ગુજરાત / મુંબઈમાં ડેઈલી કેસનો આંકડો 20 હજારને પાર, પરંતુ આ તો હજુ શરુઆત છે!!

  • 11-Jan-2022 09:05 AM

સેકન્ડ વેવના ડેઈલી કેસના રેકોર્ડને પાર કરી ચૂકેલા મુંબઈમાં કોરોનાના કેસોમાં આગામી દિવસોમાં હજુય મોટો વધારો થવાની પૂરી શક્યતા છે. ગુરુવારે મુંબઈમાં નવા કેસોનો આંકડો 20 હજારને પાર પહોંચી ગયો હતો. શહેરમાં 1170 નવા દર્દીઓને એડમિટ કરવામાં આવ્યાં હતાં જેમાંથી 106 દર્દીને ઓક્સિજન સપોર્ટ પર રખાયાં હતાં. મુંબઈમાં ઉપલબ્ધ 2636 ICU બેડમાંથી 25 ટકા ભરાઈ ચૂક્યા છે, જ્યારે સમગ્ર બેડ ઓક્યુપન્સી 17 ટકા વધી છે. ચિંતાની વાત એ છે કે, ધારાવીમાં કોરોના ફરી પ્રસર્યો છે. ગુરુવારે અહીં એક જ દિવસમાં અત્યારસુધીના સૌથી વધુ 107 કેસ નોંધાતા કોર્પોરેશનના અધિકારીઓ દોડતા થઈ ગયા છે.

કોર્પોરેશનના અધિકારીઓનું માનવું છે કે, શહેરમાં ડેઈલી કેસનો આંકડો 31.7 ટકાના દરે વધી રહ્યો છે. જેને જોતાં કહી શકાય કે, આગામી થોડા જ દિવસોમાં રોજના કેસનો આંક 40 હજારથી પણ વધી જશે. અગાઉ તંત્રનો અંદાજ હતો કે, રોજેરોજ નોંધાતા કેસની પીક 20 હજાર સુધી રહેશે, પરંતુ તે સ્તર પર મુંબઈ ઘણું વહેલું પહોંચી ગયું છે. શહેરના એડિશનલ મ્યુનિસિપલ કમિશનર સુરેશ કાકાણીના જણાવ્યા અનુસાર એક્ટિવ કેસનો આંકડો 79,260 પર પહોંચી ગયો છે. સેકન્ડ વેવમાં એક્ટિવ કેસની સર્વોચ્ચ સપાટી 91,100 હતી પરંતુ આગામી 24 કલાકમાં જ શહેરના એક્ટિવ કેસ સેકન્ડ વેવની પીકને વટાવી જશે.

કાકાણીના જણાવ્યા અનુસાર, કેસો ખૂબ ઝડપથી વધી રહ્યા છે, પરંતુ હાલ ગભરાવવાની જરુર નથી. કારણકે, 85 ટકા જેટલા દર્દીઓમાં કોઈ લક્ષણ નથી દેખાઈ રહ્યા. માંડ પાંચ ટકા દર્દીને હોસ્પિટલમાં એડમિટ કરવાની જરુર પડે છે. પ્રાઈવેટ હોસ્પિટલમાં ICU બેડની તંગી અંગે તેમણે કહ્યું હતું કે, આ સ્થિતિમાં શક્ય છે કે લોકોને પોતાની ચોઈસ અનુસારના સિંગલ, ડબલ કે ડિલક્સ રુમ કદાચ ના મળે. તેમણે આવા લોકોને અપીલ કરી હતી કે તેઓ રુમની પસંદગી કરતાં ટ્રીટમેન્ટને વધારે મહત્વ આપે.
મહારાષ્ટ્રમાં કોરોના ઝડપથી પ્રસરી રહ્યો છે ત્યારે રાજ્યના આરોગ્ય મંત્રી રાજેશ ટોપેએ સ્પષ્ટતા કરી હતી કે મુંબઈમાં લોકલ ટ્રેનો બંધ નહીં થાય. હાલ રાજ્યમાં કે કોઈ ચોક્કસ જિલ્લામાં લોકડાઉન લાગુ કરવાનો પણ વિચાર નથી. જોકે, વીકેન્ડ અને નાઈટ કર્ફ્યુ અંગે વિચારણા ચાલી રહી છે. જેના પર આખરી નિર્ણય સીએમ દ્વારા લેવામાં આવશે. રાજ્ય સરકારના અધિકારીઓનો પણ દાવો છે કે, દર્દી ભલે વધી રહ્યા હોય પરંતુ બીજી લહેરની માફક ઓક્સિજનની ડિમાન્ડમાં કોઈ મોટો ઉછાળો જોવા નથી મળ્યો.

રાજ્ય સરકારના સર્વેલન્સ ઓફિસર પ્રદીપ અવાતેના જણાવ્યા અનુસાર, સેકન્ડ વેવમાં 85,144 એક્ટિવ કેસ હતા ત્યારે 11 ટકા દર્દી ઓક્સિજન અને વેન્ટિલેટર પર હતા. જ્યારે હાલ 87,505 એક્ટિવ કેસ છે જેની સામે ઓક્સિજન અને લાઈફ સપોર્ટ સિસ્ટમ પર હોય તેવા દર્દીઓનું પ્રમાણ માંડ ચાર ટકા છે. મહારાષ્ટ્રમાં નવા આવી રહેલા કેસોમાંથી 84 ટકા માત્ર મુંબઈમાં જ નોંધાઈ રહ્યા છે. બીજી તરફ, રાહતની વાત એ છે કે, સતત વધતા જતા કેસ વચ્ચે પણ મૃત્યુઆંક ખૂબ જ નીચો જળવાઈ રહ્યો છે.

Share This :

Related Articles

Leave a Comment