ગુજરાત / ભરૂચ તેમજ વાવ અને સુરત ખાતે યોજાનાર LRDની શારીરિક પરીક્ષા મોકૂફ.

  • 02-Dec-2021 08:44 AM

LRD પરીક્ષા માટે તૈયારી કરી રહેલાં રાજ્યના વિદ્યાર્થીઓ માટે મહત્વપુર્ણ સમાચાર સામે આવી રહ્યા છે. ભરતી બોર્ડ દ્વારા ભરૂચ તેમજ વાવ અને સુરત ખાતે યોજવામાં આવેલી શારીરિક પરીક્ષા મોકૂફ કરવાનો નિર્ણય કરવામાં આવ્યો છે. કમોસમી વરસાદને કારણે આ ભરતી પરીક્ષા મોકૂફ રાખવાનો નિર્ણય લેવામાં આવ્યો છે. અને હવે પછી આ સ્થળો પર શારીરિક પરીક્ષાની નવી તારીખ જાહેર કરવામાં આવશે.


એડિશનલ ડીજીપી હસમુખ પટેલે ટ્વિવટર પર આ અંગે માહિતી આપતાં જણાવ્યું હતું કે, કમોસમી વરસાદના કારણે પોલીસ હેડ કવાર્ટર, ભરૂચ તથા SRPF ગૃપ-૧૧, વાવ-સુરત ખાતે પો.સ.ઇ. / લોકરક્ષકની તા.૦૩/૧૨/૨૦૨૧ અને તા.૦૪/૧૨/૨૦૨૧ ના રોજ લેવાનાર શારિરીક કસોટી મોકુફ રાખવામાં આવેલ છે. ઉમેદવારોને શારિરીક કસોટીની નવી તારીખ હવે પછી જણાવવામાં આવશે.

આ ઉપરાંત પીએસઆઈ અને એલઆરડીની શારીરિક કસોટીને લઈને અન્ય એક મહત્વ જાણકારી સામે આવી છે. જે ઉમેદવારોએ પીએસઆઈ અને એલઆરડી બંને માટે અરજી કરી હશે તેમણે ફક્ત એક જ વખત શારીરિક કસોટી આપવાની રહેશે. આ ઉપરાંત જેને એકથી વધારે કોલલેટર મળ્યા હોય તેઓને ભરતીની વેબસાઈટ પર આપેલ નમુના મુજબના ફોર્મમાં બોર્ડને અરજી કરવાની રહેશે તેમજ જે કોલલેટરમાં પહેલી તારીખ આવતી હશે તે મુજબ શારીરક પરીક્ષા આપવાની રહેશે. પણ જો કોઈ ઉમેદવાર પાછળ આવતી તારીખે પરીક્ષા આપશે તો તે અયોગ્ય ગણાશે તેવું ભરતી બોર્ડ દ્વારા જણાવવામાં આવ્યું છે.

ઉલ્લેખનીય છે કે, રાજ્યમાં વેસ્ટર્ન ડિસ્ટર્બન્સને કારણે શિયાળામાં પણ ચોમાસા જેવો માહોલ જોવા મળી રહ્યો છે. આ ઉપરાંત અરબી સમુદ્રમાં સર્જાયેલાં લો પ્રેશરને કારણે રાજ્યના વાતાવરણમાં પલટો આવ્યો છે. અને હવામાન વિભાગ દ્વારા પણ 1 ડિસેમ્બરથી બે દિવસ માટે રાજ્યમાં કમોસમી વરસાદની આગાહી કરવામાં આવી છે. રાજ્યમાં આજે 96 જેટલાં તાલુકાઓમાં કમોસમી વરસાદ નોંધાયો છે. અમદાવાદ શહેરમાં પણ સવારથી કમોસમી વરસાદ શરૂ છે અને સવારથી જ વાદળછાયા વાતાવરણ સાથે ઝરમર-ઝરમર વરસાદ વરસી રહ્યો છે.


ગુજરાત પોલીસની લોકરક્ષક કેડરની 10,459 જેટલી જગ્યાઓ માટેની ભરતીમાં 9.50 લાખ ઉમેદવાર છે, જેમની શારીરિક પરીક્ષા 3 ડિસેમ્બરથી શરૂ થવાની જાહેરાત થઈ ચૂકી છે. PSI અને LRD બંનેની શારીરિક પરીક્ષા સાથે રાખવામાં આવી છે. અગાઉ હસમુખ પટેલે ટ્વિટર પર જાહેર કર્યું હતું કે, પોલીસ ભરતીમાં અત્યાર સુધી સાત લાખ જેટલા ઉમેદવારોએ કોલ લેટર ડાઉનલોડ કર્યાં છે.

ઉલ્લેખનીય છે કે, લોકરક્ષક દળની ભરતી માટે કોલ લેટર સહિતનાં ઉમેદવારોનાં પ્રશ્નો માટે હેલ્પલાઈન નંબર પણ શરૂ કરવામાં આવ્યા છે. કોલ લેટર અંગેના પ્રશ્નો માટે આ હેલ્પ લાઈન નંબર 2 ડિસેમ્બર 2021 સુધી ચાલુ રહેશે જેનો સમય સવારે 10.30 વાગ્યાથી સાંજના 6 વાગ્યા સુધીનો રાખવામાં આવ્યો છે. જેના પર ફોન કરીને ઉમેદવારો કોઈપણ મૂંઝવતા પ્રશ્નોનું યોગ્ય માર્ગદર્શન મેળવી શકશે.

Share This :

Related Articles

Leave a Comment