સ્પોર્ટ્સ / રાંચીમાં ભારત વિરુદ્ધ રમાયેલી બીજી ટી20 મેચમાં ન્યૂઝીલેન્ડના ઓપનર માર્ટિન ગુપ્ટિલે કોહલીનો રેકોર્ડ તોડી નાંખ્યો.

  • 20-Nov-2021 08:42 AM

રાંચીમાં રમાયેલી બીજી ટી20 ક્રિકેટ મેચમાં ન્યૂઝીલેન્ડના બેટ્સમેન માર્ટિન ગુપ્ટિલે ભારતના સ્ટાર બેટ્સમેન વિરાટ કોહલીના રેકોર્ડને તોડી નાંખ્યો છે. હવે તે આંતરરાષ્ટ્રીય ટી20 ક્રિકેટમાં સૌથી વધુ રન નોંધાવનારો બેટ્સમેન બની ગયો છે. મેચ શરૂ થઈ તે પહેલા ગુપ્ટિલને આ રેકોર્ડ નોંધાવવા માટે 11 રનની જરૂર હતી.

ભારતીય ટીમ પાસે ન્યૂઝીલેન્ડને શરૂઆતમાં જ ફટકો આપવાની તક આવી હતી. જોકે, લોન્ગ ઓન પર લોકેશ રાહુલે ગુપ્ટિલનો કેચ છોડ્યો હતો. ત્યારબાદ ગુપ્ટિલ આંતરરાષ્ટ્રીય ટી20માં સૌથી વધુ રન નોંધાવનારો બેટ્સમેન બન્યો હતો.

કોહલીએ આંતરરાષ્ટ્રીય ટી20માં 87 ઈનિંગ્સમાં 3227 રન નોંધાવ્યા છે જ્યારે ગુપ્ટિલે 3228 રન નોંધાવીને તેને પાછળ રાખી દીધો છે. જોકે, ન્યૂઝીલેન્ડના ઓપનરે અહીં સુધી પહોંચવા માટે 107 ઈનિંગ્સ રમી છે. સરેરાશના મામલે પણ તે વિરાટ કોહલીથી પાછળ છે. ગુપ્ટિલ ઓપનર છે અને તેણે 32.49ની સરેરાશથી રન નોંધાવ્યા છે. જ્યારે કોહલી 52.04ની સરેરાશ ધરાવે છે.

જયપુરમાં રમાયેલી પ્રથમ ટી20માં માર્ટિન ગુપ્ટિલે 70 રનની ધમાકેદાર ઈનિંગ્સ રમી હતી. વિરાટ કોહલી હાલમાં ન્યૂઝીલેન્ડ સામેની ત્રણ મેચની ટી20 શ્રેણીમાં રમી રહ્યો નથી. કોહલીએ ટી20 વર્લ્ડ કપ બાદ ભારતીય ટી20 ટીમનું સુકાની પદ છોડી દીધું છે. તેના સ્થાને રોહિત શર્માને સુકાની બનાવવામાં આવ્યો છે. હવે કોહલી પાસે સાઉથ આફ્રિકામાં રમાનારી ટી20 શ્રેણીમાં ગુપ્ટિલથી આગળ નીકળવાની તક હશે.

આ યાદીમાં ત્રીજા ક્રમે સુકાની અને ઓપનર રોહિત શર્માનું નામ છે. રોહિત શર્મા પણ આંતરરાષ્ટ્રીય ટી20માં 3000થી વધુ રન નોંધાવી ચૂક્યો છે. રોહિત શર્માએ આ ફોર્મેટમાં 109 ઈનિંગ્સમાં 3086 રન નોંધાવ્યા છે.

Share This :

Related Articles

Leave a Comment