બોલીવુડ / 9 ડિસેમ્બરે ફેરા ફરશે વિકી અને કેટરિના, લગ્નનું મેન્યૂ નક્કી કરવા હોટેલમાં બંધ બારણે યોજાઈ મીટિંગ!

  • 28-Nov-2021 09:20 AM

બોલિવુડના સ્ટાર કપલ વિકી કૌશલ અને કેટરિના કૈફના લગ્નની ચર્ચા છેલ્લા થોડા દિવસોથી ચાલી રહી છે. વિકી અને કેટરિના ડિસેમ્બર મહિનાની શરૂઆતમાં લગ્નના બંધનમાં બંધાઈ જશે. પહેલા માહિતી સામે આવી હતી કે, વિકી અને કેટરિનાના લગ્ન પ્રસંગો 7થી9 ડિસેમ્બર વચ્ચે યોજાશે. હવે લેટેસ્ટ રિપોર્ટનું માનીએ તો, વિકી અને કેટરિના 9 ડિસેમ્બરે સાત ફેરા લેવાના છે.

9 ડિસેમ્બરે હિંદુ વિધિથી લગ્ન કરશે કપલ

પિંકવિલાના અહેવાલ પ્રમાણે, કેટરિના કૈફની નજીકના એક સૂત્રએ જણાવ્યું છે કે, લવબર્ડ્સ 9 ડિસેમ્બરે લગ્ન કરશે. 9 ડિસેમ્બરની સાંજે હિંદુ વિધિથી કેટરિના અને વિકી પરણી જશે. 7 અને 8 ડિસેમ્બરે કપલની સંગીત અને મહેંદી સેરેમની યોજાશે. લગ્ન અને પ્રી-વેડિંગ ફંક્શન રાજસ્થાનના સવાઈ માધોપુરમાં આવેલા રિસોર્ટ સિક્સ સેન્સિસ ફોર્ટ બરવાડામાં થશે.

હોટેલમાં યોજાઈ સિક્રેટ મીટિંગ

સામે આવેલી વિગતો પ્રમાણે, વિકી અને કેટરિનાની ટીમ મહેમાનો માટે એર ટિકિટ અને તેમના ઉતારાની વ્યવસ્થા કરી રહી છે. અંદાજે 200 મહેમાનોને આમંત્રિત કરવામાં આવ્યા છે. કપલના લગ્નની તૈયારીઓ પૂરજોશમાં ચાલી રહી છે. મીડિયા રિપોર્ટનું માનીએ તો, શુક્રવારે સવારે સાડા નવ વાગ્યે હોટેલમાં અલગ-અલગ ઈવેન્ટ કંપનીઓની સિક્રેટ મીટિંગ થઈ હતી. આ મીટિંગ વિકી અને કેટરિનાની ટીમ સાથે થઈ હતી. મીટિંગ શરૂ થયા બાદ રોજ હોટેલમાં શાક અને બાકી સામાન લઈને આવતાં લોકો માટે એન્ટ્રી બંધ કરાઈ હતી.

 



એક-બે દિવસમાં નક્કી થઈ જશે મેન્યૂ

બરવાડામાં આવેલા 700 વર્ષ જૂના કિલ્લામાં બનેલી હોટેલમાં બુકિંગ કન્ફર્મ થયા બાદ લગ્નની તૈયારીઓ શરૂ થઈ હતી. ગુરુવારે રાત્રે ડેકોરેશન ટીમે હોટેલમાં આતશબાજી અને અન્ય બાબતોનું રિહર્સલ કર્યું હતું. આ સાથે જ કયો કાર્યક્રમ કઈ જગ્યાએ થશે તેની અંતિમ રૂપરેખા નક્કી કરવામાં આવી રહી છે. ખાવાપીવાની અને બાકીની વસ્તુઓ નક્કી કરવા માટે હોટેલ સિક્સ સેન્સમાં શુક્રવારે સિક્રેટ મીટિંગ યોજાઈ હતી. મીટિંગમાં મુંબઈથી આવેલા 7 લોકોની ટીમ પણ સામેલ હતી. મીડિયા રિપોર્ટ મુજબ, કઈ ડિશ કેવી રીતે પીરસવાની છે તેની તૈયારીઓ કરવામાં આવી હતી. નાના-નાના સ્ટોલ પણ લગાવાયા હતા. એક-બે દિવસમાં વિકી-કેટરિનાના લગ્નનું મેન્યૂ નક્કી થઈ જશે. આ સાથે જ સુરક્ષા અંગેની તૈયારી પહેલા જ કરી દેવાઈ છે.

વિદેશી ફોટોગ્રાફર સામેલ થશે

વિકી અને કેટરિનાના લગ્નમાં તેમના અંગત પરિજનો અને મિત્રો ઉપરાંત બોલિવુડ સેલેબ્સ સામેલ થશે. જોકે, તેમના લગ્નમાં માત્ર ભારતમાંથી જ નહીં વિદેશથી પણ મહેમાનો આવવાના છે. મીડિયા રિપોર્ટ પ્રમાણે, વિકી-કેટરિનાના લગ્નમાં ઈન્ટરનેશનલ ફોટોગ્રાફર મારિયો ટેસ્ટિનોને આમંત્રણ આપવામાં આવ્યું છે. મારિયો પાસે કેટરિના કૈફે 2017માં ફોટોશૂટ કરાવ્યું હતું. કેટરિનાએ ટોવેલ બેસ્ડ ફોટોશૂટ મારિયો પાસે કરાવ્યું હતું અને તેની સાથે કામ કરવાનો એક્ટ્રેસનો અનુભવ સારો રહ્યો હતો.

સંગીતમાં પર્ફોર્મ કરશે આ સેલેબ્સ?

વિકી અને કેટરિનાના લગ્નમાં કરણ જોહર, કબીર ખાન, વરુણ ધવન-નતાશા દલાલ, કબીર ખાન-મિનિ માથુર, સલમાન ખાન અને તેનો પરિવાર, સિદ્ધાર્થ મલ્હોત્રા, કિયારા અડવાણી વગેરે જેવા સેલેબ્સને આમંત્રણ અપાયું હોવાની ચર્ચા છે. ત્યારે મીડિયા રિપોર્ટ મુજબ, વરુણ-નતાશા, કિયારા-સિદ્ધાર્થ, અલી અબ્બાઝ ઝફર અને તેની પત્ની અલિસિયા વિકી-કેટરિનાના સંગીતમાં પર્ફોર્મન્સ આપશે તેવી ચર્ચા છે.

વિકી અને કેટરિનાના લગ્ન અને તેની તૈયારી અંગે અનેક અહેવાલો સામે આવી રહ્યા છે. દિવાળીના દિવસે તેમણે ડાયરેક્ટર કબીર ખાનના ઘરે સગાઈ કરી હોવાના અહેવાલ પણ છે. જોકે, લગ્નના આડે ગણતરીના દિવસો બાકી હોવા છતાં કપલે હજી સુધી આ અંગેની ઓફિશિયલ જાહેરાત કરી નથી.

Share This :

Related Articles

Leave a Comment