ઇન્ડિયા / રાજસ્થાનમાં પણ સસ્તા થયા પેટ્રોલ અને ડીઝલ, મંગળવાર રાતથી લાગુ થશે નવા ભાવ.

  • 17-Nov-2021 08:37 AM

રાજસ્થાનની અશોક ગેહલોત સરકારે પણ અંતે રાજ્યમાં પેટ્રોલ અને ડીઝલની કિંમતોમાં ઘટાડો કરવાનો મહત્વનો નિર્ણય લીધો છે. રાજ્યમાં મંગળવાર રાતથી પેટ્રોલના ભાવમાં 4 રુપિયા અને ડીઝલના ભાવમાં પાંચ રૂપિયા પ્રતિ લીટરનો ઘટાડો થશે. રાજ્યના મુખ્યમંત્રી અશોક ગેહલોતે મંત્રીમંડળમાં લેવાયેલા નિર્ણયની જાણકારી આપતાં ટ્વિટ કરી હતી.

સીએમ ગેહલોતે રાજ્યમાં આસમાને પહોંચેલા પેટ્રોલ અને ડીઝલના ભાવમાં ઘટાડો કરવાના નિર્ણય અંગે માહિતી આપતાં ટ્વિટ કરી કે, આજે મંત્રીમંડળ બેઠકમાં પેટ્રોલ અને ડીઝલ પર VAT ઘટાડવાનો નિર્ણય લેવામાં આવ્યો હતો. જે મંગળવાર રાત, 12 વાગ્યાથી લાગૂ કરવામાં આવશે. ગેહલોત સરકારના આ નિર્ણયથી રાજ્યમાં પેટ્રોલની કિંમતમાં 4 રુપિયા પ્રતિ લીટર અને ડીઝલની કિંમતમાં 5 રુપિયા પ્રતિ લીટરનો ઘટાડો થશે.

ગેહલોત સરકારના આ નિર્ણયથી રાજ્ય સરકારની વાર્ષિક આવકમાં 3500 કરોડ રુપિયાનો ઘટાડો થશે.

ઉલ્લેખનીય છે કે, કેન્દ્રમાં મોદી સરકારે પેટ્રોલ અને ડીઝલના ભાવમાં ઘટાડો કર્યો હતો. દિવાળીના એક દિવસ પહેલા સરકારે પેટ્રોલની કિંમતમાં પાંચ રુપિયા અને ડીજલની કિંમતમાં 10 રુપિયા પ્રતિ લીટરનો ઘટાડો કર્યો હતો. આ પહેલા દેશભરમાં મોંઘવારી એની ચરમસીમાએ પહોંચી હતી, જે મુદ્દે કોંગ્રેસ સહિતના વિપક્ષ કેન્દ્ર સરકાર પર આકરા પ્રહારો કરી રહ્યા હતા.

જોકે કેન્દ્ર સરકારના મહત્વના નિર્ણય પછી પણ રાજસ્થાન સરકારે પેટ્રોલ અને ડીજલના ભાવમાં અત્યાર સુદી ઘટાડો કર્યો નહોતો. જેના લીધે ગેહલોત સરકાર ચોતરફથી ઘેરાયેલી હતી. અહીં સુદી કે સીએમ ગેહલોતે એવો દાવો પણ કર્યો હતો કે VATમાં ઘટાડો કરવા માટે ગૃહમંત્રી અમિત શાહ તેમની પર દબાણ લાવી રહ્યા છે. બીજી તરફ પેટ્રોલ-ડીઝલના ઊંચા ભાવને લીધે રાજસ્થાનના પેટ્રોલ પંપ નુકસાન વેઠી રહ્યા હોવાના અહેવાલ હતા, જેની સામે પાડોશી રાજ્યોમાં પેટ્રોલ પંપો પર વેચાણમાં વધારો નોંધાયો હતો.

Share This :

Related Articles

Leave a Comment