ઇન્ડિયા / ખુલી ગયું નસીબ! મુંબઈના પરિવારને 22 વર્ષે પાછું મળ્યું ચોરી થયેલું 8 કરોડનું સોનું.

  • 13-Jan-2022 09:08 AM

મુંબઈમાં રહેતા એક પરિવારને તેનું 22 વર્ષ પહેલા ચોરાયેલું સોનું પાછું મળી ગયું છે. રસપ્રદ વાત એ છે કે, આટલા વર્ષમાં આ સોનાની કિંમત વધીને 8 કરોડ રૂપિયા થઈ ગઈ છે. તમે વિચારતા હશો કે શું ચોરી કરનારા ચોરોએ આ પરિવારને સોનું પાછું આપ્યું. ના, એવું નથી. સોનું તો પોલીસે ચોરો પાસેથી કબજે કરી લીધું હતું, પરંતુ કાયદાકીય ચૂંગાલને કારણે આ સોનું પરિવારને મળી શક્યું ન હતું. હવે, 22 વર્ષે કોર્ટે આ મામલે અંતિમ ચુકાદો આપ્યો છે.

તમે ચરાગ દિન નામની ફેશન બ્રાન્ડનું નામ તો સાંભળ્યું જ હશે, ફેશન ઈન્ડસ્ટ્રીમાં ચરાગ દિન એક જાણીતું નામ છે. આ સોનું એ કંપનીના માલિકનું હતું સેશન જજ યુ જે મોરેએ 5 જાન્યુઆરીએ સોનું અસલી માલિકને પાછું આપવાનો ચુકાદો આપ્યો. આ ખજાનામાં રાણી વિક્ટોરિયાની તસવીરવાળો એક સોનાનો સિક્કો, બે સોનાની બંગડી અને 1,300 ગ્રામ અને 200 મિલીગ્રામ વજનની બે લગડી પણ હતી. જેની તે સમયે કુલ કિંમત 13 લાખ રૂપિયા હતી, જે આજે વધીને 8 કરોડ રૂપિયા થઈ ગઈ છે.

આ સોનાને ચરાગ દિન કંપનીના સંસ્થાપક અર્જુન દાસવાનીના પુત્ર રાજુ દાસવાનીને સોંપી દેવાયું. સરકારી વકીલ ઈકબાલ સોલકર અને કોલાબા પોલીસ સ્ટેશનના ઈન્સ્પેક્ટર સંજય ડોનરે જણાવ્યું કે, તેમને કેટલીક શરતોને આધિન સંપત્તિ પાછી આપવામાં કોઈ વાંધો નથી. રાજુ દાસવાનીએ આ સંપત્તિ અંગેના દસ્તાવેજો કોર્ટમાં રજૂ કર્યા, જેના આધાર પર પુષ્ટિ થઈ કે આ સોનું તેમનું જ છે. કોર્ટે પોતાના ચુકાદામાં કહ્યું કે, આ સંપત્તિને પોલીસ કસ્ટડીમાં રાખવાનો કોઈ અર્થ નથી 19 વર્ષ કરતા વધારે સમય વીતી ચૂક્યો છે. બે ફરાર આરોપીઓને પકડવા મામલે આટલા વર્ષોમાં કોઈ પ્રગતિ થઈ નથી. જો કોઈ ફરિયાદી પોતાની સંપત્તિ પાછી લેવા માટે વર્ષો સુધી રાહ જોશે તો તે ન્યાયની મજાક અને કાયદાની પ્રક્રિયાનો દુરુપયોગ હશે. એટલે, સુંદરબાઈ અંબાલા દેસાઈના મામલામાં નિર્ધારિત રેશિયોને ધ્યાનમાં રાખતા અરજી કરનારની અરજીમાં દાવો કરાયેલી બધી સંપત્તિઓ પાછી મેળવવા હકદાર છે.

ઉલ્લેખનીય છે કે, 8 મે 1998એ હથિયારધારી શખસો અર્જુન દાસવાનીના ઘરમાં ઘૂસી ગયા હતા અને બધું સોનું લૂંટીને ભાગી ગયા હતા. પોલીસે આ મામલે ત્રણ શખસોની ધરપકડ કરી હતી અને તેમની પાસેથી આ સોનું પણ જપ્ત કર્યું હતું. આ મામલે ત્રણ આરોપી હજુ પણ ફરાર છે. બીજી તરફ, અર્જુન દાસવાનીનું 2007માં નિધન થઈ ગયું હતું.

કોર્ટે આ સોનું પાછું આપવાની સાથે એવી શરત મૂકી છે કે, કોર્ટ જ્યારે કહે ત્યારે સોનું જે સ્થિતિમાં છે તેવું રજૂ કરવાનું રહેશે. આ વસ્તુઓ વેચી શકાશે નહીં અને જો તેમ થશે તો 1 લાખનો દંડ કરવામાં આવશે. કોર્ટે પોલીસને વસ્તુઓની તસવીર પાડી લેવા અને વિગતવાર પંચનામું કરવા કહ્યું છે.

પોલીસે જણાવ્યું કે, રાજુની બે બહેનોમાંથી એક કેનેડા અને એક અમેરિકામાં રહે છે. તેઓ પણ આ સંપત્તિમાં કાયયદેસરના વારસદાર છે. તેમણે આ સોનું રાજુને આપવામાં આવે તો તેમને કોઈ વાંધો નથી તેવું લેખિતમાં જણાવ્યું હતું.

Share This :

Related Articles

Leave a Comment