રાજકારણ / જાતિનો દાખલો કઢાવવા ધક્કા ખાતી મહિલા મંત્રી રાજેન્દ્ર ત્રિવેદીને કહી ગઈ એક મોટી વાત.

  • 25-Dec-2021 08:37 AM

 મહેસૂલ મંત્રી રાજેન્દ્ર ત્રિવેદી આજે વડોદરાની દક્ષિણ ઝોનની મામલતદાર કચેરીની ઓચિંતી મુલાકાતે પહોંચ્યા હતા. અહીં તેમણે જાતે અધિકારીઓ તેમજ અરજદારો સાથે વાતચીત કરીને લોકોને કોઈ તકલીફ પડે છે કે કેમ તે અંગે જાતે જાણકારી મેળવી હતી. મહેસૂલ મંત્રીની ઓચિંતી મુલાકાત વેળાએ તેમણે પોતાની દીકરી માટે જાતિનો દાખલો કઢાવવા આવેલી એક મહિલા સાથે વાત કરી હતી. મહિલાએ રાજેન્દ્ર ત્રિવેદીને ફરિયાદ કરી હતી કે તેઓ જાતિના દાખલા માટે ઘણા સમયથી ધક્કા ખાઈ રહ્યા છે, અને અધિકારીઓ પુરતા દસ્તાવેજ નથી તેમ કહીને તેમનું કામ નથી કરી રહ્યા.
 

સરકારી કચેરીના ધક્કા ખાતી મહિલા મંત્રી રાજેન્દ્ર ત્રિવેદીને કહી ગઈ એક મોટી વાત


દીકરી સાથે મામલતદાર ઓફિસમાં આવેલી શકુબેન નામની મહિલા સાથે વાત કર્યા બાદ રાજેન્દ્ર ત્રિવેદીએ પોતાની સામે બેઠેલા અધિકારી સાથે વાત કરી હતી. ત્યારબાદ તેમણે જાતિનો દાખલો કાઢી આપતા એક અધિકારીને સીધો ફોન જોડીને મહિલા અરજદારનું કામ આજેને આજે કે પછી વધુમાં વધુ બે દિવસમાં પૂરું કરવા માટે તાકીદ કરી હતી. મહેસૂલ મંત્રીએ અધિકારી સાથે વાત કરીને મહિલાને તેમનું કામ થઈ જશે તેવું આશ્વાસન આપ્યું તે જ વખતે મહિલાએ ફરિયાદ કરી હતી કે વારંવાર ધક્કા ખાવાથી તેમણે ભાડાં માટે બચાવેલા રુપિયા પણ વપરાઈ ગયા છે. આ સાંભળીને રાજેન્દ્ર ત્રિવેદીએ તરત પોતાના ખિસ્સામાં હાથ નાખ્યો હતો, અને મહિલાનું સ્વમાન જળવાય તે રીતે તેમને કેટલું ભાડું થાય છે તેમ પૂછીને 50 રુપિયા આપ્યા હતા.

પોતાની સામે બેસીને અધિકારીઓને ફોન લગાવીને મહિલાનું કામ કરી આપવા સૂચના આપી રહેલા મંત્રી રાજેન્દ્ર ત્રિવેદી છે તેની મહિલાને ખબર જ નહોતી. જોકે, તેણે જતાં-જતાં રાજેન્દ્ર ત્રિવેદીને તેમની નામ અને ઓળખાણ પૂછ્યા ત્યારે ખુદ મંત્રી ઉપરાંત ત્યાં હાજર કર્મચારીઓ અને મીડિયાકર્મીઓ હસી પડ્યા હતા. તે વખતે મહિલાએ કહ્યું હતું કે, અમને તમારું નામ ખબર હોય તો ચૂંટણી વખતે કોને મત આપવો તેની ખબર પડે.. મહિલાના મોઢે આ વાત સાંભળીને રાજેન્દ્ર ત્રિવેદીએ તેમને પોતાનું નામ જણાવ્યું હતું.

 આયુષ્માન ભારત યોજના એટલે શું? આ કાર્ડ મેળવવાની જાણો Online process.


ઉલ્લેખનીય છે કે, મહેસૂલ મંત્રી રાજેન્દ્ર ત્રિવેદી પોતે ચાર્જ સંભાળ્યો ત્યારથી જ અવારનવાર સરકારી કચેરીઓની આકસ્મિક મુલાકાત લેતા રહે છે. આજે તેમણે વડોદરા મામલતદાર ઓફિસમાં જંત્રીના રેકોર્ડ તપાસીને 9 કરોડ જેટલી વિસંગતતા અંગે અધિકારીઓનું ધ્યાન દોરીને તેના પર તપાસ કરવા માટે કહ્યું હતું. રાજેન્દ્ર ત્રિવેદીએ થોડા દિવસ પહેલા જ દહેગામ મામલતદાર ઓફિસની મુલાકાત લીધી હતી, જેમાં તેઓ અરજદારોને મળ્યા હતા અને તેઓ કેટલા સમયથી ધક્કા ખાય છે, તેમનું કામ ક્યારથી પેન્ડિંગ છે, ફાઈલ ક્યાં અટવાયેલી છે તેવી તમામ બાબતોની જાણકારી મેળવીને તાત્કાલિક તેમની મદદ કરી હતી.

Share This :

Related Articles

Leave a Comment