ગુજરાત / છેડતીનો વિરોધ કરતાં યુવકે 25 વર્ષીય યુવતીને ચાલુ ટ્રેનમાંથી નીચે ફેંકી દીધી.

  • 02-May-2022 09:54 AM

મધ્ય પ્રદેશના છતરપુર જિલ્લાના ખજુરાહો નજીક 25 વર્ષીય એક યુવતીને ચાલુ ટ્રેનમાંથી નીચે ફેંકી દેવાની ચોંકાવનારી ઘટના સામે આવી છે. ન્યૂઝ એજન્સીના રિપોર્ટ અનુસાર યુવક ચાલતી ટ્રેનમાં યુવતીની છેડતી કરી રહ્યો હતો, યુવતીએ જ્યારે છેડતીનો વિરોધ કર્યો તો, રોષે ભરાયેલાં યુવકે યુવતીને ચાલુ ટ્રેનમાંથી નીચે ફેંકી દીધી હતી. આ ઘટના બુધવારની રાતની હોવાનું જણાવવામાં આવી રહ્યું છે. ઘટના બાદ ઈજાગ્રસ્ત થયેલી યુવતીને સારવાર અર્થે હોસ્પિટલ ખસેડવામાં આવી હતી, જ્યાં તેની સારવાર ચાલી રહી છે.

જબલપુરના ગવર્મેન્ટ રેલવે પોલીસના એસપી વિનાયક શર્માએ ન્યૂઝ એજન્સી સાથેની વાતચીતમાં જણાવ્યું હતું કે, યુવક મહિલાની સાથે ટ્રેનમાં મુસાફરી કરી રહ્યો હતો. અને યુવતીને જોઈ યુવકે તેની છેડતી શરૂ કરી દીધી હતી. જો કે, યુવતીએ છેડતીનો વિરોધ કર્યો તો, યુવકે તેને ચાલતી ટ્રેનમાંથી નીચે ફેંકી દીધી હતી. આ ઘટના 27 એપ્રિલના રાતની છે. તેઓએ વધુમાં જણાવ્યું કે, પેસેન્જર ટ્રેન મધ્ય પ્રદેશના ખજુરાહોથી ઉત્તર પ્રદેશના મહોબા ખાતે જતી હતી. આરોપીની ઓળખ થઈ ગઈ છે અને અમે તેને ટૂંક સમયમાં ઝડપી પાડીશું તેમ પણ એસપી વર્માએ જણાવ્યું હતું.

પીડિત યુવતી ઉત્તર પ્રદેશના બાંદા જિલ્લાની રહેવાસી છે. મધ્ય પ્રદેશના છતરપુર જિલ્લામાં આવેલાં બાગેશ્વર ધામ મંદિરમાં દર્શન કરીને તે ટ્રેનમાં ઘરે પરત ફરી રહી હતી, ત્યારે આ ઘટના બની હતી. પોલીસ અધિકારીએ જણાવ્યું કે, ઘટના બાદ ખજુરાહો પોલીસ સ્ટેશનમાં ઝીરો FIR દાખલ કરવામાં આવી હતી અને બાદમાં તેને કાર્યવાહી માટે જીઆરપીને ટ્રાન્સફર કરી દેવામાં આવી હતી.

છતરપુરમાં સારવાર રહેલી યુવતીએ આ મામલે કહ્યું કે, આ ઘટના ખજુરાહોના રાજનગર ટાઉન નજીકની છે. હું બાગેશ્વર ધામ મંદિરે આવી હતી. સાથી મુસાફરે મારી છેડતી શરૂ કરી દીધી હતી. મેં તેના પ્રયાસોનો વિરોધ કર્યો હતો અને મારાથી દૂર રહેવા તેને કહ્યું હતું. મેં તેના હાથ પર બચકું પણ ભરી દીધું હતું. 30 વર્ષની ઉંમરના એ યુવકે રાજનગર નજીક મને ચાલતી ટ્રેનમાંથી ફેંકી દીધી હતી. યુવતીએ જણાવ્યું હતું કે, છેલ્લા નવ મહિનાથી તે નિયમિત બાગેશ્વર ધામ મંદિરના દર્શને આવી રહી છે.
 

Share This :

Related Articles

Leave a Comment