ગુજરાત / સાળંગપુર હનુમાનજી મંદિરમાં તૈયાર થશે ગુજરાતનું સૌથી મોટું ભોજનાલય.

  • 02-Dec-2021 09:47 AM

સુપ્રસિદ્ધ સાળંગપુર કષ્ટભંજનદેવ હનુમાનજી મદિરમાં રૂપિયા 40 કરોડના ખર્ચે ગુજરાતનું સૌથી મોટું ભોજનાલય બની રહ્યું છે. જેમાં એકસાથે ઘણાં લોકો પ્રસાદનો લાભ લઈ શકશે. હાલ ભોજનાલય બનાવવાની કામગીરી પૂરજોશમાં ચાલી રહી છે. સાળંગપુરના આ ભોજનાલયની વિશેષતા એ હશે કે તેમાં ગેસ, અગ્નિ કે ઈલેક્ટ્રિસિટી વિના રસોઈ બનાવવામાં આવશે. મહેલ જેવું આ ભોજનાલય બનાવવામાં અંદાજિત 40 કરોડ રૂપિયાનો ખર્ચ થશે. આ ભોજનાલય બનાવવામાં હાલ અહીં 300થી વધુ કારીગરો દિવસ-રાત કામ કરી રહ્યા છે.

એક ન્યૂઝ વેબસાઈટના જણાવ્યા મુજબ, સાળંગપુરના મંદિર પરિસરમાંથી સીધા જ ભોજનાલયમાં જઈ શકાશે. આ ભોજનાલયમાં શ્રદ્ધાળુઓની વધારે ભીડ ના થાય તે માટે પહોળા પગથિયા બનાવવામાં આવશે. આ પગથિયાઓની વચ્ચે વૃદ્ધ અને દિવ્યાંગો માટે 2 એસ્કેલેટરની પણ વ્યવસ્થા હશે. આ ભોજનાલયમાં ખાસ પ્રકારની દીવાલ તેની અંદરનું તાપમાન ઠંડું રાખશે. એટલે કે ભોજનાલયની બહારથી દીવાલો ગરમ થઈ હશે તેમ છતાં તેની અંદરનું તાપમાન નીચું રહેશે. આ ભોજનાલયમાં કુલ 4 ડાઈનિંગ હોલ હશે કે જેમાં જનરલ ડાઈનિંગ હોલ ખૂબ મોટો હશે. જ્યારે આ ભોજનાલયના રસોડા અને ડાઇનિંગ હોલ વચ્ચે વધારે જગ્યા રાખવામાં આવી છે કે જેથી ભવિષ્યમાં રસોડામાં કોઈ અકસ્માત સર્જાય તો તેની અસર ડાઇનિંગ હોલમાં થાય નહીં. આ ભોજનાલયમાં રસોઈ બનાવવા માટે પણ ખાસ પ્રકારની ટેક્નોલોજીનો ઉપયોગ કરવામાં આવશે.

q8


અહીં નોંધનીય છે કે હનુમાન મંદિર, સાળંગપુર ગુજરાતના બોટાદ જિલ્લાના બરવાળા તાલુકાના સાળંગપુર ગામમાં આવેલું કષ્ટભંજન દેવ હનુમાનજીનું મંદિર છે, તે સાળંગપુરના હનુમાન તરીકે પણ પ્રસિદ્ધ છે. સાળંગપુર હનુમાન મંદિર નકારાત્મક શક્તિઓને દૂર કરવા માટે સૌથી વધારે પ્રખ્યાત છે. અહીં ભૂત-પ્રેત જેવી બાધાઓથી પીડિત વ્યક્તિને તેના પરિજનો લાવે છે, શ્રદ્ધાળુઓના જણાવ્યાનુસાર આવા લોકો જ્યારે હનુમાનજીની મૂર્તિ સામે આવે છે અને તેમની આંખમાં જુએ છે તે ક્ષણથી જ તેઓ ખરાબ શક્તિઓથી મુક્ત થઈ જાય છે. આ મંદિરમાં શનિવારે વિશેષ પૂજા કરવામાં આવે છે. આ લોકોને મૂર્તિ સામે ઊભા રાખી અને તેમને એક દંડનો સ્પર્શ કરાવવામાં આવે છે. આ દંડનો ઉપયોગ સ્વામી ગોપાલાનંદે મૂર્તિ સ્થાપના વખતે કર્યો હતો. જાણકારોના મતાનુસાર દંડના સ્પર્શથી મૂર્તિમાં પ્રાણ પુરાયા હતા. આ દંડને ચમત્કારી માનવામાં આવે છે. અહીં મોટી સંખ્યામાં આવતા ભક્તો માટે રહેવા તેમજ પ્રસાદની વ્યવસ્થા પણ મંદિરમાં કરવામાં આવે છે.

ભગવાનની સાથે ભક્તની પૂજા કરવાના સિદ્ધાંત માટે શાસ્ત્રીજી મહારાજે વડતાલ સંસ્થા છોડી અક્ષરપુરુષોત્તમ માટે બોચાસણમાં મંદિરની પ્રતિષ્ઠા કરી. ત્યારબાદ સાળંગપુરમાં મંદિરની ધામધૂમપૂર્વક સ્થાપના કરી. હાલમાં આ મંદિરની સાથે જોડાયેલી પ્રવૃત્તિઓમાં સ્વામિનારાયણ સંત તાલિમ કેન્દ્ર, ખ્યાતનામ ગૌશાળા અને પ્રમુખ સ્વામી વિદ્યામંદિર ચાલી રહ્યા છે. દર વર્ષે હોળી-ધૂળેટી ઉત્સવની ઉજવણી બી.એ.પી.એસ. સંસ્થાનાં પ્રમુખ હજારોની જનમેદની વચ્ચે કરે છે. મંદિરમાં સવારે પહેલી મંગળા આરતી 5:30 વાગ્યે થાય છે.

Share This :

Related Articles

Leave a Comment