન્સે વધુ એક વખત દિલધડક વિજય નોંધાવ્યો હતો જેમાં રાશિદ ખાન અને રાહુલ તેવાટિયા વિજયના હીરો રહ્યા હતા. ગુજરાત ટાઈટન્સે મેચના અંતિમ બોલ પર વિજય નોંધાવીને સનરાઈઝર્સ હૈદરાબાદને પાંચ વિકેટે પરાજય આપ્યો હતો. આ મેચમાં પ્રથમ બેટિંગનું આમંત્રણ મળ્યા બાદ સનરાઈઝર્સ હૈદરાબાદે નિર્ધારીત 20 ઓવરમાં છ વિકેટે 195 રનનો સ્કોર કર્યો હતો. જેના જવાબમાં ગુજરાતની ટીમે ઓપનર રિદ્ધિમાન સહાની આક્રમક 68 રનની ઈનિંગ્સ તથા રાહુલ તેવાટિયા અને રાશિદ ખાનની તોફાની બેટિંગની મદદથી 20 ઓવરમાં પાંચ વિકેટે 199 રન નોંધાવીને મેચ જીતી લીધી હતી. આ વિજય સાથે ગુજરાતની ટીમ પોઈન્ટ ટેબલમાં પ્રથમ સ્થાને પહોંચી ગઈ છે. ગુજરાતે આઠ મેચમાં સાત મેચ જીતી છે અને તેના 14 પોઈન્ટ છે. હૈદરાબાદનો પરાજય થતાં ઝડપી બોલર ઉમરાન મલિકની પાંચ વિકેટ તથા અભિષેક શર્મા અને એઈડન માર્કરામની અડધી સદી એળે ગઈ હતી.

અંતિમ ઓવરનો રોમાંચ અને તેવાટિયા-રાશિદની વિસ્ફોટક બેટિંગ
અંતિમ ઓવરમાં ગુજરાત ટાઈટન્સને જીતવા માટે 22 રનની જરૂરી હતી. બેટિંગમાં રાહુલ તેવાટિયા અને રાશિદ ખાન હતા. માર્કો જેનસેને કરેલી અંતિમ ઓવરના પ્રથમ બોલ પર રાહુલ તેવાટિયાએ સિક્સર ફટકારી હતી. બીજા બોલ પર તેણે એક રન લીધો હતો. હવે સ્ટ્રાઈક પર આવ્યો હતો રાશિદ ખાન અને તેણે ત્રીજા બોલને બાઉન્ડ્રી બહાર ફટકારતા સિક્સર ફટકારી હતી. આમ હવે ગુજરાતને ત્રણ બોલમાં નવ રનની જરૂર હતી. ચોથો બોલ ખાલી ગયો હતો. હવે ટીમને બે બોલમાં નવ રનની જરૂરી હતી. જોકે રાશિદ ખાને અંતિમ બે બોલમાં બે સિક્સર ફટકારીને ગુજરાતને દિલધડક વિજય અપાવ્યો હતો. રાહુલ તેવાટિયાએ 21 બોલમાં ચાર ચોગ્ગા અને બે સિક્સરની મદદથી અણનમ 40 રન ફટકાર્યા હતા. જ્યારે રાશિદ ખાન 11 બોલમાં ચાર સિક્સરની મદદથી 31 રન નોંધાવીને નોટ આઉટ રહ્યો હતો.
 

રિદ્ધિમાન સહાની આક્રમક અડધી સદી, ગુજરાત ફરીથી ટોચ પર પહોંચ્યું
196 રનના લક્ષ્યાંકને પાર પાડવા ઉતરેલી ગુજરાતની શરૂઆત શાનદાર રહી હતી. રિદ્ધિમાન સહા અને શુભમન ગિલની જોડીએ ટીમને મજબૂત શરૂઆત અપાવી હતી. આ જોડીએ 7.4 ઓવરમાં 69 રનની ભાગીદારી નોંધાવી હતી. ગિલ 24 બોલમાં 22 રન નોંધાવીને આઉટ થયો હતો. જ્યારે રિદ્ધિમાન સહાએ તાબડતોબ બેટિંગ જારી રાખી હતી. ટીમને ટીમના વિજયમાં મહત્વની ભૂમિકા ભજવી હતી. તેણે 38 બોલમાં 11 ચોગ્ગા અને એક સિક્સરની મદદથી 68 રન ફટકાર્યા હતા. સુકાની હાર્દિક પંડ્યા 10 રન નોંધાવીને આઉટ થયો હતો જ્યારે ડેવિડ મિલરે 17 રનનું યોગદાન આપ્યું હતું. જ્યારે બાકીનું કામ રાશિદ ખાન અને રાહુલ તેવાટિયાએ પુરૂ કર્યું હતું. હૈદરાબાદ માટે ઉમરાન મલિકે પાંચ વિકેટ ઝડપી હતી.

અભિષેક શર્મા અને માર્કરામની અડધી સદી, હૈદરાબાદનો મોટો સ્કોર
ગુજરાત ટાઈટન્સે ટોસ જીતીને હૈદરાબાદને પ્રથમ બેટિંગનું આમંત્રણ આપ્યું હતું. હૈદરાબાદની શરૂઆત ખરાબ રહી હતી પરંતુ ઓપનર અભિષેક શર્મા અને એઈડન માર્કરામની આક્રમક અડધી સદીની ઈનિંગ્સ આકર્ષણનું કેન્દ્ર રહી હતી. હૈદરાબાદે 20 ઓવરમાં છ વિકેટે 195 રનનો સ્કોર કર્યો હતો. ટીમે 26 રનના સ્કોર પર સુકાની ઓપનર કેન વિલિયમ્સનની વિકેટ ગુમાવી દીધી હતી. તેણે પાંચ રન નોંધાવ્યા હતા. જ્યારે રાહુલ ત્રિપાઠી 16 રન નોંધાવીને આઉટ થયો હતો. જોકે, બાદમાં અભિષેક અને માર્કરામે બાજી સંભાળી હતી.
 

આ જોડીએ 96 રનની ભાગીદારી નોંધાવીને ટીમના સ્કોરને મોટો બનાવવામાં મહત્વનું યોગદાન આપ્યું હતું. અભિષેક શર્માએ 42 બોલમાં 65 રન ફટકાર્યા હતા જેમાં છ ચોગ્ગા અને ત્રણ સિક્સર સામેલ હતી. જ્યારે માર્કરામે 40 બોલમાં બે ચોગ્ગા અને ત્રણ સિક્સરની મદદથી 56 રનની ઈનિંગ્સ રમી હતી. અંતિમ ઓવર્સમાં શશાંક સિંહે તોફાની બેટિં કરી હતી અને છ બોલમાં અણનમ 25 રન ફટકારી દીધા હતા જેમાં એક ચોગ્ગો અને ત્રણ સિક્સર સામેલ હતી. ગુજરાત ટાઈટન્સ માટે મોહમ્મદ શમીએ ત્રણ વિકેટ ઝડપી હતી જ્યારે યશ દયાલ અને અલઝારી જોસેફને એક-એક સફળતા મળી હતી.

Share This :

Related Articles

Leave a Comment