બિઝનેસ / Nykaa અને Zomatoની તુલનામાં કેમ ફ્લોપ રહ્યું Paytmનું લિસ્ટિંગ?

  • 19-Nov-2021 08:33 AM

દેશના સૌથી મોટા પેટીએમ આઈપીઓનું લિસ્ટિંગ ઘણું ખરાબ રહ્યું. પ્રથમ દિવસના અંતે તે 27.25 ટકા તૂટ્યો હતો. ડિજિટલ પેમેન્ટ કંપની પેટીએમની પેરેન્ટ કંપની વન 97 કોમ્યુનિકેશન્સના શેરનું લિસ્ટિંગ જ નિરાશાજનક રહ્યું હતું. તેની ઈસ્યુ પ્રાઈઝ 2150 રૂપિયા હતી તેને લિસ્ટિંગના દિવસે જ તેમાં 27 ટકાનો ઘટાડો થયો હતો. બીએસઈમાં કંપનીનો શેર નવ ટકા નીચે 1,955 રૂપિયા પર લિસ્ટ થયો હતો. જ્યારે દિવસ દરમિયાન તે 1,564 રૂપિયા સુધી આવી ગયો હતો.

શેરબજારમાં પેટીએમના નબળા લિસ્ટિંગના કારણે તેનું વેલ્યુએશન 20 અબજ ડોલરથી ઘટીને 15 અબજ ડોલર થઈ ગયું છે. શેરબજારે તે સાબિત કરી દીધું છે કે તે કોઈ કંપનીના મોટા નામ કે પછી આકારને જોઈને તેનો નિર્ણય નથી લેતું. ભારતના સૌથી મોટા આઈપીઓને સફળ બનાવવામાં તેના મેનેજમેન્ટે પણ કોઈ કસર બાકી રાખી ન હતી. હેવી વેટ બેન્કર અને દિગ્ગજ રોકાણકારોનું બેકઅપ હોવા છતાં પેટીએમનું લિસ્ટિંગ ફ્લોપ રહ્યું છે.

ઈ-કોમર્સ બિઝનેસમાં નબળાઈ

પેટીએમના બિઝનેસ મોડલની નબળાઈ તેના ઈ-કોમર્સ બિઝનેસ પેટીએમ મોલના કારણે પણ જોવા મળી રહી છે. પેટીએમની આવકમાં પેટીએમ મોલની ભાગીદારી 55 ટકા છે. જો 2019થી 2021ની વાત કરવામાં આવે તો પેટીએમ મોલના બિઝનેસમાં નબળાઈ જોવા મળી છે. તેની રેવન્યુ 9.9 અબજ રૂપિયાથી ઘટીને 1.3 અબજ રૂપિયા પર આવી ગઈ છે. ઈ-કોમર્સ બિઝનેસમાં પેટીએમનો મુકાબલો એમેઝોન અને ફ્લિપકાર્ટ જેવી દિગ્ગજ કંપનીઓ સામે છે.

નફો થવાની શક્યતાઓ ઘણી ઓછી

પેટીએમને આશા છે કે તે 2023ની શરૂઆતમાં નફો કરતી થઈ જશે. જોકે, કંપનીના આ દાવા પર રોકાણકારો અને વિશ્લેષકોએ વિશ્વાસ વ્યક્ત કર્યો નથી. સતત પ્રયાસો છતાં પેટીએમ નફો કરવામાં નિષ્ફળ રહી છે અને તેનું વેલ્યુએશન પણ વધારે છે. જ્યારથી તેની ઈસ્યુ પ્રાઈઝ જાહેર કરવામાં આવી હતી ત્યારથી તેની વેલ્યુએશનને લઈને ચર્ચા ચાલી હતી. ઘણી રિસર્ચ ફર્મે પીટીએમની ટાર્ગેટ પ્રાઈઝ 1200 રૂપિયા રાખી છે.

નાયકા કરી રહી છે નફો

તાજેતરમાં જ શેરબજારમાં લિસ્ટ થયેલી નાયકા અને ઝોમાટોની વાત કરીએ તો તેમની સ્થિતિ અલગ છે. તે બંને કંપનીઓ પોતાના બિઝનેસમાં માર્કેટ લીડર છે. નાયકા નફો કરી રહેલી કંપની છે. સપ્ટેમ્બર ક્વાર્ટરમાં તેના નફામાં ભારે ઘટાડો જોવા મળ્યો છે. જોકે તેમ છતાં તેને શેરની કિંમતમાં કોઈ મોટો ઘટાડો નોંધાયો નથી.

દિગ્ગજ કંપનીઓ સાથે છે પેટીએમનો મુકાબલો

પેટીએમનો મુકાબલો એમેઝોન, ફ્લિપકાર્ટ, ગૂગલ અને આ પ્રકારની અન્ય દિગ્ગજ કંપનીઓ સામે છે. હકિકતમાં ફાઈનાન્સિયલ પ્રોડક્ટ કે બાય નાઉ પે લેટર પ્રોડક્ટના મામલે પેટીએમને આગામી દિવસોમાં આકરી સ્પર્ધાનો સામનો કરવો પડશે. છેલ્લા કેટલાક દિવસોમાં ગૂગલ અને ફ્લિપકાર્ટના ફોન પેએ બિઝનેસમાં ઝડપથી આગેકૂચ કરી છે અને તેના કારણે પેટીએમની માર્કેટ ભાગીદારી પણ ઘટી છે.

UPIના ગ્રોથની પણ અસર પડી

દેશમાં યુનિફાઈડ પેમેન્ટ ઈન્ટરફેસ અથવા તો યુપીઆઈ ટ્રાન્ઝેક્શનની સંખ્યા વધવાની સાથે જ પેટીએમના પેમેન્ટ બેઝ્ડ બિઝનેસ મોડલ પર પણ અસર પડી છે. સરકારી સંસ્થા નેશનલ પેમેન્ટ્સ કોર્પોરેશન ઓફ ઈન્ડિયા દ્વારા તૈયાર કરવામાં આવેલા યુપીઆઈની મદદથી પેમેન્ટ ટ્રાન્સફરને ડિસેમ્બર 2019થી મર્ચન્ટ અને કન્ઝ્યુમર માટે ફ્રી કરી દેવામાં આવી છે. પેમેન્ટ સર્વિસ પ્રોવાઈડરના બિઝનેસ પર યુપીઆઈના આગમન બાદ ઘણી મોટી અસર પડી છે.

Share This :

Related Articles

Leave a Comment