રાજકારણ / કોરોનાની ત્રીજી લહેર અંગે રાજ્યના આરોગ્ય મંત્રી ઋષિકેશ પટેલનું મોટું નિવેદન.

  • 28-Dec-2021 08:50 AM

ગુજરાતમાં ઓમિક્રોન-કોરોનાના કેસો સતત વધી રહ્યા છે ત્યારે રાજ્યના આરોગ્ય મંત્રીનું મોટું નિવેદન સામે આવ્યું છે. પ્રાપ્ત માહિતી અનુસાર રાજ્યના આરોગ્ય મંત્રી ઋષિકેશ પટેલે જણાવ્યું કે, ત્રીજી લહેર આવે તેવા એંધાણ દેખાઈ રહ્યા છે. જેને પગલે રાજ્ય સરકાર સજ્જ છે. હોસ્પિટલમાં આઈસીયુ બેડ સહિત તમામ વ્યવસ્થા કરી દેવામાં આવી છે. જો કોરોનાની ત્રીજી લહેર આવે તો તેની સામે આરોગ્યલક્ષી તમામ વ્યવસ્થાઓ કરી દેવામાં આવી છે.
 

ઉલ્લેખનીય છે કે, કેસો વધતા રાજ્યમાં કોરોનાની સંભવિત ત્રીજી લહેરને લઇને અનેક ધારણાઓ કરવામાં આવતી હતી, ત્યારે રાજ્યના આરોગ્યમંત્રીએ મહેસાણામાં આ વિશે ખુલાસો કર્યો છે. કોરોનાના કેસ સતત વધી રહ્યા છે, ત્યારે હવે ખુદ આરોગ્યમંત્રી ખુદ ત્રીજી લહેર આવે તેવી શક્યતા જણાવી રહ્યા છે. જેથી લોકોએ ભીડભાડવાળી જગ્યાએ જવાનું ટાળવું જોઈએ, જાહેરમાં માસ્ક અને સોશિયલ ડિસ્ટન્સિંગ સહિત કોરોનાની ગાઈડલાઈનનું પાલન કરવું ખૂબ જ જરૂરી છે.

મહેસાણા ખાતે આરોગ્ય મંત્રીએ જણાવ્યું કે, રાજ્ય સરકાર દ્વારા એક એપ્લિકેશન તૈયાર કરવામાં આવી છે. આ એપ્લિકેશનની મદદથી તમારી નજીકની કઇ હોસ્પિટલમાં બેડ ખાલી છે તેની માહિતી મળશે. ઓક્સિજન બેડ સહિત તમામ માહિતી આ એપ્લિકેશનની મદદથી લોકોને મળી રહેશે. નાગરિકોને હોસ્પિટલ શોધવા માટે અગવડ ના પડે તેવી વ્યવસ્થા આ એપમાં કરાઈ છે. ટૂંક સમયમાં એપ્લિકેશન પણ લોંચ કરવામાં આવશે.

ઓમિક્રોનના ભય વચ્ચે રાહતના સમાચાર
ગુજરાતમાં કોરોનાની જાણે ત્રીજી લહેરની અસર ધીમે-ધીમે વર્તાવાની શરૂ થઈ હોય એમ સતત બીજા દિવસે પણ નવા પોઝિટિવ કેસોના આંકડો 170ની ઉપર જળવાઈ રહ્યો છે. જો કે, આ દરમિયાન સારા સમાચાર પણ આવ્યા છે. જેમાં અમદાવાદ સિવિલમાં હોસ્પિટલમાં દાખલ ઓમિક્રોનના દર્દીને સારવાર બાદ ડિસ્ચાર્જ આપવામાં આવ્યો છે. ઉલ્લેખનીય છે કે, મૂળ આણંદના 48 વર્ષીય પ્રફુલ શાસ્ત્રી લંડનથી અમદાવાદ પહોંચ્યા બાદ એરપોર્ટ પર તેમનો કોરોનાનો રિપોર્ટ પોઝિટિવ આવ્યો હતો.

છેલ્લા 24 કલાકમાં રાજ્યમાં 177 કેસ
રાજ્યના આરોગ્ય વિભાગ દ્વારા જાહેર કરાયેલા આંકડા અનુસાર રવિવાર સાંજ સુધી રાજ્યમાં કોરોનાના નવા 177 કેસ નોંધાયા છે. જો કે, કોઈ દર્દીનું મોત થયું નથી. નવા નોંધાયેલા કેસોમાં 25 ટકા જેટલા કેસ તો એકલા અમદાવાદ શહેરમાં નોંધાયા છે.

Share This :

Related Articles

Leave a Comment