વર્લ્ડ / કોરોના: મહારાષ્ટ્ર સરકારે કડક પ્રતિબંધોમાં કર્યા થોડા ફેરફાર.

  • 10-Jan-2022 11:21 AM

 મહારાષ્ટ્ર્રમાં કોવિડ-19ના વધતા કેસોને જોતા રાજ્ય સરકારે કોરોના પ્રતિબંધોમાં ઘણા નવા ફેરફાર કર્યા છે. રવિવારે જાહેર કરેલી નવી ગાઈડલાઈન મુજબ બ્યૂટી સલુનને વાળ કાપતા સલુન સાથે જોડવામા આવશે અને 50 ટકા ક્ષમતા સાથે ખૂલ્લા રહેવા દેવાશે. જિમ 50 ટકા ક્ષમતા સાથે ખુલશે. માત્ર વેક્સિનેટેડ વ્યક્તિઓને જ આ સેવાઓનો ઉપયોગ કરવાની મંજૂરી હશે. શનિવારે તેને બંધ રાખવાનો આદેશ અપાયો હતો. નવી ગાઈડલાઈન્સ પહેલાની જેમ જ 10 જાન્યુઆરીથી લાગુ કરાશે.

નવી ગાઈડલાઈન મુજબ, મહારાષ્ટ્રમાં રાત્રે 11 વાગ્યાથી સવારે 5 સવાર સુધી નાઈટ કર્ફ્યુ રહેશે. સવારે 5 કલાકથી રાત્રે 11 કલાક સુધી કલમ 144 લાગુ રહેશે. એટલે કે, દિવસમાં એક સાથે, એક જગ્યાએ પાંચ કે તેનાથી વધુ લોકો એકઠા નહીં થઈ શકે. નવા પ્રતિબંધો અંતર્ગત સ્કૂલ-કોલેજ આજથી 15 ફેબ્રુઆરી સુધી બંધ કરી દેવાયા છે. સ્કૂલની ઓફિસને ખોલવાની મંજૂરી અપાઈ છે. કામ વિના ઘરની બહાર નીકળવા પર પ્રતિબંધ રહેશે.

આ ઉપરાંત મેદાન, ગાર્ડન, ટુરિસ્ટ પ્લેસીઝ, સ્વિમિંગ પુલ, વેલનેસ સેન્ટર આગામી આદેશ સુધી સંપૂર્ણ રીતે બંધ કરી દેવાયા છે. કિલ્લા, મ્યૂઝિયમ, એન્ટરટેઈનમેન્ટ પાર્ક પણ આગામી આદેશ સુધી બંધ રહેશે. શનિવારે જિમ અને બ્યુટી પાર્લરને સંપૂર્ણ રીતે બંધ કરવાની ગાઈડલાઈન્સ બહાર પડાઈ હતી, જેમાં હવે ફેરફાર કરાયો છે. રવિવારે બપોરે બહાર પડાયેલી નવી ગાઈડલાઈન મુજબ, જિમ અને બ્યુટી પાર્લરને 50 ટકા ક્ષમતાની સાથે શરૂ રાખવાની મંજૂરી અપાઈ છે.

સરકારી આદેશમાં કહેવાયું છે કે, તે ઉપરાંત જરૂરી સેવાઓને છોડીને રાત્રે 11 વાગ્યાથી સવારે પાંચ વાગ્યા સુધી લોકોની અવર-જવરની મંજૂરી નહીં અપાય. 10મી અને 12મીના વિદ્યાર્થીઓ માટે જરૂરી ગતિવિધિઓ અને શિક્ષકોની વહીવટી ગતિવિધિઓને છોડીને સ્કૂલ અને કોલેજ 15 ફેબ્રુઆરી સુધી બંધ રહેશે. ઓફિસ પ્રમુખોની લેખિત મંજૂરી વિના સરકારી કાર્યાલયોમાં કોઈને આવવાની મંજૂરી અપાશે નહીં.


તે સાથે જ લગ્ન અને સામાજિક, ધાર્મિક, સાંસ્કૃતિક કે રાજકીય સમારંભોમાં લોકોની વધુમાં વધુ મર્યાદા 50 નક્કી કરાઈ છે. અંતિમ સંસ્કારમાં 20થી વધુ લોકો સામેલ નહીં થઈ શકે. સ્વિમિંગ પૂલ, જિમ, સ્પા, વેલનેસ સેન્ટર અને બ્યુટી સલુન સંપૂર્ણ રીતે બંધ રહેશે. હેર કટિંગ સલુન 50 ટકા ક્ષમતા પર કામ કરશે.

Share This :

Related Articles

Leave a Comment