ગુજરાત / ઉપલેટાના જ્લેવર પાસેથી સોના-ચાંદીના ઘરેણાંની બેગ લૂંટનારા ચાર આરોપીઓની ધરપકડ.

  • 17-Jan-2022 08:50 AM

રાજકોટના ઉપલેટા તાલુકામાં એક જ્વેલરને લૂંટવાના કેસમાં રવિવારે મધ્યપ્રદેશના જાબુઆમાંથી ચાર શખ્સની ધરપકડ કરવામાં આવી હતી.

આરોપીઓની ઓળખ દિલીપ ભુરિયા (ઉંમર 22), રાહુલ ભુરિયા (ઉંમર 24), મુકેશ પરમાર (ઉંમર 32) અને લાલચંદ ભુરિયા (ઉંમર 36) તરીકે થઈ છે. જેમણે ઉપલેટના જ્વેલર રમેશ જોગિયા (ઉંમર 52)ને લૂંટવાનો પ્લાન બનાવ્યો હતો અને ઘટનાને અંજામ આપ્યો હતો. આરોપી દિલીપ ભુરિયા રાજકોટનો રહેવાસી છે જ્યારે રાહુલ ઉપલેટામાં રહે છે. અન્ય બે આરોપીઓ જાંજમેર ગામમાં ખેતમજૂરી કરે છે, જ્યાં રમેશ જોગિયાની દુકાન આવેલી છે.

જેતપુરના આસિસ્ટન્ટ સુપ્રીટેન્ડેન્ટ ઓફ પોલીસ (એએસપી) સાગર વાઘમારેના જણાવ્યા અનુસાર, મુકેશ અને લાલચંદે લૂંટ પહેલા રેકી કરી હતી. જ્યારે દિલીપ અને રાહુલે 13મી જાન્યુઆરીએ ઘટનાને અંજામ આપ્યો હતો.

ઘટના 13મી જાન્યુઆરીએ બની હતી જ્યારે જોગિયા ઉપલેટાથી 18 કિમી દૂર આવેલા જાંજમેર ગામમાં રહેલી દુકાન બંધ કરીને સ્કૂટર પર પોતાના ઘરે પરત ફરી રહ્યા હતા.

જ્યારે જોગિયા જાંજમેર અને સુપેન્ડી ગામ વચ્ચેના એકાંત સ્થળે પહોંચ્યા ત્યારે દિલીપ અને રાહુલે તેમના પર પાછળથી હુમલો કર્યો હતો અને માથામાં બેટ માર્યું હતું. જેના કારણે જોગિયા કાબૂ ગુમાવી બેઠા હતા અને તેમનું સ્કૂટર રસ્તા પરથી નીચે ઉતરી ગયું હતું.


તેઓ જેવા સ્કૂટર પરથી પડી ગયા કે, આરોપીએ તેમના ચહેરા પર મરચું પાઉડર ફેંક્યું હતું અને રોકડ તેમજ 75,400 રૂપિયાના કિંમતના સોના-ચાંદીના ઘરેણાં ભરેલી બેગ તેમના હાથમાંથી ખેંચીને ભાગી ગયા હતા.

13મી જાન્યુઆરીએ રાતે જોગિયાએ ફરિયાદ કર્યા બાદ, પોલીસે દુકાનની નજીકના સીસીટીવી ફૂટેજ તપાસ્યા હતા અને દુકાન પાસે મુકેશ તેમજ લાલચંદને શંકાસ્પદ રીતે આંટાફેરા કરતા જોયા હતા. પોલીસે પૂછપરછ માટે બંનેની અટકાયત કરી હતી. પૂછપરછ દરમિયાન બંનેએ જોગિયાને લૂંટવામાં તેમનો પણ ભાગ હોવાની કબૂલાત કરી હતી.

તેમણે ગુનાને અંજામ આપનારા દિલીપ અને રાહુલના નામનો ખુલાસો કર્યો હતો. માહિતીના આધારે, પોલીસે ચારેય આરોપીઓની ધરપકડ કરી હતી અને તેમની સામે લૂંટ તેમજ આઈપીસીની અન્ય કેટલીક કલમ હેઠળ ગુનો નોંધ્યો હતો.

Share This :

Related Articles

Leave a Comment