ગુજરાત / ગુજરાતમાં વધતા કોરોનાના કેસો વચ્ચે લગ્ન પ્રસંગમાં 150 વ્યક્તિની જ છૂટ.

  • 12-Jan-2022 09:10 AM

ગુજરાતમાં છેલ્લા 24 કલાકમાં કોરોના વાયરસના નવા 7476 કેસો નોંધાયા છે અને 3ના મોત થયા છે. ત્યારે રાજ્યના મુખ્યમંત્રી ભૂપેન્દ્ર પટેલના અધ્યક્ષસ્થાને મળેલી કોર કમિટીની બેઠકમાં રાજ્યના નાગરિકોના વ્યાપક આરોગ્ય હિતમાં કેટલાંક મહત્વના નિર્ણય લેવામાં આવ્યા છે.

કોર કમિટીમાં લેવાયેલા આ નિર્ણય મુજબ રાજ્યમાં તમામ પ્રકારના રાજકીય, સામાજિક, શૈક્ષણિક, સાંસ્કૃતિક, ધાર્મિક કાર્યક્રમો જેવા કે જાહેર સમારંભો અને મેળાવડાઓમાં વધુમાં વધુ 150 વ્યક્તિઓની મર્યાદા રહેશે. જ્યારે બંધ સ્થળોએ યોજાતા આવા સમારોહમાં જગ્યાની ક્ષમતાના 50% પરંતુ, વધુમાં વધુ 150 વ્યક્તિઓની સંખ્યામાં યોજી શકાશે.

q7
રાજ્યમાં લગ્ન સમારોહ માટે ખુલ્લી જગ્યામાં 150 વ્યક્તિઓની મર્યાદામાં યોજી શકાશે. આવા લગ્ન સમારોહ બંધ જગ્યાએ યોજાય ત્યારે જગ્યાની ક્ષમતાના 50% પરંતુ વધુમાં વધુ 150 વ્યક્તિઓની મર્યાદામાં યોજવાના રહેશે. લગ્નપ્રસંગ માટે DIGITAL GUJARAT PORTAL પર નોંધણી કરાવાની રહેશે. રાજ્ય સરકાર દ્વારા કોરોના સંક્રમણ નિયંત્રણ સંદર્ભે જાહેર કરવામાં આવેલી ગૃહ વિભાગની માર્ગદર્શિકાની અન્ય બાબતો આગામી 22 જાન્યુઆરી 2022ના સવારે 06:00 વાગ્યા સુધી અમલમાં રહેશે.

અહીં નોંધનીય છે કે સમગ્ર દેશમાં કોરોનાની ત્રીજી લહેર શરૂ થઈ ગઈ હોવાનું માનવામાં આવી રહ્યું છે ત્યારે જાન્યુઆરીમાં જે લોકોએ લગ્ન લીધા હતા તેઓની ચિંતામાં વધારો થયો છે. સાથે-સાથે લોકડાઉન પછી માંડ-માંડ ઊભી થયેલી વેડિંગ ઈન્ડસ્ટ્રીને પણ નુકસાનની ચિંતા સતાવી રહી છે. કારણકે જાન્યુઆરી અને ફેબ્રુઆરીને લગ્નની સિઝન માનવામાં આવે છે. ગત વર્ષે નવેમ્બર અને ડિસેમ્બર મહિનો વેડિંગ ઈન્ડસ્ટ્રી માટે સારો રહ્યો હતો. પણ, હવે કોરોનાની ત્રીજી લહેર શરૂ થતાં વેડિંગ ઈન્ડસ્ટ્રીને નુકસાન થવાની ચિંતા સતાવી રહી છે.

એક ન્યૂઝ રિપોર્ટ મુજબ, દેશમાં અત્યારે કોરોનાની ત્રીજી લહેર શરૂ થતાં કેસો વધતાં ઘણાં લગ્નપ્રસંગો મુલતવી રાખવામાં આવી રહ્યા છે. લોકો લગ્નની તારીખ બદલાવી રહ્યા છે જ્યારે કેટલાંક લોકોએ તો લગ્ન કેન્સલ કર્યા હોવાનું પણ જાણવા મળી રહ્યું છે. કોરોનાના કેસો વધતાં પ્રસંગમાં મહેમાનોની ચોક્કસ સંખ્યા નક્કી કરાતા લોકો હવે લગ્ન માટે પાર્ટી પ્લોટ્સની જગ્યાએ હોટેલ અને બેન્ક્વેટ તરફ વળ્યા છે.

આ સાથે જ વેડિંગ ઈન્ડસ્ટ્રી સાથે જોડાયેલા લોકો જેવા કે વેડિંગ પ્લાનર, હોટેલ અને બેન્ક્વેટ, કંકોત્રી અને ડેકોરેશનવાળા, કેટરિંગના લોકોને નુકસાનની ચિંતા સતાવી રહી છે. કોરોનાના કેસો વધતા કેટલાંક લોકો સાદગીપૂર્વક લગ્નનું આયોજન કરવાનું વિચારી રહ્યા છે જ્યારે કેટલાંક લોકોએ તો મેરેજ પહેલાના ફંક્શન જેવા કે સંગીત સેરેમનીને રદ કર્યા છે. એક ન્યૂઝ રિપોર્ટ મુજબ, અમદાવાદમાં જે પરિવારોએ જાન્યુઆરી મહિનાની 20, 22 અને 23 તારીખે લગ્નપ્રસંગનું આયોજન કર્યું હતું તે પૈકી 50 ટકા સુધીના લગ્નપ્રસંગો મુલતવી રાખવામાં આવ્યા છે. કોરોનાના કેસો ક્યાં જઈને અટકશે તે વિશે કોઈ ચોક્કસ જાણકારી નહીં હોવાથી આગામી ફેબ્રુઆરી મહિનાના પણ 50 ટકા લગ્ન આગળની તારીખે ખેંચાય તેવી શક્યતાઓ રહેલી છે.

Share This :

Related Articles

Leave a Comment