રાજકારણ / સુપ્રીમ કોર્ટે કેન્દ્ર સરકારને લપડાક લગાવી, કહ્યું- 'ડોક્ટરોને ફૂટબોલની જેમ ન સમજો'.

  • 28-Sep-2021 08:35 AM

સોમવારે સુપ્રીમ કોર્ટે કેન્દ્ર સરકારને ફટકાર લગાવી છે. છેલ્લી ઘડીએ પોસ્ટ ગ્રેજ્યુએટ નેશનલ એલિજિબિલિટી કમ એન્ટ્રસ ટેસ્ટ- સુપર સ્પેશિયાલિટી (NEET-SS) 2021ની પરીક્ષાની પેટર્ન બદલી દેતાં સુપ્રીમ કોર્ટે નારાજગી દર્શાવી હતી. જસ્ટિસ ડી.વાય. ચંદ્રચૂડ અને બી.વી.નાગત્નની બેન્ચે કહ્યું કે, અંસવેદનશીલ બ્યૂરોક્રેટ્સની દયા પર ડોક્ટરોને છોડી શકાય નહીં અને સાથે તેનો ઉકેલ લાવવા માટે ચેતવણી પણ આપી હતી.

અંસેવદનશીલ બ્યૂરોક્રેટ્સને મામલે કરી આકરી ટિપ્પણી

સુપ્રીમ કોર્ટે કહ્યું કે, સત્તાની રમતમાં ડોક્ટરો સાથે ફૂટબોલ જેવો વ્યવહાર ન કરો. મીટિંગ અટકાવો. અમે આ યુવા ડોક્ટરોનું જીવન અમુક અંસવેદનશીલ બ્યૂરોક્રેટ્સના હાથોમાં સોંપી શકતા નથી. આ સાથે સુપ્રીમ કોર્ટે સવાલ પુછ્યો હતો કે, નોટિસને કેમ જાહેર કરવામાં આવી? સુપર સ્પેશિયાલિટીની પરીક્ષા માટે વિદ્યાર્થીઓએ અનેક મહિનાઓ અગાઉથી જ તૈયારીઓ શરૂ કરી દીધી હતી. અને તેને પરીક્ષા પહેલાં જ બદલવાની કેમ જરૂર પડે? અને નવા બદલાવ સાથે આગામી વર્ષથી કેમ લાગુ કરવામાં ન આવી?

સુપ્રીમ કોર્ટે પુછ્યા સણસણતા સવાલ

નેશનલ મેડિકલ કમિશન થકી વકીલ ગૌરવ શર્માએ કહ્યું કે, અમે આ મામલે જવાબ દાખલ કરીશું અને એક અઠવાડિયા માટેની મહોલત માગી છે. સુપ્રીમ કોર્ટે શર્માને પુછ્યું કે, NMC શું કરી રહી છે? આપણે સુપર સ્પેશિયાલિટી કરવા માગતા ડોક્ટરોના જીવન મુદ્દે વાત કરી રહ્યા છે. તમે 23 જુલાઈએ પરીક્ષાને લઈને નોટિફિકેશન બહાર પાડ્યું અને તે બાદ 31 ઓગસ્ટે સિલેબસ બદલી દીધો. આ બધું શું છે? અને તેઓને 13 અને 14 નવેમ્બરે પરીક્ષા આપવાની છે.

સુપ્રીમ કોર્ટે કેન્દ્ર સરકાર અને NMCને નોટિસ પાઠવી

છેલ્લી ઘડીએ પરીક્ષાની પેર્ટન બદલવા મામલે કરવામાં આવેલ અરજી પર સુપ્રીમ કોર્ટે કેન્દ્ર સરકાર અને નેશનલ મેડિકલ કાઉન્સિલને નોટિસ પાઠવી છે. ઉલ્લેખનીય છે કે, સમગ્ર દેશમાંથી 41 ક્વોલિફાયડ પોસ્ટ ગ્રેજ્યુએટ ડોક્ટર્સ દ્વારા સુપ્રીમ કોર્ટમાં અરજી દાખલ કરવામાં આવી હતી, અને તેઓ NEET-SS 2021 પરીક્ષા પાસ કરીને સુપર સ્પેશિયાલિસ્ટ ડોક્ટર બનવાનું સ્વપ્ન સેવી રહ્યા હતા. અને આ મામલે દિશાનિર્દેશ સૂચવવા માટે તેઓએ કોર્ટમાં અરજી કરી હતી.

જૂની પેટર્ન મુજબ પરીક્ષા લેવા ડોક્ટરોની માગ

અરજીમાં સરકાર સામે પડકાર ફેંકવામાં આવ્યો છે કે, તેઓને આ મુદ્દે કોઈ સત્તા નથી, અને આ સ્પષ્ટ રીતે મનમાની ગણાવી હતી. અરજીમાં જણાવ્યા મુજબ 2018-2020ની પેટર્ન મુજબ 60 ટકા માર્ક્સ સુપર સ્પેશિયાલિટી કોર્સમાંથી આપવામાં આવતા હતા અને જ્યારે 40 ટકા માર્ક્સ જનરલ મેડિસિનમાંથી આપવામાં આવતા હતા.

આ ઉપરાંત અરજીમાં કહેવામાં આવ્યું કે, અગાઉની પેટર્ન મુજબ 40 ટકા માર્ક્સ બેઝ સબ્જેક્ટમાંથી તો 60 ટકા માર્ક્સ ઉમેદવારે નક્કી કરેલ બે ઓપ્શનલ સબ્જેક્ટમાંથી આપવામાં આવતા હતા. આ પેટર્નમાં ડોક્ટર પોતાને મનગમતા વિષય નક્કી કરી શકતા હતા અને આ વિષય પર થિયરી નોલેજની સાથે પ્રેક્ટિકલ જ્ઞાન પણ મેળવી શકતા હતા. પણ નવી પેટર્ન મુજબ ક્રિટિકલ કેર સુપર સ્પેશિયાલિટીના પ્રશ્નો પણ જનરલ મેડિસિનમાંથી લેવામાં આવશે.

Share This :

Related Articles

Leave a Comment