બોલીવુડ / સોનુ સૂદની બહેન કોંગ્રેસમાં જોડાયા, નવજોત સિંહ સિદ્ધુએ કહ્યું- 'ગેમ ચેન્જર'

  • 11-Jan-2022 08:38 AM

બોલીવૂડ સ્ટાર સોનુ સૂદની બહેન માલવિકા સૂદ કોંગ્રેસમાં જોડાયા છે. પંજાબ વિધાન સભાની ચૂંટણી અગાઉ માલવિકા કોંગ્રેસમાં જોડાયા છે. તેઓ કોંગ્રેસ તરફથી ચૂંટણી લડશે. પંજાબમાં એક જ તબક્કામાં ચૂંટણી યોજાવાની છે. જ્યાં 14 ફેબ્રુઆરીએ મતદાન થશે અને 10 માર્ચે મતગણતરી હાથ ધરવામાં આવશે.
 

કોરોનાકાળ દરમિયાન સોનુ સૂદે અસંખ્ય લોકોની મદદ કરી હતી અને તેના કારણે તેની ભરપૂર પ્રશંસા પણ થઈ હતી. સોનુ સૂદે કહ્યું છે કે તે પોતાની બહેનનું સમર્થન કરે છે. નોંધનીય છે કે ગત વર્ષે નવેમ્બરમાં સોનુ સૂદે જાહેરાત કરી હતી કે તેની બહેન ચૂંટણી લડશે પરંતુ કયા પક્ષ તરફથી લડશે તે અંગે તેણે કોઈ ખુલાસો કર્યો ન હતો

પંજાબ કોંગ્રેસ પ્રમુખ નવજોત સિંહ સિદ્ધુએ આને ગેમ ચેન્જર વાત ગણવી છે. જ્યારે માલવિકાએ સૂદે જણાવ્યું હતું કે, તે લોકોની સેવા કરવા માટે રાજકારણમાં આવી રહ્યા છે. માલવિકા સૂદ પંજાબના મુખ્યમંત્રી ચરનજીત સિંહ ચન્ની અને સિદ્ધુની હાજરીમાં કોંગ્રેસમાં જોડાયા હતા. સિદ્ધુએ જણાવ્યું હતું કે, આ ઘણી અનોખી વાત છે કે પાર્ટી પ્રમુખ અને મુખ્યમંત્રી કોઈના ઘરે જઈને તેને પાર્ટીમાં સામેલ કર્યા છે.

પંજાબ યુથ કોંગ્રેસે એક તસ્વીર ટ્વિટ કરી હતી જેમાં સોનુ સૂદ અને તેની બહેન નવજોત સિંહ સિદ્ધુ સાથે જોવા મળે છે. આ ફોટો સાથે લખવામાં આવ્યું હતું કે, પિક્ચર ઓફ ધ ડે. પંજાબ પોતાને ભવિષ્ય માટે તૈયાર કરી રહ્યું છે.

નોંધનીય છે કે 2017ની વિધાનસભા ચૂંટણીમાં કોંગ્રેસે પંજાબમાં બહુમતી સાથે વિજય મેળવ્યો હતો. કોંગ્રેસે અકાલી દળ-ભાજપ સરકારના 10 વર્ષના શાસનનો અંત લાવ્યો હતો અને સત્તા મેળવી હતી. આમ આદમી પાર્ટીએ 20 બેઠકો પર વિજય મેળવ્યો હતો અને તે બીજા ક્રમે રહી હતી. જ્યારે શિરોમણી અકાલી દળને ફક્ત 15 અને ભાજપને ફક્ત ત્રણ જ બેઠકો મળી હતી.

Share This :

Related Articles

Leave a Comment