સ્પોર્ટ્સ / IPL-2022: ધોની, કોહલી, રોહિત અને બુમરાહને કરવામાં આવ્યા રિટેન.

  • 01-Dec-2021 08:46 AM

ઈન્ડિયન પ્રીમિયર લીગ (આઈપીએલ)માં આઠ ફ્રેન્ચાઈઝીઓ દ્વારા આગામી વર્ષે રમાનારી ટુર્નામેન્ટ માટે રિટેન કરેલા ખેલાડીઓની યાદી જાહેર કરી દીધી છે. આઈપીએલ-2022માં બે નવી ટીમો સામેલ થશે જેના કારણે કુલ ટીમની સંખ્યા 10 થઈ જશે. આ બંને ટીમોના આગમનના કારણે ખેલાડીઓનું મેગા ઓક્શન થશે. આ ઓક્શન પહેલા તમામ આઠ ટીમોએ તેના રિટેન ખેલાડીઓ જાહેર કરવા માટે મંગળવાર અંતિમ દિવસ હતો. ફ્રેન્ચાઈઝીઓએ રિટેન કરેલા ખેલાડીઓની યાદી જાહેર કરી છે. જાણો કઈ ટીમે કયા ખેલાડીને રિટેન કર્યા છે.

ચેન્નઈ સુપર કિંગ્સ
ચેન્નઈ સુપર કિંગ્સે એક ખેલાડીને બાદ કરતા બાકીના ત્રણ ખેલાડીની રિટેન કર્યા છે જે અપેક્ષિત હતા. જેમાં સુકાની મહેન્દ્ર સિંહ ધોની, ઓલ-રાઉન્ડર રવીન્દ્ર જાડેજા તથા યુવાન ઓપનર ઋતુરાજ ગાયકવાડ સામેલ છે. આ ત્રણેય ખેલાડીઓને રિટેન કરવામાં આવશે તેવું નક્કી જ માનવામાં આવતું હતું. જોકે ચેન્નઈએ ઈંગ્લિશ ઓલરાઉન્ડર મોઈન અલીને રિટેન કરીને સમર્થકોને આશ્ચર્યમાં મૂક્યા છે. ચેન્નઈને જાડેજાને રિટેન કરવા માટે 16 કરોડ, ધોની માટે 12 કરોડ, મોઈન અલી માટે 8 કરોડ અને ગાયકવાડ માટે 6 કરોડ રૂપિયા ખર્ચ કરવા પડશે.

મુંબઈ ઈન્ડિયન્સ
મુંબઈ ઈન્ડિયન્સે કોઈ આશ્ચર્યજનક નામ જાહેર કર્યું નથી. મુંબઈએ સુકાની રોહિત શર્મા (16 કરોડ), ઝડપી બોલર જસપ્રિત બુમરાહ (12 કરોડ), સૂર્યકુમાર યાદવ (8 કરોડ) અને કેઈરોન પોલાર્ડ (6 કરોડ)ને રિટેન કર્યા છે. આ ચારેય નામો અપેક્ષિત હતા. અગાઉ અટકળો હતી તે પ્રમાણે ઓલ-રાઉન્ડર હાર્દિક પંડ્યાને રિટેન કરવામાં આવ્યો નથી. જ્યારે ઈશાન કિશનને પણ તક મળી નથી.


રોયલ ચેલેન્જર્સ બેંગલોર
રોયલ ચેલેન્જર્સ બેંગલોરે ત્રણ ખેલાડીઓ રિટેન કર્યા છે. જેમાં વિરાટ કોહલી (15 કરોડ) ગ્લેન મેક્સવેલ (11 કરોડ) અને મોહમ્મદ સિરાજ (7 કરોડ)નો સમાવેશ થાય છે. બેંગલોરના સ્ટાર બેટર એબી ડી વિલિયર્સે તાજેતરમાં જ ક્રિકેટમાંથી સંન્યાસ લેવાની જાહેરાત કરી હતી. ડી વિલિયર્સને રિટેન કરવામાં આવ્યો હોત પરંતુ હવે તેને નિવત્તિ લઈ લીધી છે.

પંજાબ કિંગ્સ
પંજાબ કિંગ્સ ફક્ત બે જ ખેલાડીઓને રિટેન કર્યા છે. પંજાબ કિંગ્સે મયંક અગ્રવાલ (12 કરોડ) અને અર્શદીપ સિંહ (4 કરોડ)ને રિટેન કર્યા છે. પંજાબે સુકાની અને શાનદાર બેટર લોકેશ રાહુલને રિટેન કર્યો નથી.

સનરાઈઝર્સ હૈદરાબાદ
સનરાઈઝર્સ હૈદરાબાદ સુકાની કેન વિલિયમ્સન (14 કરોડ), અબ્દુલ સમદ (4 કરોડ) અને ઉમરાન મલિક (4 કરોડ)ને રિટેન કર્યા છે. સૌથી મોટી વાત એ છે કે હૈદરાબાદે ટીમના સ્ટાર સ્પિનર અફઘાનિસ્તાનના રાશિદ ખાનને રિટેન કર્યો નથી. હૈદરાબાદની સફળતામાં રાશિદ ખાનની ભૂમિકા ઘણી મહત્વની રહી છે. જોકે, ટીમે તેને રિટેન કર્યો નથી.


દિલ્હી કેપિટલ્સ
દિલ્હી કેપિટલ્સે રિશભ પંત (16 કરોડ), અક્ષર પટેલ (9 કરોડ), પૃથ્વી શો (7.50 કરોડ) અને એનરિચ નોર્ટજે (6.50 કરોડ)ને રિટેન કર્યા છે. દિલ્હીની ટીમ છેલ્લી બે સિઝનમાં શાનદાર પ્રદર્શન કરી રહી છે. રિશભ પંતની આગેવાનીમાં દિલ્હીની ટીમ આ વર્ષની સિઝનમાં નોકઆઉટમાં પહોંચી હતી. જ્યારે અક્ષર પટેલ ઘણું શાનદાર પ્રદર્શન કરી રહ્યો છે. તેથી તેને ટીમમાં જાળવી રાખવામાં આવ્યો છે.

કોલકાતા નાઈટ રાઈડર્સ
કોલકાતા નાઈટ રાઈડર્સે ચાર ખેલાડી રિટેન કર્યા છે જેમાંથી બે વિદેશી ખેલાડી છે. ટીમે આન્દ્રે રસેલ (12 કરોડ), વરૂણ ચક્રવર્તી (8 કરોડ), વેંકટેશ ઐય્યર (8 કરોડ) અને સુનીલ નરૈન (6 કરોડ)ને રિટેન કર્યા છે. કોલકાતાની સફળતામાં રસેલ અને નરૈનનું યોગદાન ઘણું જ મહત્વનું રહ્યું છે. જ્યારે ભવિષ્યને ધ્યાનમાં રાખતા ટીમે ચક્રવર્તી અને ઐય્યરને જાળવી રાખ્યા છે. આઈપીએલ-2021માં ઐય્યરે પોતાના ધમાકેદાર પ્રદર્શનથી લોકોનું ધ્યાન પોતાની તરફ ખેંચવામાં સફળતા મેળવી હતી.

રાજસ્થાન રોયલ્સ
આઈપીએલની પ્રથમ ચેમ્પિયન ટીમ રાજસ્થાન રોયલ્સે સંજૂ સેમસન (14 કરોડ), જોસ બટલર (10 કરોડ) અને યશસ્વી જયસ્વાલ (4 કરોડ) પર વિશ્વાસ મૂક્યો છે. ટીમે કોઈ બોલરને રિટેન કર્યો નથી. સુકાની સંજૂ સેમસન ટીમ માટે મહત્વનો ખેલાડી રહ્યો છે. તેથી ટીમે તેને પ્રથમ ખેલાડી તરીકે રિટેન કર્યો છે.

Share This :

Related Articles

Leave a Comment