ગુજરાત / સુરતીઓ સાવધાન! કોરોનાએ ફરીથી માથું ઊંચક્યું, બે અપાર્ટમેન્ટ સીલ કરવામાં આવ્યા.

  • 30-Sep-2021 11:11 AM

કોરોનાના કેસની સંખ્યામાં વધારો નોંધાયા પછી સુરત શહેરના બે રહેણાંક અપાર્ટમેન્ટને સુરત મ્યુનિસિપલ કોર્પોરેશનના આરોગ્ય વિભાગ દ્વારા કન્ટેઈનમેન્ટ ઝોન તરીકે જાહેર કરવામાં આવ્યા છે. આ બે અપાર્ટમેન્ટમાં કોરોનાના પોઝિટિવ કેસ સામે આવ્યા છે. આ સિવાય રવિવારના રોજ પણ સુરત મ્યુનિસિપલ કોર્પોરેશન દ્વારા બે અપાર્ટમેન્ટને કન્ટેઈનમેન્ટ ઝોન તરીકે જાહેર કરવામાં આવ્યા હતા.

શહેરના પિપલોડ વિસ્તારમાં સ્થિત આવિષ્કાર રેસિડેન્સી અને શુકન રેસિડન્સીને સોમવારના રોજ કન્ટેઈનમેન્ટ ઝોન તરીકે જાહેર કરવામાં આવ્યા છે. પાછલા દસ દિવસમાં આવિષ્કાર રેસિડેન્સીના બી ટાવરમાં રહેતા કુલ 12 લોકોનો કોરોના રિપોર્ટ પોઝિટિવ આવ્યો છે. 12 પોઝિટિવ કેસમાંથી ચાર કેસ 14થી 18 વર્ષની ઉંમર ધરાવતા લોકોના છે. બાકીના આઠ કેસની વાત કરીએ તો, તેમાંથી સાત લોકોએ રસીના બન્ને ડોઝ લીધા છે, જ્યારે એક દર્દીએ હજી એક જ ડોઝ લીધો છે.

સુરત મ્યુનિસિપલ કોર્પોરેશનના એક આરોગ્ય અધિકારીએ જણાવ્યું કે, તમામ પોઝિટિવ દર્દીઓને હોમ આઈસોલેશનમાં રાખવામાં આવ્યા છે. અને તેમના લક્ષણો પણ સામાન્ય છે. પોઝિટિલ દર્દીઓમાંથી કોઈ વધારે બીમાર નથી. આમ તો એક જ ટાવરમાંથી કેસ નોંધાયા છે, પરંતુ સાવચેતીના ભાગ રુપે બન્ને ટાવરને સીલ કરવામાં આવ્યા છે. ટાવર એમાં હજી એક પણ કેસ નોંધાયો નથી. અપાર્ટમેન્ટના રહેવાસીઓ નિયમોનું પાલન કરે તે સુનિશ્ચિત કરવા માટે આરોગ્ય ખાતાના અધિકારીઓ અને સિક્યોરિટી માર્શલની ટીમ બિલ્ડિંગ પાસે તૈનાત કરવામાં આવી છે.

ઉલ્લેખનીય છે કે બી ટાવરના 22 ફ્લેટમાંથી 19 ફ્લેટમાં લોકો રહે છે અને કુલ મળીને ફ્લેટમાં 79 લોકો વસવાટ કરે છે. બાજુના ટાવરમાં 20 ફ્લેટમાં લોકો રહે છે અને કુલ સંખ્યા 56 છે. શુકન રેસિડન્સીની વાત કરીએ તો, સોમવારથી અત્યાર સુધી કુલ બે પોઝિટિવ કેસ સામે આવ્યા છે. અપાર્ટમેન્ટના 46 ફ્લેટમાં કુલ 185 લોકો વસવાટ કરે છે. આ તમામ લોકોને ક્વોરન્ટાઈન કરવામાં આવ્યા છે.


આગામી દસ દિવસ સુધી આ બન્ને અપાર્ટમેન્ટને સીલ કરવામાં આવ્યા છે. જો આવનારા દિવસમાં કેસની સંખ્યા વધશે તો નિયંત્રણોને લંબાવવામાં આવશે. અપાર્ટમેન્ટ પર હાજર આરોગ્ય વિભાગની ટીમ સમયાંતરે ફ્લેટના રહેવાસીઓનું કોરોના ટેસ્ટિંગ કરતા રહેશે. ઉલ્લેખનીય છે કે આ પહેલા રવિવારના રોજ સુરતના સુમેરુ સિલ્વરલીફ અને મેઘ મયુર અપાર્ટમેન્ટને સીલ કરવામાં આવ્યા હતા. અહીં પણ કોરોનાના ઘણાં કેસ સામે આવ્યા હતા. લગભગ દોઢ મહિના પછી આરોગ્ય વિભાગ દ્વારા આખા અપાર્ટમેન્ટને ક્લસ્ટર એરિયા તરીકે જાહેર કરવાની શરુઆત કરી છે.

Share This :

Related Articles

Leave a Comment