સ્પોર્ટ્સ / 'BCCIમાં તમામ લોકોએ કોહલીને ટી20 કેપ્ટન તરીકે યથાવત રહેવાનું કહ્યું હતું'.

  • 01-Jan-2022 08:52 AM

ભારતીય વન-ડે ક્રિકેટ ટીમની કેપ્ટનસીને લઈને વિવાદ થયો હતો આ અંગે ભારતીય પસંદગી સમિતિના ચેરમેન ચેતન શર્માએ પણ વાત રજૂ કરી છે. ચેતન શર્માએ શુક્રવારે જણાવ્યું હતું કે પસંદગી સમિતિએ કોહલીને ટી20 ટીમનું સુકાની પદ ન છોડવાનું કહ્યું હતું.

તેમણે કહ્યું હતું કે, વર્લ્ડ કપ અગાઉ જ્યારે બેઠક શરૂ થઈ હતી ત્યારે અમારા માટે તેનો નિર્ણય આશ્ચર્યજનક હતો. અમે બધાએ તેને તેના નિર્ણય અંગે ફરીથી વિચાર કરવાનું કહ્યું હતું. તમામ પસંદગીકારોનું માનવું હતું કે તેનાથી વર્લ્ડ કપમાં ભારતના પ્રદર્શન પર અસર પડશે. બોર્ડના તમામ લોકોએ કોહલીને સુકાની પદે યથાવત રહેવાનું કહ્યું હતું. તમામ લોકો આઘાતમાં હતા.


ચેતન શર્માની આગેવાનીવાળી પસંદગી સમિતિએ શુક્રવારે સાઉથ આફ્રિકા સામે રમાનારી વન-ડે શ્રેણી માટે ટીમની જાહેરાત કરી હતી. આ શ્રેણી માટે ટીમનું નેતૃત્વ લોકેશ રાહુલને સોંપવામાં આવ્યું છે. કોહલીના સ્થાને વન-ડે ટીમના સુકાની બનેલા રોહિત શર્માને ઈજા થઈ છે. જેના કારણે તે શ્રેણીમાંથી બહાર થઈ ગયો છે.

ચેતન શર્માએ જણાવ્યું હતું કે, પસંદગીકારોથી લઈને બોર્ડના અધિકારીઓએ કોહલીને વર્લ્ડ કપ પૂરો થાય ત્યાં સુધી ટી20 કેપ્ટનસી અંગે રાહ જોવાનું કહ્યું હતું. વર્લ્ડ કપ શરૂ થવાનો હતો ત્યારે કોહલીએ જાહેરાત કરી હતી કે તે ટી20 ટીમનું સુકાની પદ છોડી દેશે. બોર્ડના તમામ સભ્યોએ તેને ફરીથી વિચારવાનું કહ્યું હતું. ત્યારે તેને તે કહેવાનો સમય ન હતો કે જો તું એક ફોર્મેટ છોડી દઈશ તો તારે બીજું ફોર્મેટ પણ છોડી દેવું પડશે.

કોહલી અને રોહિત વચ્ચે તકરાર હોવાની વાતો અંગે પૂછતા ચેતન શર્માએ કહ્યું હતું કે, ખોટી ચર્ચાઓ ન ઊભી કરશો. હું છેલ્લા 20 વર્ષથી મીડિયાનો હિસ્સો રહ્યો છું. હું આવી અટકળોને હસી કાઢુ છું. તેઓ એક સાથે મળીને એક ટીમ અને પરિવારની જેમ કામ કરી રહ્યા છે.

Share This :

Related Articles

Leave a Comment