બિઝનેસ / માઈક્રોસોફ્ટના CEO સત્ય નાદેલાએ કંપનીમાં વેચ્યા પોતાના અડધા શેર, બદલામાં આટલાં કરોડ ડૉલર મળ્યા.

  • 02-Dec-2021 09:31 AM

માઈક્રોસોફ્ટના ચીફ એક્ઝિક્યુટિવ ઓફિસર સત્ય નાદેલાએ કંપનીમાં પોતાના લગભગ અડધા શેર વેચી દીધા છે. વોલ સ્ટ્રીટ જર્નલના એક રિપોર્ટ મુજબ, આ જાણકારી એક ફેડરલ સિક્યોરિટી ફાઇલિંગમાંથી સામે આવી છે. ગયા અઠવાડિયે યૂએસ સિક્યોરિટી એન્ડ એક્સચેન્જ કમિશનની સાથે ફાઈલિંગમાં માઈક્રોસોફ્ટે જણાવ્યું હતું કે, સત્ય નાદેલા પાસે માઈક્રોસોફ્ટના લગભગ 17 લાખ શેર હતા. પરંતુ છેલ્લાં બે દિવસોમાં તેઓ 8,38,584 શેર વેચી ચૂક્યા છે.

આ વેચાણથી સત્ય નાદેલાને 28.5 કરોડ ડૉલરથી પણ વધુ મળ્યા છે. ઈનસાઈડરસ્કોરના જણાવ્યા મુજબ, સત્ય નાદેલાનું આ સૌથી મોટું સિંગલ સ્ટોક વેચાણ છે. માઈક્રોસોફ્ટના પ્રવક્તાએ એક લેખિત નિવેદનમાં જણાવ્યું કે, સત્ય નાદેલાએ વ્યક્તિગત નાણાકીય યોજના અને વૈવિધ્યકરણના કારણોસર માઈક્રોસોફ્ટ સ્ટોકના પોતાના ભાગના લગભગ 8,40,000 શેર વેચી દીધા છે. તેઓ કંપનીની સતત સફળતા માટે પ્રતિબદ્ધ છે અને તેઓનું હોલ્ડિંગ, માઈક્રોસોફ્ટ બોર્ડ ઓફ ડિરેક્ટર્સ દ્વારા નિર્ધારિત હોલ્ડિંગ જરૂરીયાત કરતા પણ વધારે છે.

નિર્ણય પાછળ આ પણ હોઈ શકે છે કારણ
વિશ્લેષકોનું કહેવું છે કે, સત્ય નાદેલાનો આ નિર્ણય વોશિંગટન સ્ટેટના એ નિર્ણય સાથે સંબંધિત હોઈ શકે છે, જે આગામી વર્ષની શરૂઆતમાં 2,50,000 ડૉલર પ્રતિ વર્ષથી વધારેના લોન્ગ ટર્મ કેપિટલ ગેન્સ પર 7 ટકા ટેક્સ લગાવવાની તૈયારી કરી રહી છે. સત્ય નાદેલા 2014માં માઈક્રોસોફ્ટના સીઈઓ બન્યા હતા.


2.53 લાખ કરોડ ડૉલર છે માઈક્રોસોફ્ટનો માર્કેટ કેપ
સત્ય નાદેલાની આગેવાનીમાં માઈક્રોસોફ્ટ વિશ્વની સૌથી અમૂલ્ય કંપનીઓમાં સામેલ થઈ. એનું કારણ એ રહ્યું કે, સત્ય નાદેલાએ બિઝનેસને ક્લાઉડ કમ્પ્યુટિંગ અને મોટા સાહસોના વેચાણ પર ધ્યાન કેન્દ્રિત કર્યુ. માઈક્રોસોફ્ટ વર્તમાન સમયમાં 2.53 લાખ કરોડ ડૉલરના માર્કેટ કેપિટલાઈઝેશન પર ટ્રેડ કરી રહી છે. આ એ સમયની સરખામણીએ લગભગ 780 ટકા વધુ છે, જ્યારે સત્ય નાદેલાને સીઈઓ તરીકે નિયુક્ત કરવામાં આવ્યા હતા.

મહામારી દરમિયાન કંપનીના કારોબારને વધુ વેગ મળ્યો કારણ કે વધુમાં વધુ સંગઠનોએ રિમોટ વર્કને સુવિધાજનક બનાવવા માટે માઈક્રોસોફ્ટના ટૂલ્સની માંગણી કરી. સત્ય નાદેલાને જૂનમાં માઈક્રોસોફ્ટના બોર્ડ ઓફ ડિરેક્ટર્સના ચેરમેન તરીકે નિયુક્ત કરવામાં અવ્યા હતા.

Share This :

Related Articles

Leave a Comment