વર્લ્ડ / 71 વર્ષથી જ્યાં તળાવ હતું, ત્યાંથી નીકળ્યુ એક 'ખોવાયેલું' ગામ.

  • 22-Nov-2021 10:31 AM

ઈટાલીમાં સ્થિત રેસિયા લેક લોકોમાં ચર્ચાો વિષય બન્યું છે. આમ તો આ લેક તેના બરફના પાણી વચ્ચે આવેલા 14મી શતાબ્દીના એક ચર્ચના મિનારના કારણે પ્રખ્યાત છે, પરંતુ લેકમાંથી એક ખોવાયેલા ગામના અવશેષો મળી આવતા લોકો એના નિર્માણના ઈતિહાસને જાણીને આશ્ચર્યમાં છે.


પ્રાપ્ત રિપોર્ટ મુજબ, જ્યારે અનેક વર્ષો બાદ લેકનું સમારકામ શરૂ થયુ તો તેના પાણીને અસ્થાયી રીતે સૂકાવવામાં આવ્યું. એ પછી લોકો સામે દશકોથી જળસમાધિ લીધેલા એક ગામની તસવીર સામે આવી. મહત્વનું છે કે, લેક રેસિયાને જર્મનમાં રેસચેન્સીના નામે ઓળખવામાં આવે છે. આ દક્ષિણ ટાયરોલના અલ્પાઈન વિસ્તારમાં સ્થિત છે, જે ઓસ્ટ્રિયા અને સ્વિત્ઝરલેન્ડની સીમા છે.


એક અંગ્રેજી વેબસાઈટના રિપોર્ટનું માનીએ તો, વર્ષ 1950માં પાણીમાં સમાધિ લીધી એ પહેલાં ક્યૂરોન નામના આ ગામમાં સેંકડો લોકો વસવાટ કરતા હતા. ખરેખરમાં એક હાઈડ્રોઈલેક્ટ્રિક પ્લાન્ટ બનાવવા માટે સરકારે અહીં 71 વર્ષ પહેલાં એક ડેમનું નિર્માણ કરાવ્યું હતું. એના માટે બે લેકને એક કરવામાં આવી અને ક્યૂરોન ગામનું અસ્તિત્વ અદ્રશ્ય થઈ ગયું.


જ્યારે 1950માં અહીં ડેમ બાંધવાનો નિર્ણય લેવામાં આવ્યો ત્યારે ગામના લોકોએ તેનો વિરોધ કર્યો હતો. તેમ છતાં અધિકારીઓએ ડેમ બાંધવાનો અને પાસે આવેલા બે લેકને એક કરવાનો નિર્ણય લીધો. જેના કારણે આ ગામ પાણીની ઊંડાઈમાં ગરકાવ થયું હતું. જેના કારણે 160થી વધુ મકાનો પાણીમાં ડૂબી ગયા હતા. બાદમાં ક્યૂરોનની વસતી વિસ્થાપિત થઈ ગઈ. જો કે, એ પછી કેટલાંક લોકોએ નજીકમાં એક નવું ગામ વસાવ્યું અને રહેવા લાગ્યા.

આ વિસ્તાર સાથે સંકળાયેલી લુઈસા એઝોલીનીએ ટ્વિટર પર કેટલીક તસવીરો શેર કરી અને લખ્યું કે, આ ગામના અવશેષો વચ્ચે ચાલવું એક અનોખો અનુભવ હતો. તેના આ ટ્વિટને અત્યાર સુધીમાં અનેક લાઈક્સ મળી ચૂકી છે. ઉલ્લેખનીય છે કે, ક્યૂરોન ગામથી પ્રેરણા લઈને એક પુસ્તક પણ લખવામાં આવ્યું છે. સાથે જ નેટફ્લિક્સે એક સિરીઝ પણ બનાવી છે.


મહત્વનું છે કે, ઉનાળાની સિઝનમાં આ લેક હાઈકર્સ માટે મનપસંદ સ્થળ બની જાય છે. જ્યારે શિયાળાની સિઝનમાં આ લેક જામી જતુ હોવાથી મુલાકાતીઓ આ એના પર ચાલીને ર્ચચના શિખર સુધી પહોંચતા હોય છે. આ સિવાય એક બીજી મહત્વની વાત એ પણ છે કે, દક્ષિણ ટાયરોલ પહેલાં ઓસ્ટ્રિયાનો હિસ્સો હતો, પરંતુ પ્રથમ વિશ્વ યુદ્ધ દરમિયાન એના પર ઈટાલીએ કબજો મેળવ્યો હતો. આ વિસ્તારમાં રહેતા લોકોની પહેલી ભાષા જર્મન છે.

Share This :

Related Articles

Leave a Comment