બિઝનેસ / Go Fashion: બમ્પર લિસ્ટિંગ બાદ નફો બુક કરી લેવાય? નવી ખરીદી ક્યારે કરવી?

  • 01-Dec-2021 08:51 AM

Go Fashionના આઈપીઓને જોરદાર રિસ્પોન્સ મળ્યા બાદ આજે તેનું લિસ્ટિંગ પણ ધમાકેદાર રહ્યું છે. આ સ્ટોક મંગળવારે 90 ટકાના પ્રિમિયમ પર લિસ્ટ થયો હતો. બીએસઈ પર તેનું 1316 જ્યારે એનએસઈ પર 1310ના ભાવે લિસ્ટિંગ થયું હતું. જોકે, ત્યારબાદ તેમાં પ્રોફિટ બુકિંગ જોવા મળતા એક તબક્કે બીએસઈ પર આ શેરે 1210 રુપિયાની ઈન્ટ્રા ડે લૉ સપાટી પણ બનાવી હતી. 90 ટકા પ્રિમિયમ સાથે લિસ્ટ થયેલા શેરમાં આ વધારો આગામી સમયમાં જળવાઈ રહેશે કે કેમ તે અંગે રોકાણકારો નિશ્ચિત ના હોવાથી તેમાં વેચવાલી જોવા મળી હતી.

એક તરફ, જેમને શેર લાગ્યા તેમણે આજે કેટલાક શેર્સ વેચીને પ્રોફિટ બુક કર્યો છે, તો બીજી તરફ જેમને આઈપીઓમાં શેર નથી લાગ્યા તે લોકો તેમાં નવી ખરીદીનો મોકો શોધી રહ્યા છે. આ અંગે એક્સપર્ટ્સનું માનવું છે કે રોકાણકારોએ લાંબાગાળા માટે આ શેરને હોલ્ડ કરવો જોઈએ, કારણકે કંપનીની સ્થિતિ તેમજ બિઝનેસ સ્ટ્રેટેજી મજબૂત છે અને તે લાંબા ગાળામાં ફાયદાકારક નીવડી શકે છે. જોકે, જે લોકો શોર્ટ ટર્મ ઈન્વેસ્ટર્સ છે તેઓ હાલ ઈચ્છે તો એક્ઝિટ મારી શકે છે.

રિલાયન્સ સિક્યોરિટીઝના સિનિયર રિસર્ચ એનાલિસ્ટ વિકાસ જૈનનું કહેવું છે કે આ સ્ટોક લાંબા ગાળા માટે હોલ્ડ કરવો જોઈએ. કંપની બજારમાં સારી સ્થિતિમાં છે, જેથી શેરમાં હજુ વધારાના ચાન્સ છે. જોકે, હાલના સ્તર પર નવી એન્ટ્રી લેવાનું ટાળવું જોઈએ. જેમને ખરીદી કરવાની ઈચ્છા હોય તે લોકોએ ક્વાર્ટરલી રિઝલ્ટ સુધી રાહ જોવી, પરંતુ જેમને આઈપીઓમાં શેર લાગ્યા છે તે લોકો તેને હોલ્ડ કરી શકે છે.

લિસ્ટિંગના એક દિવસ પહેલા પણ ગો ફેશન્સના શેરનું ગ્રે માર્કેટમાં 70 ટકા પ્રિમિયમ બોલાતું હતું. લેડીઝ બોટમ વિયર બનાવતી આ કંપનીની પ્રોડક્ટ્સની કિંમત વાજબી હોવાની સાથે તેનું બિઝનેસ મોડેલ મજબૂત છે. જોકે, હાલમાં માર્કેટમાં જે ક્રેશ જોવા મળ્યો તેના કારણે શેરનું લિસ્ટિંગ પ્રિમિયમમાં થશે કે કેમ તેને લઈને રોકાણકારો આશંકિત હતા. હેમ સિક્યોરિટીઝના સિનિયર રિસર્ચ એનાલિસ્ટ આસ્થા જૈને જેમને શેર લાગ્યા છે તેમને કેટલાક શેર્સ વેચી આંશિક નફો કરી લેવાની સલાહ આપી છે. તેમનું કહેવું છે કે, નવી ખરીદી કરવા ઈચ્છતા લોકોએ શેરનો ભાવ 1100 રુપિયાની આસપાસ ના આવે ત્યાં સુધી રાહ જોવી.

Share This :

Related Articles

Leave a Comment