સ્પોર્ટ્સ / સેન્ચ્યુરિયનમાં ટીમ ઈન્ડિયાએ ઈતિહાસ રચ્યો હોવા છતાં થયું નુકસાન, દંડ ફટકારાયો.

  • 01-Jan-2022 09:30 AM

ભારતે સેન્ચ્યુરિયનમાં રમાયેલી પ્રથમ ટેસ્ટ ક્રિકેટ મેચમાં યજમાન સાઉથ આફ્રિકા સામે 113 રને ભવ્ય વિજય નોંધાવ્યો. સેન્ચ્યુરિયનમાં ભારતનો આ પ્રથમ ટેસ્ટ વિજય છે. જોકે, આ મેચમાં ધીમા ઓવર રેટ બદલ ભારતીય ટીમને મેચ ફીના 20 ટકા દંડ ફટકારવામાં આવ્યો છે.

ઈન્ટરનેશનલ ક્રિકેટ કાઉન્સિલે જણાવ્યું છે કે સ્લો ઓવર રેટ માટે ભારતને આઈસીસી મેન્સ વર્લ્ડ ટેસ્ટ ચેમ્પિયનશિપમાં એક પોઈન્ટનું નુકસાન પણ થયું છે. આમ ભારતને મેચ ફીના 20 ટકા દંડ ઉપરાંત એક પોઈન્ટ પણ ગુમાવવો પડ્યો છે.

આઈસીસી એલિટ પેનલના મેચ રેફરી એન્ડ્રુ પાઈક્રોફ્ટે નિર્ધારીત સમયમાં એક ઓવર ઓછી કરવા બદલ ભારતીય ટીમ પર દંડ ફટકાર્યો છે. આઈસીસીની ખેલાડીઓ અને ટીમના સહયોગી સભ્યો માટેની આચાર સંહિતાના સ્લો ઓવર રેટ માટેના નિયમ પ્રમાણે જો કોઈ ટીમ નિર્ધારીત સમયમાં નક્કી કરવામાં આવેલી ઓવર કરવામાં નિષ્ફળ રહે છે તો ખેલાડીઓ પર પ્રત્યેક ઓવર માટે તેમની મેચ ફીના 20 ટકાનો દંડ ફટકારવામાં આવે છે.

સુકાની વિરાટ કોહલીએ આરોપ સ્વીકારી લીધો હતો અને તેથી ઔપચારિક સુનાવણીની જરૂર પડી ન હતી. મેદાન પર હાજર અમ્પાયર મારિયસ ઈરાસમસ તથા એડ્રિયન હોલ્ડસ્ટોક ઉપરાંત થર્ડ અમ્પાયર અલાઉદ્દીન પાલેકર તથા ફોર્થ અમ્પાયરે ટીમને દોષિત ઠેરવી હતી.
 

'ભારતે સાઉથ આફ્રિકા સામે પ્રથમ ટેસ્ટમાં 113 રને વિજય નોંધાવીને ત્રણ ટેસ્ટ મેચની સીરિઝમાં 1-0ની સરસાઈ મેળવી લીધી છે. આ સાથે ભારતે સાઉથ આફ્રિકામાં ઈતિહાસ રચવાની પોતાની તકને પણ ઉજ્જવળ બનાવી દીધી છે. જો ભારતે આ સીરિઝ જીતવામાં સફળ રહે છે તો સાઉથ આફ્રિકન ધરતી પર તેનો પ્રથમ ટેસ્ટ શ્રેણી વિજય હશે. પ્રથમ દાવમાં 123 રનની ઈનિંગ્સ રમનારા લોકેશ રાહુલને પ્લેયર ઓફ ધ મેચ જાહેર કરાયો હતો. ભારતની જીતમાં ઝડપી બોલર્સે પણ મહત્વનું યોગદાન આપ્યું હતું. જેમાં મોહમ્મદ શમીએ પ્રથમ દાવમાં પાંચ અને બીજા દાવમાં ત્રણ એમ કુલ આઠ વિકેટ ઝડપી હતી.

Share This :

Related Articles

Leave a Comment