ઇન્ડિયા / મહારાષ્ટ્રમાં આવતા નૉન-વેક્સિનેટેડ લોકો માટે RTPCR ટેસ્ટ ફરજિયાત બનાવાયો.

  • 02-Dec-2021 09:33 AM

એક સમયે દેશના સૌથી કોરોનાના વધુ કેસ ધરાવતા મહારાષ્ટ્રએ ઓમિક્રોન વેરિયંટ રાજ્યમાં ના પ્રસરે તે માટે એક મોટો નિર્ણય લીધો છે. સરકારે 30 નવેમ્બરના રોજ એક આદેશ બહાર પાડ્યો છે. જે અનુસાર, મહારાષ્ટ્રમાં એન્ટ્રી કરનારા કોઈપણ વ્યક્તિએ વેક્સિનના બંને ડોઝ લીધા હોવા જોઈએ, જો વેક્સિન ના લીધી હોય તો તેમણે રાજ્યમાં એન્ટ્રી કરવાના 48 કલાક સુધીમાં કરાવેલો RTPCR રિપોર્ટ રજૂ કરવાનો રહેશે. સરકારના આ અંગેના ઓર્ડરમાં જણાવાયું છે કે કોરોનાના નવા વેરિયંટને ધ્યાનમાં રાખતા આ નિર્ણય લેવામાં આવ્યો છે.

સાઉથ આફ્રિકામાં દેખાયેલા ઓમિક્રોન વેરયિંટને WHO પણ ખતરનાક જાહેર કરી ચૂક્યું છે. તેવામાં મહારાષ્ટ્ર સરકારે ડિઝાસ્ટર મેનેજમેન્ટ 2005 અંતર્ગત તાત્કાલિક અસરથી વેક્સિન અથવા RTPCR ટેસ્ટ એમ બે વિકલ્પ આપી દેવાની સાથે તેના પર અમલ પણ શરુ કરી દીધો છે. બહારના રાજ્યોમાંથી મહારાષ્ટ્રના કોઈપણ એરપોર્ટ પર લેન્ડ થનારા પ્રવાસીને પણ 48 કલાક સુધીમાં થયેલો RTPCR ટેસ્ટ રિપોર્ટ બતાવવાનો રહેશે. જોકે, આ નિયમ જેમણે રસીના બંને ડોઝ નથી લીધા માત્ર તેમના પર જ લાગુ પડે છે.

બીજી તરફ, કેન્દ્ર સરકારે પણ 28 નવેમ્બરે વિદેશથી આવતા લોકો પર કેટલાક નિયંત્રણ મૂક્યા છે. જેમાં પ્રવાસીને પોતે છેલ્લા 15 દિવસમાં કેટલા દેશોની મુલાકાત કરી તે વિગતો આપવાની રહે છે. મુંબઈ એરપોર્ટ આ અંગેનું ફોર્મ તમામ એરલાઈન્સને મોકલશે અને તેમાં અપાયેલી વિગતોની ઈમિગ્રેશન દ્વારા ચકાસણી પણ કરાશે. ખોટી માહિતી આપનારા પ્રવાસી વિરુદ્ધ ડિઝાસ્ટર મેનેજમેન્ટ એક્ટ 2005ની હેઠળ કાર્યવાહી કરવામાં આવશે. હાઈ રિસ્ક કેટેગરીમાં આવતા દેશોમાંથી આવનારા પ્રવાસીઓને 7 દિવસ ફરજિયાત ક્વોરન્ટાઈન થવું પડશે. તેમનું સ્ક્રિનિંગ પણ અલગ કાઉન્ટર પર થશે.

સાત દિવસના ક્વોરન્ટાઈન બાદ તેમનો ફરી ટેસ્ટ કરાશે. જો તેનો રિપોર્ટ નેગેટિવ આવે તો જ તેમને બહાર હરવા-ફરવાની મંજૂરી અપાશે. પરંતુ જો રિપોર્ટ પોઝિટિવ આવશે તો આવા વ્યક્તિને હોસ્પિટલમાં એડમિટ થવું પડશે. મુંબઈ એરપોર્ટ પર લેન્ડ થતાં અને ત્યાંથી કનેક્ટિંગ ફ્લાઈટ પકડી દેશના બીજા ભાગોમાં જતા મુસાફરોનું પણ ફર્સ્ટ અરાઈવલ એરપોર્ટ પર ટેસ્ટિંગ કરાશે. જો રિપોર્ટ નેગેટિવ હશે તો જ તેમને કનેક્ટિંગ ફ્લાઈટ પકડવાની મંજૂરી અપાશે.

Share This :

Related Articles

Leave a Comment