ગુજરાત / કોરોનાની રસીના 11 ડોઝ લઈ ચૂકેલા 84 વર્ષના વૃદ્ધ હવે ટેન્શનમાં મૂકાયા.

  • 13-Jan-2022 09:10 AM

એક તરફ કેટલાક લોકો ડર કે ગેરસમજને કારણે કોરોનાની વેક્સિનથી દૂર ભાગી રહ્યા છે, ત્યારે અત્યારસુધી વેક્સિનના 11 ડોઝ લઈ ચૂકેલા બિહારના બ્રહ્મદેવ મંડલ હવે ચિંતામાં મૂકાયા છે. તેમની સામે આરોગ્ય વિભાગને ગેરમાર્ગે દોરી ખોટી રીતે વેક્સિન લેવાની FIR કરવામાં આવી છે. જોકે, ત્યારથી જ ધરપકડથી બચવા તેઓ ભૂગર્ભમાં ઉતરી ગયા છે. એટલું જ નહીં, તેમણે ચિમકી આપી છે કે તેમની વિરુદ્ધ કોઈ કાયદાકીય કાર્યવાહી કરાઈ તો તેઓ આપઘાત કરી લેશે.

સૂત્રોનું માની તો તેમની સામે અલગ-અલગ આઈડી કાર્ડ રજૂ કરી 11 વાર વેક્સિન લેવાનો આરોપ છે. તેમને પકડવા માટે પોલીસે તેમના ઘરે દરોડો પણ પાડ્યો હતો. જોકે, ત્યારે તેઓ ઘરે નહોતા મળ્યા. પોલીસ ઘરે આવી હતી તેની ખબર પડતાં જ બ્રહ્મદેવ મંડળ ગાયબ થઈ ગયા છે. તેમનો ફોન પણ બંધ છે. તેમણે પોતાના પર લાગેલા આરોપને હટાવવા માટે પીએમ મોદીને પણ દરમિયાનગીરી કરવા માટે અપીલ કરી છે.

બીજી તરફ, બ્રહ્મદેવ મંડલના પત્ની નિર્મલા દેવીએ પોલીસ પર તેમના પતિને હેરાન કરવાનો આરોપ મૂક્યો છે. તેમનો આક્ષેપ છે કે તેમના વૃદ્ધ પતિ જાણે કોઈ ગુનેગાર હોય તેવું પોલીસ તેમની સાથે વર્તન કરી રહી છે. તેમણે જણાવ્યું હતું કે તેમના પતિને કાંડા તેમજ ઘૂંટણમાં દુ:ખાવા સહિતની અનેક સમસ્યા હતી. તેઓ સીધા ઉભા પણ નહોતા રહી શકતા. જોકે, વેક્સિનનો પહેલો ડોઝ લીધા બાદ તેમની તબિયત સુધરી હતી. તેમણે તેના એકથી વધુ ડોઝ લીધા બાદ તેમના શરીરમાં કોઈ રોગ નથી.

જોકે, સ્થાનિક આરોગ્ય કેન્દ્રના ઈનચાર્જે આ મામલે પોલીસ સ્ટેશનમાં લેખિતમાં ફરિયાદ આપી હતી. જેમાં એવું જણાવાયું હતું કે બ્રહ્મદેવ મંડલે અલગ-અલગ આઈડી કાર્ડ રજૂ કરીને મેડિકલ સ્ટાફને ગેરમાર્ગે દોરી ખોટી રીતે વેક્સિન લીધી હતી.


નિવૃત્ત ટપાલી બ્રહ્મદેવે 13 ફેબ્રુઆરીના રોજ પહેલો જ્યારે 24 સપ્ટેમ્બરે નવમો ડોઝ લીધો હતો. તેઓ જ્યારે પણ રસી લેતા તે દિવસની તારીખને પોતાની ડાયરીમાં નોંધી રાખતા હતા. તેમનો દાવો છે કે રસી લેવાથી તેમનું કમર દર્દ ગાયબ થઈ ગયું છે, તેમજ શરીરમાં રહેતી અશક્તિ પણ દૂર થઈ છે. એટલું જ નહીં, તેમની તબિયત ઘણી સુધરી ગઈ છે. ગામની આસપાસ તેઓ જ્યાં પણ રસીના કેમ્પ જોતા ત્યાં ડોઝ લેવા માટે પહોંચી જતા હતા.

છેલ્લે તો તેમણે માધેપુરાના ચીફ મેડિકલ ઓફિસરને જ રસીના વધુ ડોઝ આપવા વિનંતી કરી હતી. વેક્સિનના નવ ડોઝ લેવા માટે તેમણે પોતાની પત્ની અને મિત્રના મોબાઈલ નંબરનો પણ ઉપયોગ કર્યો હતો. જોકે, આ અંગે સ્થાનિક મીડિયામાં અહેવાલ પ્રસિદ્ધ થયા બાદ બ્રહ્મદેવ આખી દુનિયામાં જાણીતા થઈ ગયા હતા. એક તરફ બ્રહ્મદેવનો દાવો છે કે રસીના 11 ડોઝ લઈ તેમની તબિયત સુધરી ગઈ છે, પરંતુ ડૉક્ટર્સનું માનીએ તો આવું થવું અશક્ય છે. ઉલ્ટાનું વારંવાર જો રસી લેવાય તો તેનાથી ઈમ્યુન સિસ્ટમ નબળી પડી જાય છે.

Share This :

Related Articles

Leave a Comment