વર્લ્ડ / ચાલુ ચાર્જિંગમાં ગેમ રમતો હતો કિશોર, ફોન ફાટતાં આંગળીઓના ટેરવા ઉડી ગયા

  • 28-Nov-2021 11:08 AM

 બાલાસિનોર તાલુકાના વસાદરા ગ્રામપંચાયતમાં આવેલા ભમરીયામાં એક એવી ઘટના બની છે જેના પરથી તમામ બાળકો અને તેમના વાલીઓએ સબક લેવો જોઈએ. ઘણીવાર એવી ઘટના બનતી હોય છે કે ચાલુ ચાર્જિંગમાં ફોન પર વાત કરતા હોવાને કારણે અથવા ચાર્જિંગમાં ફોન મુકીને સુઈ ગયા હોવાને કારણે ફોનમાં બ્લાસ્ટ થતો હોય છે. અહીં પણ 14 વર્ષના કિશોર સાથે આ જ પ્રકારની દુર્ઘટના બની છે. કિશોરનો ફોન ચાર્જ થઈ રહ્યો હતો અને ડાબા હાથમાં ફોન મૂકીને તે ગેમ રમતો હતો. ફોનમાં બ્લાસ્ટ થતા તેના ડાબા હાથની પાંચે આંગળીઓના ટેરવા ઈજાગ્રસ્ત થયા હતા.

ભારે ઈજાને કારણે કિશોરને તાત્કાલિકત બાયડ ખાતે આવેલી ઓર્થોપેડિક હોસ્પિટલમાં ખસેડવામાં આવ્યો હતો. હોસ્પિટલમાં હાજર તબીબોએ તાત્કાલિકત ઓપરેશન કર્યુ હતું, પરંતુ કિશોરની પાંચેય આંગળીઓના ટેરવાને કાયમી નુકસાન થયું છે. શક્ય છે હવે તે આજીવન આ ટેરવાનો ઉપયોગ નહીં કરી શકે. પ્રાપ્ત જાણકારી અનુસાર કિશોરનું નામ પરમાર અજયકુમાર સરદારભાઈ છે. તેના પિતા પરમાર સરદારભાઈ સોમાભાઈ ગરીબ પરિવારથી આવે છે. કિશોર અજયકુમાર નાની ઉંમરથી સાંભળી નથી શકતો. તે ગોધરા ખાતે આવેલી મૂકબધિર હોસ્ટેલમાં રહીને અભ્યાસ કરે છે.

દીકરામાં કુદરતી ખોટ હોવાને કારણે માતા-પિતા હંમેશા ચિંતામાં રહેતા હતા. તેઓ શક્ય હોય તેટલી દીકરાની ઈચ્છાઓ પૂરી કરીને તેને ખુશ રાખવાનો પ્રયત્ન કરતા હતા. હવે પોતાના લાડલા દીકરા સાથે આવી દુર્ઘટના થતા માતા-પિતા અત્યંત ચિંતાતૂર બની ગયા છે. અજયકુમારના ડાબા હાથની પાંચે આંગળીઓના ટેરવાઓના છુંદેછુંદા નીકળી ગયા છે. ઓર્થોપેડિક હોસ્પિટલમાં તેની તાત્કાલિક સારવાર કરવામાં આવી. તબીબોએ ઓપરેશન કર્યુ પરંતુ તેમના જણાવ્યા અનુસાર આંગળીઓને કાયમી નુકસાન થયું છે.


બાયડની જે હોસ્પિટલમાં સર્જરી કરવામાં આવી ત્યાંના ડોક્ટરે જણાવ્યું કે, પડવાથી, વાગવાથી કે ફ્રેક્ચર થવાથી આ પ્રકારની ઈજા શક્ય નથી. આ ચોક્કસપણે બ્લાસ્ટને કારણે જ થઈ છે. બળવાને કારણે હથેળીની ચામડીને પણ નુકસાન થયું છે. અત્યારે તો કિશોરને રજા આપવામાં આવી છે.

Share This :

Related Articles

Leave a Comment