ગુજરાત / રાજ્યમાં કોરોનાનાં આજે 45 કેસ નોંધાયા, આણંદમાં 1 વ્યક્તિનું મોત.

  • 02-Dec-2021 08:29 AM

દુનિયાભરમાં કોરોના વાયરસના નવા વેરિયન્ટ ઓમિક્રોનનો ફફડાટ જોવા મળી રહ્યો છે. નવા વેરિયન્ટને કારણે દેશમાં કોરોનાની ત્રીજી લહેર ન આવે તે માટે કેન્દ્ર સરકારની સાથે રાજ્ય સરકારની ટીમ પણ સતર્ક છે. આ વચ્ચે આજે રાજ્યમાં કોરોનાનાં નવા કેસોમાં મામૂલી વધારો જોવા મળ્યો હતો. રાજ્યમાં આજે છેલ્લા 24 કલાકમાં કોરોનાનાં નવા 45 કેસો નોંધાયા હતા, જ્યારે આણંદમાં એક દર્દીનું મોત નિપજ્યું હતું. આ ઉપરાંત આજે 26 લોકોએ કોરોનાને માત આપી હતી. આ ઉપરાંત છેલ્લા 24 કલાકમાં રાજ્યમાં અમદાવાદમાં કોરોનાના સૌથી વધારે 11 કેસો નોંધાયા હતા, જે બાદ ભરૂચમાં પણ કોરોનાનાં 7 પોઝિટિવ કેસો નોંધાયા હતા. ઉલ્લેખનીય છે કે, ગત રોજ કોરોનાનાં 40 કેસો નોંધાયા હતા, તેવામાં આજે કોરોનાનાં કેસોમાં વધારો નોંધાયો છે.

કોરોનાને કારણે આજે એક વ્યક્તિનું મોત નિપજ્યું

રાજ્યમાં આજે ચાર વાગ્યા સુધીમાં કુલ 4,26,161 વ્યક્તિઓનું રસીકરણ કરવામાં આવ્યું હતું. અને રાજ્યમાં કોવિડ-19થી સાજા થવાનો દર 98.74 ટકા પર પહોંચ્યો છે. અને રાજ્યમાં કુલ 8,17,134 વ્યક્તિઓએ કોરોનાને માત આપી છે. અને આજે એક મોતને કારણે રાજ્યમાં અત્યાર સુધી કોરોનાને કારણે કુલ 10,093 વ્યક્તિઓએ જીવ ગુમાવ્યો છે.

રાજ્યમાં કોરોનાનાં કુલ એક્ટિવ કેસોનો આંક 293 પર પહોંચ્યો , 8 દર્દીઓ વેન્ટિલેટર પર

રાજ્યમાં હાલ કોરોનાના કુલ એક્ટિવ કેસોનો આંક 293 પર પહોંચ્યો છે. અને તેમાંથી 8 દર્દીઓ વેન્ટિલેટર પર છે, જ્યારે 285 દર્દીઓની હાલત સ્થિર છે. આજે કોરોનાનાં જિલ્લાવાર કેસોની વિગતો પર નજર કરીએ તો, અમદાવાદ કોર્પોરેશનમાં સૌથી વધારે 11 કેસો નોંધાયા હતા. તે બાદ ભરૂચમાં 7, વડોદરા કોર્પોરેશનમાં 5, ગાંધીનગર અને સુરત કોર્પોરેશનમાં 4, કચ્છમાં 3, નવસારી-રાજકોટ કોર્પોરેશન-વલસાડમાં 2-2 કેસ, આણંદ-ભાવનગર-ભાવનગર કોર્પોરેશન-જામનગર કોર્પોરેશન તેમજ ખેડામાં 1-1 કેસ નોંધાયો હતો.

Share This :

Related Articles

Leave a Comment