બોલીવુડ / આર્યન ખાનને જિંદગીના પાઠ ભણાવશે લાઈફ કોચ અરફીન ખાન, હૃતિક પણ લઈ ચૂક્યો છે મદદ.

  • 28-Nov-2021 09:24 AM

ગત મહિને વિવાદિત ક્રૂઝ ડ્રગ્સ કેસ ખૂબ ચર્ચામાં રહ્યો હતો. શાહરૂખ ખાનના દીકરા આર્યન ખાનની આ કેસમાં ધરપકડ થઈ હતી અને 23 દિવસ જેલમાં વિતાવ્યા બાદ તે જામીન પર મુક્ત થયો હતો. હાલ આર્યન પોતાના પરિવાર સાથે સમય વિતાવી રહ્યો છે. હવે માહિતી પ્રાપ્ત થઈ છે કે, આર્યન ખાન બોલિવુડના જાણીતા લાઈફ કોચ અરફીન ખાન પાસેથી જિંદગીના પાઠ ભણશે. અમારા સહયોગી ઈટાઈમ્સને સૂત્રો પાસેથી આ માહિતી પ્રાપ્ત થઈ છે.

સમગ્ર ડ્રગ્સ કાંડ બાદ શાહરૂખ ખાને દીકરાને જીવનના અગત્યના પાઠ ભણાવા માટે લાઈફ કોચની મદદ લેવાનું નક્કી કર્યું છે. જેલમાં 23 દિવસ વિતાવાના કારણે આર્યન ખાનને ઊંડો આઘાત લાગ્યો છે અને આ ખરાબ અનુભવમાંથી તેને બહાર કાઢવા માટે શાહરૂખ-ગૌરીએ અરફીન ખાનની મદદ લેવાનો નિર્ણય કર્યો છે.

જણાવી દઈએ કે, લાઈફ કોચ અરફીન ખાને એક્ટર હૃતિક રોશન સાથે કામ કરવાનું શરૂ કર્યું ત્યારે તે ચર્ચામાં આવ્યા હતા. મીડિયા રિપોર્ટ પ્રમાણે, સુઝૈન સાથે ડિવોર્સ થયા ત્યારે હૃતિક રોશને અરફીન ખાનની મદદ લીધી હતી. સુઝૈન સાથે ડિવોર્સ બાદ હૃતિક પોતાની જિંદગી અને કરિયર પર ધ્યાન કેંદ્રિત કરી શકે તે માટે અરફીન ખાનની મદદ લીધી હતી.

દરમિયાન, આર્યન ખાનની વાત કરીએ તો, 2 ઓક્ટોબરે નાર્કોટિક્સ કંટ્રોલ બ્યૂરોએ મુંબઈથી ગોવા જતી ક્રૂઝ પર કથિત રેવ પાર્ટી ચાલતી હોવાથી દરોડા પાડ્યા હતા. આ મામલે શાહરૂખના દીકરા સહિત આઠ શખ્સોની 3 ઓક્ટોબરે ધરપકડ કરવામાં આવી હતી. બેવાર આર્યન ખાનના જામીન નામંજૂર થયા બાદ 28 ઓક્ટોબરે બોમ્બે હાઈકોર્ટ આર્યન ખાનના જામીન મંજૂર કર્યા હતા. 23 દિવસ સુધી મુંબઈની આર્થર રોડ જેલમાં બંધ રહ્યા બાદ 30 ઓક્ટોબરે આર્યન પોતાના ઘરે પહોંચ્યો હતો. જામીનની શરતો પ્રમાણે, આર્યન ખાનના દર શુક્રવારે નાર્કોટિક્સ કંટ્રોલ બ્યૂરોની ઓફિસે હાજરી પુરાવા આવવાનું હોય છે.

થોડા દિવસ પહેલા જ બોમ્બે હાઈકોર્ટે આર્યન ખાનનો વિસ્તૃત જામીન ઓર્ડર આપ્યો હતો. જેમાં આર્યનની વોટ્સએપ ચેટમાં કશું વાંધાજનક ના હોવાનો અને નાર્કોટિક્સ કંટ્રોલ બ્યૂરોના આરોપ મુજબ ષડયંત્ર રચ્યું હોવાના કોઈ પુરાવા ના મળ્યા હોવાનો ઉલ્લેખ છે. જણાવી દઈએ કે, બોમ્બે હાઈકોર્ટે આર્યન ઉપરાંત તેના મિત્ર અરબાઝ મર્ચન્ટ અને મોડલ મુનમુન ધામેચાના પણ જામીન મંજૂર કર્યા હતા.

Share This :

Related Articles

Leave a Comment