સ્પોર્ટ્સ / અંડર 19 એશિયા કપઃ શ્રીલંકાને હરાવી ભારત સતત 8મી વખત બન્યું ચેમ્પિયન.

  • 01-Jan-2022 08:50 AM

અંડર 19 એશિયા કપમાં ભારતે ફરી એકવખત પોતાનો દબદબો જાળવી રાખ્યો છે. શુક્રવારે રમાયેલ એશિયા કપની ફાઈનલ મેચમાં ભારતે શ્રીલંકાને 9 વિકેટથી માત આપીને શાનદાર જીત હાંસલ કરી હતી. ભારત સતત આઠમી વખત અંડર 19 એશિયા કપ ચેમ્પિયન બન્યું છે. ભારતીય બોલર્સ શ્રીલંકન બેટર્સ પર ભારે પડ્યા હતા. જ્યારે દુબઈ ઈન્ટરનેશનલ સ્ટેડિયમમાં ભારે વરસાદને કારણે મેચ બે કલાક સુધી સ્થગિત કરવામાં આવી હતી તે સમયે શ્રીલંકાનો સ્કોર 33 ઓવરમાં 7 વિકેટના નુકસાન પર 74 રન હતો.

વરસાદ બાદ જ્યારે ફરીથી મેચ શરૂ કરવામાં આવી ત્યારે મેચ 38 ઓવરની કરી દેવામાં આવી હતી. પ્રથમ બેટિંગ કરતાં શ્રીલંકાની ટીમે 38 ઓવરના અંતે 9 વિકેટના નુકસાન પર 106 રન બનાવ્યા હતા. જે બાદ ડીએલએસ મેથડના આધારે 38 ઓવરના અંતે ભારતને 102 રનોનો ટાર્ગેટ મળ્યો હતો. જે ભારતીય ટીમે 21.3 ઓવરના અંતે 1 વિકેટના નુકસાન પર સરળતાથી હાંસલ કરી દીધો હતો.

ટીમ ઈન્ડિયા તરફથી ઓપનર અંગક્રિશ રઘુવંશીએ શાનદાર બેટિંગ કરી હતી. તેણે 67 બોલમાં 7 ચોગ્ગાની મદદથી 56 રન બનાવીને અણનમ રહ્યો હતો. જ્યારે બીજો ઓપનર હરનૂર સિંહ 5 રન બનાવીને આઉટ થઈ ગયો હતો. જો કે શેક રશીદે 31 રન બનાવીને ભારતને એશિયા કપની ફાઈનલમાં શાનદાર જીત અપાવી હતી.

અગાઉ ટોસ જીતીને શ્રીલંકાએ બેટિંગ કરવાનો નિર્ણય કર્યો હતો. સવારના સમયે થયેલ વરસાદને કારણે સીમ બોલિંગની સ્થિતિને અનુકૂળ બનાવી દીધી હતી. ભારતના પેસ બોલર્સ રાજવર્ધન હંગરગેકર અને રવિ કુમારે શ્રીલંકાની ટીમ પર દબાણ ઉભું કર્યું હતું. પણ ભારત તરફથી સ્પિનર જોડી વિક્કી ઓસ્તવાલ અને કૌશલ તિમ્બેએ કમાલની બોલિંગ કરી હતી. વિક્કીએ 11 રન આપીને 3 વિકેટ ઝડપી હતી, જ્યારે કૌશલે 23 રન આપીને 2 વિકેટ ઝડપી હતી.


શ્રીલંકા તરફથી બેટર્સનું ખરાબ પ્રદર્શન જોવા મળ્યું હતું. ઓપનર ચામિન્ડુ 2 રન પર તો શેવોન ડેનિયલ 6 રન બનાવીને આઉટ થયો હતો. જે બાદ ત્રીજા ક્રમે વિકેટકીપર અંજાલા 9 રન બનાવીને તો, ચોથા ક્રમે સદિશા રાજપક્ષે 14 રન બનાવીને પેવેલિયન પરત ફર્યો હતો. જે બાદ પવન 4 રન, રાનુડા 7 રન, કેપ્ટન વેલ્લાલગે 9 રન, રવીન ડી સિલ્વા 15 રન, યસિરુ 19 અને મથીશા 14 રન બનાવીને આઉટ થયો હતો.

Share This :

Related Articles

Leave a Comment