રાજકારણ / કેન્દ્રીય મંત્રી નિતિન ગડકરી કોરોના પોઝિટિવ, ટ્વિટ કરી આપી જાણકારી.

  • 12-Jan-2022 09:16 AM

 કેન્દ્રીય માર્ગ પરિવહન અને હાઈવે મંત્રી નિતિન ગડકરી કોરોના સંક્રમિત થઈ ગયા છે. કોરોના રિપોર્ટ પોઝિટિવ આવ્યા પછી તેમણે પોતાને આઈસોલેટ કરી લીધા છે. 64 વર્ષના ભાજપના નેતાએ મંગળવારે ટ્વિટર પર આ જાણકારી આપી હતી. ગડકરીમાં હાલ કોરોનાના હળવા લક્ષણો છે.

ગડકરીએ ટ્વિટર પર લખ્યું કે, 'હું આજે હળવા લક્ષણો સાથે કોવિડ-19 પોઝિટિવ આવ્યો છું. બધા જરૂરી પ્રોટોકોલનું પાલન કરતા મેં પોતાને આઈસોલેટ કરી લીધો છે અને હું હોમ ક્વારન્ટાઈન છું. મારા સંપર્ક આવેલા લોકોને અનુરોધ કરું છું કે, પોતાને આઈસોલેટ કરી ટેસ્ટ કરાવે.'


બીજી તરફ સોમવારે ભાજપના રાષ્ટ્રીય અધ્યક્ષ જેપી નડ્ડા પણ કોરોના સંક્રમિત હોવાનું બહાર આવ્યું હતું. તે ઉપરાંત સંરક્ષણ મંત્રી રાજનાથ સિંહ પણ કોરોના વાયરસથી સંક્રમિત થયા છે. તેઓ હોમ ક્વારન્ટાઈન છે.

ભારતના સ્વરસામ્રાજ્ઞી કહેવાતા ગાયિકા લતા મંગેશકરનો કોરોના રિપોર્ટ પણ મંગળવારે પોઝિટિવ આવ્યો છે. તે પછી તેમને મુંબઈની બ્રીચ કેન્ડી હોસ્પિટલમાં એડમિટ કરાવાયા છે. હાલ તેમની તબીયત સારી છે, પરંતુ તકેદારીના ભાગરુપે તેમને આઈસીયુમાં એડમિટ કરાયા છે. બીજી તરફ, બિહારના મુખ્યમંત્રી નીતિશ કુમાર, રાજસ્થાનના મુખ્યમંત્રી અશોક ગેહલોત અને તેમનો પરિવાર પણ કોરોના સંક્રમણની ઝપેટમાં આવી ગયો છે.


દેશમાં છેલ્લા 24 કલાકમાં કોરોના વાયરસના 1,86,368 કેસ નોંધાયા છે. સૌથી વધુ કેસ મહારાષ્ટ્રમાં 33,424 નોંધાયા છે. દેશમાં 24 કલાકમાં કોરોનાથી 436 લોકોના મોત થયા છે.

ઉલ્લેખનીય છે કે, ગત રવિવારે સંસદ તેમજ સુપ્રીમ કોર્ટ જેવી સર્વોચ્ચ સંસ્થાઓમાં પણ કોરોનાનો જબરજસ્ત હુમલો થયો હતો. રવિવારે બંને જગ્યાએથી ચોંકાવનારો આંકડો સામે આવ્યો હતો. સંસદ ભવનના 400 સ્ટાફ અને સુરક્ષાકર્મીનો કોરોના રિપોર્ટ પોઝિટિવ આવ્યો છે. તો, સુપ્રીમ કોર્ટના 150 કર્મચારીઓની સાથે-સાથે ચાર જજ પણ કોરોનાની ઝપેટમાં આવી ગયા છે.

Share This :

Related Articles

Leave a Comment