વર્લ્ડ / રશિયા-યુક્રેન યુદ્ધ વચ્ચે પીએમ મોદીનો યુરોપ પ્રવાસ, આ મુલાકાતનું છે ઘણું મહત્વ.

  • 02-May-2022 08:42 AM

વડાપ્રધાન નરેન્દ્ર મોદી (PM Narendra Modi) એવા સમયે યુરોપ પ્રવાસે જઈ રહ્યા છે, જ્યારે યુક્રેન પર આક્રમણને પગલે રશિયાની વિરુદ્ધ મોટાભાગના યુરોપીયન દેશો એકજૂથ છે. આ વર્ષે પીએમ મોદીનો આ પહેલો વિદેશ પ્રવાસ છે. યુક્રેન-રશિયા યુદ્ધ પર ભારતનું સ્ટેન્ડ અત્યાર સુધી ન્યૂટ્રલ રહ્યું છે, જ્યારે કે રશિયાની વિરુદ્ધ અત્યાર સુધી એકપણ વખત વોટિંગ નથી કર્યું. વડાપ્રધાન મોદીનો યુરોપ પ્રવાસ એવા સમયે થઈ રહ્યો છે, જ્યારે આ ક્ષેત્રને ઘણા પડકારોનો સામનો કરવો પડી રહ્યો છે. તેનો ઉલ્લેખ પીએમ મોદીએ પોતે કર્યો છે. જર્મની, ડેનમાર્ક અને ફ્રાંસના પ્રવાસ પહેલા તેમણે કહ્યું કે, તેમનો યુરોપ પ્રવાસ એવા સમયે થઈ રહ્યો છે, જ્યારે આ ક્ષેત્ર ઘણા પડકારોનો સામનો કરી રહ્યું છે. તેમણે કહ્યું કે, તે ભારતના યુરોપીયન સાથીદારો સાથે સહયોગની ભાવનાને મજબૂત કરવા ઈચ્છે છે. વિદેશ નીતિની દ્રષ્ટિએ પણ પીએમ મોદીનો આ પ્રવાસ ઘણો મહત્વનો છે.

પીએમ મોદી 2 મેથી જર્મની, ડેનમાર્ક અને ફ્રાંસના ત્રણ દિવસના પ્રવાસ પર જશે. આ દરમિયાન તેઓ આ દેશોમાં લગભગ 65 કલાક રહેશે અને 25થી વધુ કાર્યક્રમોમાં ભાગ લેશે. તેઓ જર્મન ચાન્સેલર ઓલાફ શોલ્ઝના આમંત્રણ પર 2 મેએ બર્લિનનો પ્રવાસ કરશે અને તે પછી તેઓ 3-4 મેએ ડેનમાર્કના પોતાના સમકક્ષ મેટે ફ્રેડરિક્સનના આમંત્રણ પર દ્વિપક્ષીય વાતચીતમાં સામેલ થવા માટે કોપનહેગનનો પ્રવાસ કરશે અને દ્વિતીય ભારત-નોર્ડિક શિખર સંમેલનમાં ભાગ લશે. પોતાના પ્રવાસના છેલ્લા તબક્કામાં તેઓ થોડા સમય માટે ફ્રાંસમાં રોકાશે, જ્યાં મોદી ફ્રાન્સના પ્રેસિડન્ટ ઈમેન્યુઅલ મેક્રોં સાથે મુલાકાત કરશે.

પ્રવાસના પહેલા તબક્કામાં પીએમ મોદી બર્લિનમાં જર્મન ચાન્સેલર ઓલાફ શોલ્ઝની સાથે વાતચીત કરશે. આ બેઠકમાં બંને દેશોના ઘણા મંત્રી પણ સામેલ થશે. ગત વર્ષે ડિસેમ્બરમાં સત્તામાં આવેલા શોલ્ઝની સાથે મોદીની આ પહેલી બેઠક હશે. આ પ્રવાસ દરમિયાન વડાપ્રધાન મોદી અને ચાન્સેલર શોલ્ઝ બિઝનેસ સંમેલનને પણ સંયુક્ત રીતે સંબોધિત કરશે. મોદી જર્મનીમાં ભારતીય સમુદાયની સાથે પણ સંવાદ કરશે.

પીએમ મોદી પ્રવાસના બીજા તબક્કામાં ડેનમાર્કના વડાપ્રધાન મેટે ફ્રેડરિક્સનના આમંત્રણ પર કોપનહેગન જશે, જ્યાંથી બીજા ભારત-નોર્ડિક સંમેલનમાં ભાગીદારી કરશે. ડેનમાર્કમાં વડાપ્રધાન મોદી પોતાના સમકક્ષ મેટે ફ્રેડરિક્સનની સાથે ચર્ચા કરશે. તે ઉપરાંત બંને નેતા દ્વિપક્ષીય સંબંધ તેમજ બીજા મુદ્દા પર પણ ચર્ચા કરશે.

પીએમ મોદી ભારત ડેનમાર્ક બિઝનેસ લીડર્સ સાથે બેઠકમાં ભાગ લેશે અને ભારતીય સમુદાયના લોકો સાથે પણ સંવાદ કરશે. છેલ્લા તબક્કામાં વડાપ્રધાન થોડા સમય માટે પેરિસમાં રોકાઈને ફ્રાંસના પ્રેસિડન્ટ ઈમેન્યુઅલ મેક્રોં સાથે મુલાકાત કરશે.

Share This :

Related Articles

Leave a Comment