વર્લ્ડ / 22 વર્ષ પહેલા ડુક્કરનું હૃદય માણસમાં ટ્રાન્સપ્લાન્ટ કરનારા ભારતીય ડૉક્ટર અત્યારે ક્યાં છે?

  • 13-Jan-2022 08:58 AM

કોરોનાના વધતા સંકટ વચ્ચે તબીબી ક્ષેત્રમાં ડોક્ટરોને મોટી સફળતા મળી છે. અમેરિકાના ડોક્ટરોએ નવી સિદ્ધિ મેળવતા મનુષ્યના શરીરમાં ડુક્કરનું હૃદય ટ્રાન્સપ્લાન્ટ કર્યું છે. તે કેટલું સફળ રહેશે, તે તો આવનારો સમય જ બતાવશે. પરંતુ, ઘણા ઓછા લોકોને જાણ હશે કે આવો પ્રયોગ ભારતમાં 22 વર્ષ પહેલા થઈ ચૂક્યો છે. ત્યારે તો એવું કરનારા ડોક્ટરની ધરપકડ કરી તેમને જેલમાં પૂરી દેવાયા હતા અને તેમને 40 દિવસ પછી મુક્ત કરાયા હતા.

અમેરિકાના ડોક્ટરોએ મેરિલેન્ડ યુનિવર્સિટી મેડિકલ સેન્ટરમાં 57 વર્ષના શખસમાં જિનેટિકલી મોડિફાઈડ ડુક્કરનું હૃદય સફળતાપૂર્વક લગાવી એક મોટી સફળતા મેળવી છે. આ પ્રક્રિયા અંગ દાનની અછતને હલ કરવામાં મદદ કરી શકે છે. હૃદયની બીમારીને કારણે દર વર્ષે હજારો લોકોના મોત થઈ જાય છે, એવામાં આ પ્રયોગને એક ક્રાંતિના રૂપમાં જોવામાં આવે છે.

આ અહેવાલ પછી ભારતના આસામમાં રહેતા ડોક્ટર ધની રામ બરુઆ પણ ઘણા ખુશ છે. તેમની સાથે લાંબા સમયથી કામ કરી રહેલા ડો. ગીતાએ અમારા સહયોગી ટાઈમ્સ ઓફ ઈન્ડિયાને જણાવ્યું કે, '72 વર્ષના ડો. બરુઆ હવે બરાબર બોલી શકતા નથી. 2016માં એક સ્ટ્રોક પછી તેમના મગજનું ઓપરેશન કરાયું હતું. પરંતુ તેમણે પોતાનો અવાજ ગુમાવ્યો નથી. તેઓ આ સમાચારથી ખુશ છે. તેમણે 1 જાન્યુઆરી, 1997માં પહેલી વખત હૃદયનું ટ્રાન્સપ્લાન્ટ કર્યું હતું.'

એવું નથી કે, આ કોઈ ડોક્ટરે પહેલી વખત કર્યું છે. આસામમાં રહેતા ડોક્ટર ધની રામ બરુઆએ હોંગકોંગના સર્જન ડો. જોનાથન હો કેઈ-શિંગની સાથે મળીને ગુવાહાટી 1997માં એક મનુષ્યના શરીરમાં ડુક્કરનું હૃદય અને ફેફસાં ટ્રાન્સપ્લાન્ટ કર્યા હતા. ઓપરેશન ગુવાહાટીની પાસે સોનપુરમાં સ્થિત ધની રામ બરુઆ હાર્ટ ઈન્સ્ટીટ્યૂટમાં કરાયો હતો. આ ટ્રાન્સપ્લાન્ટ પછી તે દર્દી 7 દિવસ જીવિત રહ્યો હતો.

ટ્રાન્સપ્લાન્ટના અહેવાલ જેવા જ મીડિયામાં આવ્યા કે બબાલ મચી ગઈ હતી. બંને ડોક્ટરોની બિન ઈરાદાપૂર્વક હત્યા અને માનવ અંગ પ્રત્યારોપણ એક્ટ, 1994ના આરોપ અંતર્ગત ધરપકડ કરી લેવાઈ હતી અને 40 દિવસ સુધી જેલમાં પૂરી દેવાયા હતા. આસામ સરકારની તપાસમાં બહાર આવ્યું હતું કે, તે પ્રત્યારોપણ પ્રક્રિયા અનૈતિક હતી. એવું પણ જાણવા મળ્યું કે, ડો. ધની રામ હાર્ટ ઈન્સ્ટીટ્યૂટ એન્ડ રિસર્ચ સેન્ટરે ટ્રાન્સપ્લાન્ટ કાયદા અંતર્ગત અરજી નહોંતી કરી અને રજિસ્ટ્રેશન પણ કરાવ્યું ન હતું.

ટ્રાન્સપ્લાન્ટ પહેલા એક ઈન્ટર્વ્યુમાં ડો. ધની રામે બરુઆએ કહ્યું હતું કે, 'મેં જર્મનીમાં 9 સપ્ટેમ્બર, 1995માં કહ્યું હતું કે, ડુક્કર એકમાત્ર એવું પ્રાણી છે, જે ઓર્ગન ટ્રાન્સપ્લાન્ટેશન માટે સૂટેબલ છે. એક્સપરિમેન્ટલ સ્ટડી માટે પણ. સાયન્ટિસ્ટ બે પ્રકારના હોય છ- મેડ સાયન્ટિસ્ટ, રિયલ સાયન્ટિસ્ટ. રિયલ સાયન્ટિસ્ટ હંમેશા વિવાદાસ્પદ હોય છે. સાયન્સ એક પરિકલ્પનાથી શરૂ થાય છે અને જ્યારે પરિકલ્પના હકીકત બની જાય છે તો સાયન્ટિસ્ટ અને તેનું કામ કન્ટ્રોવર્શિયલ બની જાય છે.'

તેમણે કહ્યું હતું કે, 'એ ક્ષણ મને ઘણી ખુશી આપે છે કે વાહ મે એ કર્યું, જે પહેલા કોઈએ નથી કર્યું. આઈન્સ્ટાઈન, ગેલેલિયોનું ઉહાદરણ છે. જ્યારે ગેલેલિયો કહ્યું હતું કે, ધરતી સૂર્યનો ચક્કર લગાવે છે તો તેમને દંડ મળ્યો હતો. પરંતુ ધતી હજુ પણ સૂર્યનો ચક્કર લગાવી રહી છે, એ ફેક્ટ છે.'

ધની રામ બરુઆ એક હાર્ટ સર્જન છે, જે ગુવાહાટીની બહાર સોનપુરમાં ધની રામ બરુઆ હાર્ટ ઈન્સ્ટીટ્યૂટ અને ઈન્સ્ટીટ્યૂટ ઓફ એપ્લાયડ હ્યુમન જિનેટિક એન્જિનિયરિંગ ચલાવે છે. તેઓ તબીબી ક્ષેત્રમાં સંશોધન માટે જાણીતા છે. 1997માં તેમણે પહેલી વખત જેનોટ્રાન્સપ્લાન્ટેશન કર્યું હતું. ધની રામ બરુઆ હાર્ટ ઈન્સ્ટીટ્યૂટ, સોનાપુર, ગુવાહાટીમાં જ તેમણે 32 વર્ષના પૂર્ણો સૈકિયાના શરીરમાં ડુક્કરનું હૃદય ટ્રાન્સપ્લાન્ટ કર્યું હતું. તેમના હૃદયમાં કાણું હતું. ડો. બરુઆ સાથે હોંગકોંગના ડો. જોનાથન પણ હતા. જોકે, એ સમયે આ ટ્રાન્સપ્લાન્ટ માટે બંનેને જેલમાં જવું પડ્યું હતું.

આ વિવાદ પહેલા ડો. બરુઆ એક એવા હાર્ટ સર્જન હતા, જેમને આંતરાષ્ટ્રીય સ્તર પર ઓળખ મળી હતી. તેમને તત્કાલીન વડાપ્રધાન ઈન્દિરા ગાંધી અને આસામના મુખ્યમંત્રી હિતેશ્વર સૈકિયાએ આસામમાં એક ઓપન હાર્ટ સર્જરી ક્લિનિક બનાવવા માટે આગ્રહ કર્યો હતો. ડો. બરુઆએ એક હાર્ટ વાલ્વ ડેવલેપ કર્યો હતો અને 1989માં એ વાલ્વના ઉત્પાદન માટે મુંબઈમાં એક ફેક્ટરી પણ બનાવી હતી.

2008માં ડો. બુરઆએ એક જિનેટિકલી એન્જિનિયર વેક્સીન વિકસિત કરી હોવાનો દાવો કર્યો હતો, જે જન્મ સમયથી હૃદયમાં રહેલી ખામીઓને દૂર કરી શકતી હતી. 2015માં ડો. બરુઆએ દાવો કર્યો ક, તેમણે એચઆઈવી એડ્સની સારવાર શોધી લીધી છે. તેમણે દાવો કર્યો કે, તેઓ 86 લોકોને સાજા કરી ચૂક્યા છે. હવે. ડો. બરુઆ ગુવાહાટીથી 20 કિમી દૂર સોનાપુરમાં 'હાર્ટ સિટી' નામની સંસ્થા ચલાવી રહ્યા છે. આ સંસ્થા લગભગ 50 એકરમાં ફેલાયેલી છે.

Share This :

Related Articles

Leave a Comment