ગુજરાત / ગુજરાતમાં કોરોનાના નવા 6097 અને ઓમિક્રોનના 28 કેસ નોંધાયા, બેના મોત.

  • 11-Jan-2022 08:23 AM

ગુજરાતમાં કોરોના વાયરસનો કહેર વધી રહ્યો છે તેવામાં રાજ્યમાં સળંગ બીજા દિવસે 6000થી વધુ કેસ નોંધાયા છે. રાજ્યમાં છેલ્લા 24 કલાકમાં કોરોનાના 6097 કેસ નોંધાયા છે. જોકે, આ કેસ ગઈ કાલના કેસની સરખામણીએ નજીવા ઓછા છે. રવિવારે રાજ્યમાં 6275 કેસ નોંધાયા હતા. છેલ્લા 24 કલાકમાં 1539 દર્દીઓ સાજા થયા છે અને બે દર્દીઓના મોત થયા છે. આજે 3,82,777 લોકોના રસીકરણ સાથે જ રાજ્યમાં અત્યાર સુધી 9,35,01,594 લોકોએ કોરોના વેક્સિન લીધી છે.

હાલમાં ગુજરાત સહિત સમગ્ર દેશમાં કોરોનાના કેસ વધી રહ્યા છે પરંતુ હોસ્પિટલાઈઝેશનનું પ્રમાણ તથા મૃત્યુઆંક પ્રમાણમાં ઘણો ઓછો છે. પરંતુ તેના કારણે લોકોએ તેને હળવાશથી લેવાની જરૂર નથી તેમ નિષ્ણાતો વારંવાર કહી રહ્યા છે. ગુજરાતમાં પણ આ પ્રમાણ ઓછું છે. રાજ્યમાં 1539 દર્દીઓ સાજા થયા છે અને રિકવરી રેટ 95.09 ટકા નોંધાયો છે. હાલમાં રાજ્યમાં 32469 એક્ટિવ કેસ છે જેમાંથી 29 દર્દીઓ વેન્ટિલેટર પર છે. જ્યારે અત્યાર સુધી કુલ 8,25,702 દર્દીઓ સાજા થયા છે. જ્યારે મૃત્યુઆંક 10130 પર પહોંચ્યો છે.

રાજ્યમાં અમદાવાદ કોર્પોરેશન અને સુરત કોર્પોરેશનમાં કોવિડ-19ના સૌથી વધુ કેસ નોંધાઈ રહ્યા છે. અમદાવાદ કોર્પોરેશનમાં 1893 નવા કેસ નોંધાયા છે અને 631 દર્દીઓ સાજા થયા છે. જ્યારે સુરત કોર્પોરેશનમાં 1778 કેસ નોંધાયા છે જ્યારે 360 દર્દીઓ ડિસ્ચાર્જ થયા છે. રાજ્યમાં જ્યાં ત્રણ આંકડામાં કેસ નોંધાઈ રહ્યા છે તેમાં વડોદરા કોર્પોરેશનમાં 410, વલસાડમાં 251, રાજકોટ કોર્પોરેશનમાં 191, ગાંધીનગર કોર્પોરેશનમાં 131, ખેડામાં 126, સુરતમાં 114, મહેસાણામાં 111, કચ્છમાં 109 અને નવસારીમાં 107 કેસ નોંધાયા છે.


રાજ્યમાં ઓમિક્રોનની વિગત
ગુજરાતમાં ઓમિક્રોનના 28 નવા કેસ સામે આવ્યા છે જ્યારે 37 દર્દીઓ સાજા થયા છે. અમદાવાદ કોર્પોરેશનમાં પાંચ, આણંદમાં ચાર, ગાંધીનગર કોર્પોરેશનમાં પાંચ, વડોદરા કોર્પોરેશનમાં નવ, કચ્છમાં બે, ગાંધીનગરમાં એક તથા રાજકોટ કોર્પોરેશનમાં બે કેસ સામે આવ્યા છે. રાજ્યમાં અત્યાર સુધી ઓમિક્રોનના કુલ 264 કેસ નોંધાયા છે જ્યારે 223 દર્દીઓ સાજા થયા છે. હાલમાં 41 દર્દીઓ સારવાર હેઠળ છે. રાજ્યમાં ઓમિક્રોનથી અત્યાર સુધી એક પણ મોત નોંધાયું નથી.

ફક્ત 5થી 10 ટકાને જ હોસ્પિટલમાં દાખલ કરવાની જરૂર પડી છેઃ કેન્દ્ર
દેશમાં કોરોનાના અને કોરોનાના નવા વેરિયન્ટ ઓમિક્રોનના સતત વધી રહેલા કેસો વચ્ચે કેન્દ્રએ સોમવારે જણાવ્યું કે, આ વખતે અત્યાર સુધીના સક્રિય કોવિડ કેસોમાંથી 5થી 10 ટકાને હોસ્પિટલમાં દાખલ કરવાની જરૂર પડી રહી છે, પરંતુ આ સ્થિતિ ઝડપથી બદલાઈ શકે છે. સાથે જ રાજ્યોને હોમ આઈસોલેશનમાં અને હોસ્પિટલોમાં રહેલા કેસો પર નજર રાખવા જણાવ્યું છે.

Share This :

Related Articles

Leave a Comment